فۋتبولدان الەم چەمپيوناتىندا ەرەكشە شەبەرلىگىمەن ءتانتى ەتكەن تاڭداۋلى ويىنشىلار جونىندەگى اڭگىمەنى تۇيىندەيمىز.

جاسىل الاڭداعى باپكەر

2018 جىلى رەسەي جەرىندە وتكەن تۋرنيردە حورۆاتيا قۇراماسىنىڭ كاپيتانى لۋكا مودريچكە جەتەر ويىنشى بولعان جوق. بالا كۇنىندە بالقانداعى قىرعىن سوعىستىڭ زاردابىن تارتقان، كەيىن زاگرەبتىڭ «دينامو» فۋتبول كومانداسىنان تۇلەپ ۇشىپ، ءوزىنىڭ ەڭبەكقورلىعىنىڭ، ەرىك-جىگەرىنىڭ، تاباندىلىعىنىڭ، ەڭ باستىسى – عالامات تالانتىنىڭ ارقاسىندا ەۋروپانىڭ «توتتەنحەم» (انگليا), «رەال-مادريد» (يسپانيا), «ميلان» (يتاليا) كلۋبتارىندا ويناپ، بۇكىل الەمگە تانىلدى.

سۋرەت: sport5.by سايتىنان الىندى.

بيىل 41-گە تولاتىن ارداگەر ويىنشى حورۆاتيا ۇلتتىق قۇراماسىنىڭ ساپىنا جاسى 20-عا ىلىكپەي جاتىپ-اق الىنعان. وسى جيىرما جىلدان استام ۋاقىت بويىنا ول ءوزىنىڭ دەڭگەيىنەن ەش تومەن تۇسپەي، وزگەلەرگە ۇلگى بولۋمەن كەلەدى. 2018 جىلعى الەمدىك دوپ دوداسىندا حورۆاتتار جۇرتتىڭ ءبارىن تاڭعالدىرا فينالعا شىعىپ، كۇمىس مەدال يەلەنسە، بۇل – نەگىزىنەن، ءمودريچتىڭ ارقاسى. ارينە، فۋتبول – كوماندالىق ويىن، ونىڭ راكيتيچ، ماندجۋكيچ، سرنا سەكىلدى جاسىل الاڭداعى سەنىمدى سەرىكتەرى دە ەرەكشە كوزگە ءتۇستى، دەگەنمەن ۇجىمدى ۇيىستىرا بىلگەن، باپكەر تاپسىرماسىنىڭ تاپ-تۇيناقتاي ورىندالۋىن قاداعالاعان، ماتچ بارىسىندا شىعارماشىلىق ەركىندىكپەن ءتۇرلى ويىن ورنەگىن جاساپ، جىگىتتەرىنە جىگەر بەرگەن – لۋكا مودريچ ەكەنىن ەكىنىڭ ءبىرى مويىندايدى. ونى ءتىپتى جانكۇيەرلەر «جاسىل الاڭداعى باپكەر» دەپ تە اتايدى.

وسى ءبىر سىرتتاي قاراعاندا ءالجۋازداۋ كورىنەتىن، ارىقشا كەلگەن كەلگەن اشاڭ جىگىتتىڭ الاڭدا اتشا شاباتىنىنا، ەش شارشامايتىنىنا تاڭداناسىز. 90 مينۋت، ءتىپتى كەيدە 120 بويى تىنىم تاپپايدى: كوماندانىڭ ويىنىن ۇيىمداستىرادى، العى شەپتەگى شابۋىلشىلارعا نەبىر عاجاپ پاستار بەرەدى، قاجەت كەزدە قورعانىسقا دا كومەكتەسەدى، كومانداسى جەڭىپ تۇرسا، سوڭعى مينۋتتاردا ۋاقىت ۇتۋ ءۇشىن ءارى سەرىكتەرى ءبىر ءسات تىنىم السىن دەپ دوپتى ۇستاپ، قارسىلاستارىن شىركوبەلەك اينالدىرا الداپ ءبىراز ءجۇرىپ الاتىنى بار. ءبىر سوزبەن ايتقاندا، شەبەردىڭ شەبەرى!

2018 جىلى «التىن دوپ» يەگەرى اتاندى. مەسسي مەن رونالدۋ داۋىرىندە مۇنداي دارەجەگە جەتۋ – قيىننىڭ قيىنى. ءتورت جىلدان سوڭ حورۆاتيانىڭ قولا جۇلدەگە قول جەتكىزۋىنە كوپ ەڭبەك ءسىڭىردى، كوماندانىڭ كوسەمى رەتىندە اتويلاپ العا سۇيرەدى...

پەلەنىڭ وزىنەن باتا العان...

