استانادا ءۇندىستان رەسپۋبليكاسىنىڭ 77 جىلدىعىنا ارنالعان رەسمي قابىلداۋ ءوتتى. ءىس-شارا بارىسىندا ءۇندىستاننىڭ قازاقستانداعى توتەنشە جانە وكىلەتتى ەلشىسى يۋ.ك. سايلاس تانگال ەكىجاقتى ىنتىماقتاستىقتىڭ نەگىزگى باعىتتارىن اتاپ ءوتىپ، قازاقستاندىقتارعا قاتىستى ماڭىزدى شەشىمدى جاريالادى.

ەلشىنىڭ ايتۋىنشا، ءۇندىستان ۇكىمەتى قازاقستان ازاماتتارىنا تۋريستىك جانە مەديتسينالىق ماقساتتارمەن، سونداي-اق ىلەسىپ جۇرەتىن تۇلعالار ءۇشىن 30 كۇنگە دەيىنگى مەرزىمگە تەگىن ۆيزا بەرۋ تۋرالى شەشىم قابىلداعان.

«ەكىجاقتى ءتۋريزمدى ىنتالاندىرۋ ماقساتىندا ءۇندىستان ۇكىمەتى قازاقستان ازاماتتارىنا 30 كۇنگە دەيىنگى مەرزىمگە تەگىن ۆيزا بەرۋ تۋرالى شەشىم قابىلدادى»، – دەدى ديپلومات.

ونىڭ سوزىنشە، ۆيزانى ونلاين فورماتتا دا، سونداي-اق ءۇندىستان ەلشىلىگى ارقىلى تىكەلەي راسىمدەۋگە بولادى.

سونىمەن قاتار ەلشى تۋريستىك الماسۋدىڭ ارتىپ كەلە جاتقانىن اتاپ ءوتتى. ءۇندى تاراپتىڭ باعالاۋىنشا، 2025 جىلى قازاقستانعا كەلگەن ءۇندى تۋريستەرىنىڭ سانى شامامەن 250 مىڭ ادامعا جەتكەن.

ءسوز بارىسىندا يۋ.ك. سايلاس تانگال ءۇندىستاننىڭ بۇگىندە الەمدەگى ءتورتىنشى ەڭ ءىرى ءارى ەڭ جىلدام دامىپ كەلە جاتقان ەكونوميكالاردىڭ ءبىرى ەكەنىن ايتتى. ەل IT, جاساندى ينتەللەكت، فينتەح، فارماتسەۆتيكا جانە تسيفرلىق ينفراقۇرىلىم سالالارىندا تۇراقتى ءوسىم كورسەتىپ وتىر.

بۇدان بولەك، ەلشى ءۇندىستان مەن قازاقستان اراسىنداعى ستراتەگيالىق ارىپتەستىكتىڭ نىعايىپ كەلە جاتقانىن اتاپ ءوتتى. ونىڭ ايتۋىنشا، ەكى مەملەكەت شىۇ، بريكس، اوسشك، بۇۇ جانە «ءۇندىستان – ورتالىق ازيا» ديالوگى اياسىندا تىعىز ىنتىماقتاستىق ورناتقان.

سونداي-اق ەكىجاقتى ساۋدا كولەمى شامامەن 1 ملرد اقش دوللارىن قۇرايتىنى ايتىلىپ، بۇل كورسەتكىشتىڭ الەۋەتى الدەقايدا جوعارى ەكەنى اتاپ ءوتىلدى.

ءىس-شارا سوڭىندا ءۇندىستان ەلشىسى بارشا قوناقتى رەسپۋبليكا كۇنىمەن قۇتتىقتاپ، ەكى ەل اراسىنداعى ىنتىماقتاستىق الداعى ۋاقىتتا دا دامي بەرەتىنىنە سەنىم ءبىلدىردى.

ايتا كەتەيىك، ءۇندىستاندا بەتى بۇركەنگەن ادامدارعا زەرگەرلىك دۇكەندەرگە كىرۋگە تىيىم سالىندى.

Abai.kz