بۇگىن - «قازاقستان حالقىنا» قورى قۇرىلعان كۇن ەكەنىن ۇمىتىپ كەتكەن جوقسىزدار ما؟

ءتورت جىل بۇرىن «قازاقستان حالقىنا» قورى قۇرىلعاندا وعان قاتىستى ءار اقپاراتتى جىبەرمەي وتىراتىن ەم. ول كەزدەگى جۇمىس فورماتى باسقا ەدى. قور سايتىنا كىرسەڭ، كۇن سايىن قانشا اقشا تۇسكەنىن، كىم اۋدارعانىن، ناقتى دونورلاردىڭ اتىن كورۋگە بولاتىن. بۇل – قازاقستان ءۇشىن بۇرىن-سوڭدى بولماعان تاجىريبە ەدى. قوعامعا «قور حالىق ءۇشىن» دەگەن سيگنال بولاتىن.

قازىر سايتتا تەك ايلىق نەمەسە جىلدىق PDF- فورماتتاعى ەسەپتەر بار. ءىرى بيزنەس پەن بانكتەردىڭ بۇرىنعىداي بەلسەندىلىگى بايقالمايدى. مىسالى، 2025 جىلى قورعا 54 679 020 961 تەڭگە تۇسكەن، ەڭ ءىرى دونور «ءساتتى جۇلدىز» لوتورەياسى مەن «سامۇرىق قازىنا» قورى. ەكەۋى دە زاڭمەن مىندەتتەلگەن سوڭ اۋدارىپ وتىر. ءبىر قىزىعى قورعا 1,5,10 تەڭگەدەن تۇراقتى اقشا اۋدارىپ تۇراتىن قايىرىمدى جاندار بار ەكەن.

نەگىزى قورعا قاتىستى ەڭ باستى سۇراقتاردىڭ ءبىرى – قوردىڭ اقشاسى قايدا جاتىر؟ جينالعان قارجى قاي بانكتىڭ دەپوزيتىندە قانداي پايىزبەن جاتىر؟ ال دەپوزيتتەن تۇسكەن ديۆيدەند بار ما؟ بار بولسا، قانشا؟

ول تابىس قاي جوبالارعا جۇمسالىپ جاتىر؟ 2022 جىلدان بەرى بانكتەردە قانشا قارجى «جاتىپ قالعان»؟ بۇل سۇراقتاردىڭ جاۋابى PDF-ەسەپتەردىڭ ىشىندە دە ناقتى، تۇسىنىكتى تۇردە بەرىلمەيدى. قاراپايىم تىلمەن ايتقاندا، اقشا بار ەكەنىن بىلەمىز، بىراق ونىڭ قوزعالىسىن تولىق كورمەيمىز.

ايتپاقشى، 2025 جىلدىڭ قاڭتارىندا قوردىڭ باسقارما توراعاسى اۋىستى. جاڭا باسشى بولىپ لاززات چينكيسباەۆا حانىم كەلدى. لاززات حانىمدى بۇعان دەيىن جاۋاپتى قىزمەتتە بولعان، ىسكەر ادام رەتىندە بىلەمىز. الايدا ءبىر جىل ىشىندە جۋرناليستەرگە اشىق بريفينگى وتكىزىپ، قوردىڭ قوعامعا ەسەپ بەرگەنىن ءوزىم كورمەدىم (جامىشەۆتىڭ كەزىندە ءار جارتى جىل سايىن جۋرناليستەرمەن كەزدەسىپ، قويعان ءار سۇراققا جاۋاپ بەرەتىن). ءبىر جىلدا پرەزيدەنت تە قابىلدامادى. تەك كوپشىلىكتىڭ ەسىندە قالعانى – قىمبات برەند پيدجاك تۋرالى ينفوپوۆود قانا...

مۇنى نەگە جازىپ وتىرمىن؟ «قازاقستان حالقىنا» – جاي عانا قايىرىمدىلىق قورى ەمەس. ول – ءىرى ۇلتتىق كومپانيالار مەن جۇيە قۇراۋشى سەكتوردان جينالعان اقشالاي رەسۋرس. ول رەسۋرستىڭ قايدا، قالاي جانە قانشا جۇمسالىپ وتىرعانىن حالىق ءبىلۋى كەرەك. سوندىقتان قورعا جۋرناليستەرگە شىعىپ، ءبىر بريفينگ بەرىپ جينالىپ قالعان سۇراقتارعا جاۋاپ بەرەتىن ۋاقىت كەلگەن سياقتى...

اينۇر بەكوۆا

Abai.kz