ناتاليا سيريۆليا دەگەن ورىس كينوتانۋشىسى، ونەر سىنشىسى بار.
سونىڭ ءبىر جازعانىن وقىپ ەدىم:

ن.س: «70-جىلدار» دەگەن ارنايى قۇرمەتتى ۇعىم بار ءبىزدىڭ كينو ورتاسىندا. سابەت وكىمەتىنىڭ بارلىق ادامدى بىردەي عىپ تەڭگەرگىش، ەركىندىگى مەن ەرەكشەلىگىن جاسىرعىش، ءوز ويىن ايتۋىنا تىيىم سالىپ، تىيىپ ۇستاعىش ساياساتىنا قارسىلىق سەزدىرە باستاۋ كەزەڭى. ونەردە. ازداپ بولسا دا. بىراق سول «70-جىلدار»... 1970 جىلدان باستالا سالعان جوق. تۋرا 1975 جىل ءبىتىپ، 1976 جىل كىرىپ كەلەر ساتتە باستالدى.

ەلدار ريازانوۆتىڭ «تاعدىر تالكەگى» فيلمىنەن!

ارينە، كينەماتوگرافيالىق تەحنيكا تۇرعىسىنان العاندا، بۇل ءفيلمنىڭ بىت-شىتىن شىعارۋعا دا بولادى – ءىرى پلاندار كوپ، كوبى ءۇيدىڭ ىشىندە تۇسىرىلە بەرگەن، ناتۋرا از، ءسال سوزىلعان ەپيزودتار دا كەزدەسەدى...

بىراق ريازانوۆ فيلمگە، جالپى كينو ونەرىنە سوۆەت وكىمەتىنىڭ ساياساتىن اسا جاقتىرا قويماي، كەيبىرى اشىق ايتىپ قاپ، كەيبىرى ىشتەن تىنعان اقيقاتشىل اقىنداردىڭ ولەڭدەرىن الىپ كەلدى – مارينا تسۆەتاەۆا مەن بەللا احمادۋللينانى، بوريس پاستەرناك پەن ميحايل لۆوۆسكيدى، الەكساندر كوچەتكوۆ پەن ۆلاديمير كيرشوندى. كومپوزيتور ميكاەل تاريۆەرديەۆتىڭ سوڭىنان توقتاماي قۋىپ ءجۇرىپ ارنايى توعىز ءان جازدىردى. ءبارى فيلمدە ورىندالادى.

«انا ولەڭدى الىپ تاستا، مىنا تۇسىن جوندە» دەگەن كينو شەنەۋنىكتەرىنە قايمىقپاي قارسى تۇردى. تالقىلاۋ بارىسىندا تابانداپ، تالابىنان تانبادى. ءاننىڭ، ولەڭنىڭ ءبارىن قورعاپ قالدى.
قازىرگى بالالار كۇلەر، بىراق بۇل – سول جىلدار ءۇشىن اجەپتاۋىر ەرلىك ەدى. وسى ءۇشىن دە قۇرمەتتەگەنىمىز ابزال»

راسىندا دا، سودان سوڭ بارىپ باستالدى عوي ءسال-ءپال ەركىندىك – ريازانوۆتىڭ ءوزىنىڭ «گاراجى» مەن «زابىتايا مەلودياسى»، «و بەدنوم گۋسارە زامولۆيتە سلوۆوسى» مەن «دوروگايا ەلەنا سەرگەەۆناسى»، گايدايدىڭ «ينكوگنيتو يز پەتەربۋرگا» دەگەن ءفيلمى (15 جىل كورسەتىلمەي، سورەدە جاتىپ، سوڭىنان شىقتى، يۋتۋبتا بار), دانەليانىڭ، سامسونوۆتىڭ، بەجانوۆتىڭ، سۋريكوۆانىڭ، مەنشوۆتىڭ ايتەۋىر قادام-قادام بولسا دا شىندىققا ۇمتىلعان دۇنيەلەرى.

«ۇلى وكتيابر رەۆوليۋتسياسى بۇكىل سوۆەت حالقىنىڭ كوزىن اشتى» دەگەندە، ءبىر كارىس: «ءبىزدىڭ كوزىمىزدى ءسال-ءپال عانا اشتى»، – دەگەن ەكەن عوي.

سول سياقتى «ءسال-ءپال عانا كوزىمىزدى اشقان» فيلمدەردىڭ ءبىرى.

«تاعدىر تالكەگى» 1976 جىلدىڭ 1 قاڭتارى كۇنى كسرو تەلەۆيزياسىنىڭ ءبىرىنشى ارناسىنان العاش رەت كورسەتىلگەن. بۇگىن تۋرا 50 جىل بولىپتى.

ساكەن سىبانباي

Abai.kz