ال 2022 جىلعى چەمپيوناتتا، جۇرتتىڭ كوبى الەم چەمپيونى اتانعان ارگەنتينالىق كاپيتان ليونەل مەسسيگە تابىنعانىمەن، بىزدىڭشە، فرانتسۋز شابۋىلشى كيليان مباپپەنىڭ جۇلدىزى ەرەكشە جاندى. ول الدىمەن 2018 جىلعى تۋرنيردە جارق ەتىپ كوزگە تۇسكەن بولاتىن. ونىڭ قورعاۋشىلاردى قالاي بولسا، سولاي قاقپاقىلداپ، جانىنان جەلدەي ەسىپ وتە شىعاتىن ەرەن جۇيرىكتىگى، قارسى قاقپانى قاراۋىلىنان تۇسىرمەيتىن مەرگەندىگى، قاي تۇستان بولسىن سوققى باعىتتاي بەرەتىن گولقۇمارلىعى فۋتبول ماماندارىن دا، جانكۇيەر قاۋىمدى دا ايرىقشا سۇيسىنتكەن-ءدى. «مىناۋ ءوزى – بولايىن دەپ تۇرعان بالا ەكەن!» دەپ مارقۇم پەلە اقساقالدىڭ ءوزى سول كەزدە ريزا بولىپ، باتاسىن بەرگەندەي ەدى.

سۋرەت: azertag.az سايتىنان الىندى.

ال قاتاردا وتكەن ءاچ-2022-دە مباپپەنىڭ ويىنى ودان دا وسكەنى بايقالدى. ول مەرگەندىگىمەن قوسا، كوماندا ساپىندا ارداگەر فۋتبولشىلاردىڭ دا بولعانىنا قاراماستان، فرانتسيا قۇراماسىن العا جەتەلەر ناعىز كوشباسشىنىڭ وزىنە اينالدى. ماتچ سايىن قانجىعاسىن مايلاعان مباپپە 7 ويىندا 8 گول سوقتى! بۇل – سوناۋ 2002 جىلى داڭقتى برازيليالىق رونالدونىڭ كورسەتكىشىنەن كەيىنگى وسىنداي جوعارى ناتيجە. جانە سول 8 گولدىڭ ۇشەۋىن كيليان جامپوز فينالدا ارگەنتينانىڭ قاقپاسىنا ەنگىزدى! بۇل دا – سوناۋ 1966 جىلى اعىلشىن دجەففري حەرست جاساعان ەرلىكتەن كەيىن ەندى قايتالانىپ وتىرعان رەكورد.

الەم چەمپيوناتتارىنىڭ فينالدىق كەزەڭدەرىندە سوققان گولدارىنىڭ سانى جونىنەن مباپپە ءدال قازىر ەكىنشى ورىندا تۇر (16 گول، دوپ تەبۋدى باياعىدا قويعان نەمىس ميروسلاۆ كلوزەمەن بىرگە). ەندى فرانتسۋز شابۋىلشىسىنىڭ الدىندا تەك 18 دوپ سوققان ارگەنتينالىق ليونەل مەسسي عانا تۇر.

كىم چەمپيون بولادى؟

ءار دوپ دوداسى سايىن ماماندار دا، جانكۇيەرلەر دە ءتۇرلى بولجام جاساۋعا اۋەس كەلەدى. بۇل، ءبىر جاعىنان، پىكىر تالاستىرىپ، فۋتبول تالقىلاۋ ءۇشىن دە قىزىق، ەكىنشىدەن، ءوز كورەگەندىگىڭدى، ساۋەگەيلىگىڭدى سىناپ كورۋدىڭ ءبىر ءتاسىلى دە سەكىلدى.

ارينە، بولجام دەگەن الۋان ءتۇرلى بولا بەرەدى. جۇرتشىلىق، نەگىزىنەن، ءوزىنىڭ بۇيرەگى بۇراتىن كوماندالاردى «چەمپيون» ەتۋگە تىرىسادى (ونى ءوزى اڭعارماۋى مۇمكىن). جانكۇيەر جازعان سونداي عوي. ال ماماندار جان-جاقسى ساراپتاۋعا تىرىسادى.

بيىلعى دوپ دوداسى تۋرالى دا الۋان ءتۇرلى بولجام بار. ماسەلەن، ESPN سپورت مەدياحولدينگىنىڭ كومپيۋتەرلىك بولجاۋ باعدارلاماسى كوكەيدەگى سۇراققا بىلاي جاۋاپ بەرىپتى:

– چەمپيوندىقتان ۇمىتكەرلەردى ءۇش لەككە بولۋگە بولادى. ءبىرىنشى لەك – يسپانيا، فرانتسيا، ارگەنتينا. بۇل ۇشەۋىنىڭ فۋتبولدىڭ التىن ءتاجىن كيۋىنە مۇمكىندىگى وتە جوعارى. ەكىنشى لەك – پورتۋگاليا، برازيليا، انگليا، گەرمانيا، نيدەرلاندى. بۇلاردىڭ دا چەمپيون اتانۋعا قاۋقارى جەتەدى، دەگەنمەن الدىڭعى ۇشەۋگە قاراعاندا مۇمكىندىگىن ءسال تومەنىرەك باعالاۋعا بولادى. ءۇشىنشى لەك – حورۆاتيا، بەلگيا، ماروككو، ۋرۋگۆاي، كولۋمبيا، نورۆەگيا سەكىلدى كوماندالار. بۇلاردىڭ ءبىرى چەمپيون اتانسا، سەنساتسيا دەگەن سول بولادى.

راس، كومپيۋتەردىڭ ايتقانىنىڭ ءبارى كەلە بەرمەس. دەگەنمەن... كورەيىك.

ساكەن سىبانباي

Abai.kz