«اق جول» دەموكراتيالىق پارتياسى مەملەكەت باسشىسى اتا زاڭعا ەنگىزۋدى ۇسىنعان كونتسەپتۋالدى وزگەرىستەردى قولدايدى. بۇل تۋرالى پارتيانىڭ فراكتسياسىن باسقاراتىن ءماجىلىس دەپۋتاتى ازات پەرۋاشەۆ كونستيتۋتسيالىق رەفورما جونىندەگى كوميسسيانىڭ العاشقى وتىرىسىندا مالىمدەدى.

ول كۇنى-كەشە پارتيانىڭ ۇلتتىق كەڭەسىنىڭ پلەنۋمى ءوتىپ، وندا V ۇلتتىق قۇرىلتايدىڭ قورىتىندىلارى مەن قر پرەزيدەنتى قاسىم-جومارت توقاەۆتىڭ كونستيتۋتسيالىق رەفورما جونىندەگى باستامالارى تالقىلانعانىن حابارلادى.

«وسى رەتتە پارتيا توراعاسى رەتىندە ماعان كونستيتۋتسيالىق كوميسسيا مۇشەلەرىنە «اق جول» مەملەكەت باسشىسى ۇسىنعان كونستيتۋتسيانىڭ تۇجىرىمدامالىق وزگەرىستەردى قولدايتىنىن بايانداۋ تاپسىرىلدى»، – دەدى ازات پەرۋاشەۆ. 

سونىمەن قاتار ول ۇلتتىق بيزنەس پەن ونەركاسىپپەن اينالىساتىنداردىڭ مۇددەلەرىن بىلدىرە وتىرىپ، «اق جول» ازاماتتار مەن كاسىپكەرلەردىڭ زاڭدى مۇددەلەرىن قورعاۋدىڭ كونستيتۋتسيالىق كەپىلدىكتەرىن كۇشەيتۋ قاجەتتىگىنە ەرەكشە نازار اۋدارۋدى ۇسىنادى.

«مىسالى، بانك وپەراتسيالارى مەن سالىمداردىڭ قۇپياسىن بۇزۋ جاعدايلارى الاڭداۋشىلىق تۋعىزادى. ءبىزدىڭ ويىمىزشا، وسىلايشا ازاماتتار مەن بيزنەستىڭ قارجىلىق جاعدايى تۋرالى دەربەس دەرەكتەردىڭ جەتكىلىكسىز قورعالۋى بايقالادى، بۇل جاپپاي تسيفرلاندىرۋ جانە دەرەكتەردىڭ تاراپ كەتۋى داۋىرىندە وتە قولايسىز بولىپ وتىر»، - دەپ اتاپ ءوتتى ازات پەرۋاشەۆ.

ونىڭ ايتۋىنشا، كونستيتۋتسيالىق قۇقىقتا كاسىپكەرلىك كەپىلدىكتەر مەن بوستاندىقتار ماسەلەلەرىن شەشۋگە كەشەندى كوزقاراس قاجەت. بۇل سونداي-اق مەملەكەت باسشىسىنىڭ بيزنەستى قولداۋدى كۇشەيتۋ جانە وتكەن جىلدىڭ قىركۇيەك ايىندا حالىققا جولداۋىندا ايتىلعان ينۆەستيتسيالاردى قورعاۋ جونىندەگى ارنايى كوميتەت قۇرۋ جونىندەگى تاپسىرمالارىمەن ۇندەسەدى. 

«اق جول» دەموكراتيالىق پارتياسى بانكتىك قۇپيانى، جەكە جانە ىسكەرلىك كەلىسسوزدەردى، سونداي-اق تسيفرلىق تەحنولوگيالاردى قوسا العاندا، كەز كەلگەن بايلانىس قۇرالدارىمەن بەرىلەتىن حات-حابارلاردى كونستيتۋتسيالىق قورعاۋدى كۇشەيتۋدى ۇسىنادى. بۇل ازاماتتار مەن بيزنەستىڭ جەكە مەنشىك قۇقىعىن قورعاۋدىڭ كونستيتۋتسيالىق كەپىلدىكتەرىن كۇشەيتۋدىڭ ماڭىزدى ەلەمەنتى بولادى»، - دەپ تۇيىندەدى ازات پەرۋاشەۆ.

Abai.kz