2025 جىلدىڭ قاراشا ايىندا دروندار سوققىسىنا ۇشىراعان «كاسپي قۇبىر كونسورتسيۋمى» تەڭىز تەرمينالىنداعى سىرتقى ايلاق قۇرىلعىسىن قالپىنا كەلتىرۋ مۇمكىن ەمەس. ءدال وسى شابۋىلدىڭ سالدارىنان قازاقستان مۇنايىنىڭ ەكسپورتى كۇرت تومەندەدى، دەپ حابارلايدى Ulysmedia.kz.

قۇرىلعىنىڭ جاعدايى

كونسورتسيۋمنىڭ باس ديرەكتورى نيكولاي گوربان نوۆوروسسيسكىدەگى تەڭىز تەرمينالىنا بارىپ، ايلاق قۇرىلعىلارىنىڭ جاعدايىن تەكسەردى. ول ۆپۋ-2 قۇرىلعىسىنىڭ (ۆىنوسنوە پريچالنوە ۋسترويستۆو — سىرتقى ايلاق قۇرىلعىسى) قاراشاداعى درون شابۋىلىنان كەيىن قايتا ىسكە قوسىلۋى مۇمكىن ەمەستىگىن ايتتى.

29 قاراشا كۇنى قۇرىلعىنى ۇشقىشسىز كاتەر ارقىلى جاسالعان تەرروريستىك شابۋىل زاقىمداعان. زاقىمدانۋ دەڭگەيى قۇرىلعىنى ءارى قاراي پايدالانۋعا جول بەرمەيدى. قازىر بۇلىنگەن ايلاق دەمونتاجدالادى، بولاشاقتا ونى الماستىرۋ مۇمكىندىگى قاراستىرىلۋى ىقتيمال، بىراق ناقتى مەرزىمى بەلگىسىز.

جوسپارلانعان جوندەۋدىڭ سوزىلۋى

ال ۆپۋ-3 قۇرىلعىسى ءالى دە جوسپارلى جوندەۋدە. بۇل جۇمىستاردى 2025 جىلدىڭ جەلتوقسانىندا اياقتاۋ جوسپارلانعان ەدى، الايدا ءبىر ايدان استام ۋاقىت وتسە دە قۇرىلعى ىسكە قوسىلعان جوق. قازاقستان مۇنايىن تۇراقتى ەكسپورتتاۋ ءۇشىن كەمىندە ەكى ايلاق جۇمىس ىستەۋى ءتيىس، ال قازىر تەك ۆپۋ-1 عانا جۇمىس ىستەپ تۇر.

كتك وكىلدەرى ۆپۋ-3 جوندەۋىندە «سوڭعى دايىندىق شارالارى» ءجۇرىپ جاتقانىن ايتتى. جوندەۋ جۇمىستارى اۋا رايىنىڭ قولايسىزدىعىنا بايلانىستى ۇزاققا سوزىلعان، سەبەبى سۋ استىنداعى شلانگىلەر مەن جۇك جۇيەسىنىڭ تۇتىكتەرىن اۋىستىرۋ قيىنعا سوققان.

كونسورتسيۋمنىڭ مالىمەتى

«بارلىق نىساندار مەن جابدىقتار ءتيىستى جاعدايدا. قىزمەتكەرلەر مەن مەردىگەر ۇيىمداردىڭ وكىلدەرى تاپسىرمالاردى ورىنداۋدا جاۋاپكەرشىلىك تانىتىپ، كاسىبي دەڭگەيىن كورسەتىپ وتىر»، — دەپ مالىمدەدى «كاسپي قۇبىر كونسورتسيۋمى». دەگەنمەن ناقتى مەرزىم ءالى بەلگىسىز. بۇل قازاقستان مۇنايىنىڭ نەگىزگى باعىتتاعى ەكسپورتىنىڭ تۇراقسىزدىعىن كورسەتەدى.

ەكسپورتقا قاۋىپ

سونىمەن قاتار، قازاقستان 600–700 مىڭ توننا مۇنايدى ەكسپورتتاي الماي، پايدادان قاعىلاتىنى بەلگىلى بولدى. بۇعان 18 قاڭتاردا ترانسفورماتوردا شىققان ءورت سەبەپ بولعان. وقيعا ەلەكترمەن جابدىقتاۋداعى اقاۋعا جانە ءوندىرىستىڭ توقتاۋىنا اكەلدى. مۇناي ءوندىرۋ اقپان ايىنا دەيىن توقتاپ تۇرۋى مۇمكىن.

Abai.kz