سەنبى كۇنى ۇكىمەتتە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن جيىندا الەۋمەتتىك ماڭىزى بار ازىق-تۇلىك تاۋارلارى باعاسىنىڭ ءبىر اپتاداعى جاعدايى قارالدى.

الەۋمەتتىك ماڭىزى بار ازىق-تۇلىك تاۋارلارى بويىنشا ورتاشا باعا ءوسىمىنىڭ يندەكسى اپتا قورىتىندىسى بويىنشا ءنول دەڭگەيىندە ساقتالدى. الما (-2,1%), قيار مەن پياز (-1,3%), شاي (-0,9%), بالىق پەن تاۋىق ەتى (-0,6%) جانە باسقا دا ازىق-تۇلىك ونىمدەرىنىڭ باعاسى ارزانداعان. ماۋسىمدىق فاكتورعا بايلانىستى وزگەدەي الەۋمەتتىك ماڭىزى بار كوكونىستەر بويىنشا باعا قۇبىلمالى بولدى.

ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ ايتۋىنشا، ەرتە پىسكەن ءونىمدى جەتكىزۋدى قامتاماسىز ەتۋ بويىنشا قابىلدانعان باسقا دا شارالاردان بولەك، ساۋدا جانە ينتەگراتسيا مينيسترلىگى بيىلعى ءساۋىر-ماۋسىم ايلارى ارالىعىندا ءۇشىنشى ەلدەردەن كوكونىستەردى باجسىز اكەلۋ تۋرالى ۇسىنىستى ەاەو كەڭەسىنىڭ قاراۋىنا شىعارۋ تۋرالى باستاما كوتەرىپ وتىر.

جيىن بارىسىندا ۆيتسە-پرەمەر استانا جانە الماتى قالالارى اكىمدەرى ورىنباسارلارىنىڭ وڭىردەگى قازىرگى باعا جانە ەكونوميكالىق جاعداي تۋرالى باياندامالارىن جەكە-جەكە تىڭدادى.

ەلوردادا ازىق-تۇلىك ينفلياتسياسىنىڭ باياۋلاۋ ءۇردىسى تۇراقتى ساقتالۋدا. 2025 جىلدىڭ قورىتىندىسى بويىنشا الەۋمەتتىك ماڭىزى بار ازىق-تۇلىك تاۋارلارىنىڭ ورتاشا باعا يندەكسى 107,4%-دى قۇرادى، بۇل – ەل بويىنشا ەڭ تۇراقتى كورسەتكىشتەردىڭ ءبىرى.

باعانىڭ ءوسۋىن تەجەۋ ازىق-تۇلىك تاۋارلارى بويىنشا ۋاقتىلى كەلىسىمشارتتار جاساۋ ناتيجەسىندە مۇمكىن بولىپ وتىر. ونىمدەر ەلورداداعى 180-نەن استام ساۋدا نۇكتەسىندە ساتىلادى. ءىرى ساۋدا جەلىلەرىمەن الەۋمەتتىك ماڭىزى بار تاۋارلارعا ساۋدا ۇستەمەسىن شەكتەۋ جونىندە كەلىسىمدەر جاسالعان.

سونىمەن قاتار باعا قالىپتاستىرۋداعى دەلدالدىق سحەمالاردى انىقتاۋ جانە جارمەڭكەلىك ساۋدانى دامىتۋ بويىنشا جۇمىس جۇرگىزىلۋدە. 2026 جىلى استانادا 300-دەن استام دەمالىس كۇنگى جارمەڭكە وتكىزۋ جوسپارلانۋدا. جالپى ەل بويىنشا شامامەن 10 مىڭ جارمەڭكە ۇيىمداستىرىلماق.

الماتى قالاسىندا 2025 جىلدىڭ قورىتىندىسى بويىنشا الەۋمەتتىك ماڭىزى بار ازىق-تۇلىك تاۋارلارىنىڭ باعا يندەكسى 8,9%-دى، ال بيىلعى جىلدىڭ باسىنان بەرى 0,2%-دى قۇرادى. ەت جانە ءسۇت ونىمدەرىنىڭ نەگىزگى تۇرلەرىنە باعا تۇراقتى دەڭگەيدە ساقتالىپ وتىر، ال تاۋىق ەتى مەن كەيبىر ءسۇت ونىمدەرى ارزانداعان.

باعانىڭ ءوسۋى نەگىزىنەن كوكونىستەردىڭ جەكەلەگەن تۇرلەرى مەن باكالەيا ونىمدەرىنە تيەسىلى، بۇل رەتتە الماتىدا قىرىققابات پەن قاراقۇمىق جارماسىنىڭ باعاسى ەل بويىنشا ورتاشا كورسەتكىشتەن تومەن. باعانى ودان ءارى تۇراقتاندىرۋ ءۇشىن تىكەلەي جەتكىزىپ بەرۋ جەلىسىن كەڭەيتۋ، دەمالىس كۇنگى جارمەڭكەلەر اۋقىمىن ارتتىرۋ جانە قالاداعى ساۋدا جەلىلەرى مەن بازارلاردا كۇندەلىكتى باعا مونيتورينگىن كۇشەيتۋ جۇمىستارى جۇرگىزىلۋدە.

جيىن قورىتىندىسى بويىنشا سەرىك جۇمانعارين اۋماقتىق ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتتەرىنە وڭىرلەردەگى جۇمىستى كۇشەيتۋدى جانە الەۋمەتتىك ماڭىزى بار ازىق-تۇلىك تاۋارلارىنا بەلگىلەنگەن شەكتى ساۋدا ۇستەمەسىنىڭ ساقتالۋىن تەكسەرۋدى جانداندىرۋدى تاپسىردى.

ايتا كەتەيىك، بۇعان دەيىن باعاسى باقىلاناتىن ازىق-تۇلىك سانى 31-گە جەتكەن ەدى.

Abai.kz