استانادا مەملەكەتتىك كەڭەسشى ەرلان قاريننىڭ توراعالىعىمەن پارلامەنتتىك رەفورما جونىندەگى جۇمىس توبىنىڭ ءۇشىنشى وتىرىسى ءوتتى.

ەرلان قارين پرەزيدەنت باستاماشى بولعان پارلامەنتتىك رەفورما مەملەكەتتىك قۇرىلىستىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» نەگىزگى فورمۋلاسى اياسىنداعى اۋقىمدى ساياسي جاڭعىرۋدىڭ قيسىندى جالعاسى ەكەنىن اتاپ ءوتتى. سونداي-اق مەملەكەتتىك كەڭەسشى الداعى پارلامەنتتىك رەفورما زاڭ شىعارۋ قىزمەتىنىڭ تيىمدىلىگى مەن ساپاسىن ارتتىرۋعا باعىتتالعانىن ەسكە سالدى.

وتىرىستا پارلامەنتتىك رەفورماعا قاتىستى ۇسىنىستاردى جيناقتاپ، جۇيەلەۋدىڭ ارالىق قورىتىندىلارى قارالدى. سونىمەن قاتار بولاشاق ءبىر پالاتالى پارلامەنتتىڭ زاڭ شىعارۋ قىزمەتىنىڭ نەگىزگى باعىتتارى تالقىلاندى.

جيىن بارىسىندا پارلامەنتاريزم ينستيتۋتىنىڭ ديرەكتورى ناتاليا پان ازاماتتاردان، ساراپشىلاردان، قوعام بەلسەندىلەرىنەن جيناقتالعان ۇسىنىستار جونىندە اقپارات بەردى. اتاپ ايتقاندا، e-Otinish جانە eGov پلاتفورمالارىنداعى «پارلامەنتتىك رەفورما» ارنايى بولىمىنە 400-دەن استام ۇسىنىس كەلىپ ءتۇستى. جۇمىس توبى مۇشەلەرىنىڭ، ساياسي پارتيالاردىڭ ۇسىنىستارى مەن ازاماتتاردىڭ باستامالارى جۇيەلەنىپ، پارلامەنتاريزم ينستيتۋتىندا مۇقيات زەردەلەنۋدە.

ەرلان قارين وتىرىستار ارالىعىنداعى كەزەڭدە پارلامەنتتىك رەفورماعا قاتىستى جاڭا ۇسىنىستار مەن باستامالار بويىنشا ورتاق كوزقاراستاردى قالىپتاستىرۋ ءۇشىن اۋقىمدى، مازمۇندى جۇمىس جۇرگىزىلىپ جاتقانىن ايتتى. سونداي-اق مەملەكەتتىك كەڭەسشى تالداۋ جۇمىستارىنا نازار اۋدارىپ، ۇسىنىستاردىڭ ساپالىق تۇرعىدان جاقسارا تۇسكەنىن جەتكىزدى.

جۇمىس توبى جەتەكشىسىنىڭ ورىنباسارى – پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ پارلامەنتتىڭ زاڭ شىعارۋ قىزمەتىن جەتىلدىرۋگە باعىتتالعان جالپى تاسىلدەر تۋرالى ايتتى. بۇل جۇمىس توبى مۇشەلەرى مەن ساياسي پارتيالاردىڭ ۇسىنىستارى نەگىزىندە ازىرلەندى.

جۇمىس توبىنىڭ مارات شيبۇتوۆ، اندرەي چەبوتارەۆ، ازات پەرۋاشەۆ، ۆيكتور مالينوۆسكي، ماگەررام ماگەرراموۆ، ءبورىحان نۇرمۇحامەدوۆ، ءۇنزيلا شاپاق، لەيلا جاقاەۆا، سنەجاننا يماشەۆا، ەلنۇر بەيسەنباەۆ، الۋا يبراەۆا، نيكيتا شاتالوۆ، ينديرا اۋباكىروۆا، ەرلان سارسەمباەۆ سەكىلدى مۇشەلەرى زاڭ شىعارۋ ۇدەرىسىن ۇيىمداستىرۋ جانە زاڭداردىڭ ساپاسىن جاقسارتۋ تەتىكتەرى جونىندەگى يدەيالارى مەن ۇسىنىستارىن ورتاعا سالدى.

وتىرىس بارىسىندا پارلامەنتتىك رەفورما ساياسي جاڭعىرۋدىڭ ماڭىزدى كەزەڭى ەكەنى، زاڭ شىعارۋ بيلىگىنىڭ ءرولى مەن تيىمدىلىگىن ارتتىرۋعا، سونداي-اق كاسىبي زاڭ شىعارۋ ءىسىن ودان ءارى دامىتۋعا باعىتتالعانى ايتىلدى.

جيىن قورىتىندىسى بويىنشا جۇمىس توبىنىڭ جەتەكشىسى – مەملەكەتتىك كەڭەسشى كەلىپ تۇسكەن ۇسىنىستاردىڭ بارلىعىن جيناقتاپ، جان-جاقتى تالداۋدى تاپسىردى.

پارلامەنتتىك جۇيەنى جەتىلدىرۋگە قاتىستى تاسىلدەردى ازىرلەۋ ءىسى جۇمىس توبىنىڭ الداعى وتىرىستارىندا كەزەڭ-كەزەڭىمەن جالعاسادى.

Abai.kz