ءماجىلىس دەپۋتاتى مۇقاش ەسكەندىروۆ پرەمەر-ءمينيستردىڭ ءبىرىنشى ورىنباسارى رومان سكليارعا دەپۋتاتتىق ساۋال جولداپ، تۇرعىن ۇيمەن قامتاماسىز ەتۋ سالاسىندا قوردالانعان بىرقاتار پروبلەمانى كوتەردى.

دەپۋتاتتىڭ ايتۋىنشا، باسپانامەن قامتۋ – الەۋمەتتىك تۇراقتىلىقتى ساقتاۋدىڭ، ازاماتتاردىڭ ءومىر ءسۇرۋ ساپاسىن ارتتىرۋدىڭ جانە حالىقتىڭ ءال-اۋقاتىن جاقسارتۋدىڭ نەگىزگى تەتىكتەرىنىڭ ءبىرى.

ءماجىلىس دەپۋتاتتارىنىڭ جامبىل وبلىسىن ارالاۋ بارىسىندا تۇرعىندار تۇرعىن ۇيگە قاتىستى بىرقاتار تۇيتكىلدى ماسەلەنى كوتەردى، – دەدى مۇقاش ەسكەندىروۆ.

كوممۋنالدىق تۇرعىن ءۇي: كەزەك كوپ، پاتەر از

دەپۋتاتتىڭ مالىمەتىنشە، جامبىل وبلىسىندا كوممۋنالدىق تۇرعىن ءۇي قورىنان پاتەر الۋ كەزەگىندە 57 434 ازامات تىركەلگەن. 2025 جىلى الەۋمەتتىك وسال توپتارعا ارنالعان جالدامالى تۇرعىن ءۇي ساتىپ الۋ ءۇشىن رەسپۋبليكالىق بيۋدجەتتەن 21,5 ملرد تەڭگە ءبولىنىپ، 1 425 پاتەر الىنعان.

الايدا، قولدانىستاعى زاڭناماعا ەنگىزىلگەن وزگەرىستەرگە بايلانىستى بۇل پاتەرلەردى مۇقتاج ازاماتتارعا دەر كەزىندە ۇلەستىرۋدە قيىندىقتار تۋىنداپ وتىر.

بۇرىن جەرگىلىكتى اتقارۋشى ورگاندار اتقارعان فۋنكتسيالار «تۇرعىن ءۇي قۇرىلىسى جيناق» بانكىنە بەرىلىپ، ازاماتتاردى تۇرعىن ۇيگە مۇقتاج رەتىندە ەسەپكە قويۋ ەلەكتروندىق بازا ارقىلى اۆتوماتتى تۇردە جۇرگىزىلە باستادى.

وسىعان بايلانىستى كەلىسۋ وتىنىشتەرىنە ۋاقىتىلى جاۋاپ بەرىلمەۋى جانە ازاماتتاردىڭ دەرەكتەرىنىڭ جاڭارتىلماۋى سالدارىنان باسپانامەن قامتاماسىز ەتۋ جۇمىستارى سوزىلىپ كەتكەن. قازىرگى تاڭدا كەزەكتە تۇرعان 57 434 ازاماتتىڭ تەك 10%-ىنىڭ دەرەكتەرى عانا جاڭارتىلعان، - دەيدى ەسكەندىروۆ.

دەپۋتات بۇل جاعدايدى ءتۇسىندىرۋ جۇمىستارىنىڭ جەتكىلىكسىزدىگىمەن جانە ازاماتتاردىڭ ەلەكتروندىق تسيفرلىق قولتاڭبانى پايدالانۋ بارىسىندا قيىندىققا تاپ بولۋىمەن بايلانىستىرادى.

وسىعان وراي مۇقاش ەسكەندىروۆ بانككە زاڭناماداعى وزگەرىستەردى الدىن الا ءتۇسىندىرۋ جۇمىستارىن كۇشەيتىپ، ازاماتتاردىڭ دەرەكتەرىن جەدەل تۇردە جاڭارتۋدى ۇسىندى.

يپوتەكالىق تۇرعىن ۇيلەردىڭ ساتىلۋى تەجەلىپ وتىر

دەپۋتاتتىق ساۋالدا جەڭىلدەتىلگەن يپوتەكالىق تۇرعىن ۇيلەردى ساتۋ ماسەلەسى دە كوتەرىلدى. ونەركاسىپ جانە قۇرىلىس ءمينيسترىنىڭ بۇيرىعىنا سايكەس، يپوتەكالىق تۇرعىن ۇيلەردىڭ كەمىندە 70%-ى الەۋمەتتىك وسال توپتاعى ازاماتتارعا، 20%-ى جەتىم بالالار مەن اتا-اناسىنىڭ قامقورلىعىنسىز قالعان بالالارعا، ال قالعان 10%-ى باسقا كەزەكتە تۇرعان ازاماتتارعا ۇسىنىلۋى ءتيىس.

الايدا دەپۋتاتتىڭ ايتۋىنشا، بۇل تالاپ پاتەرلەردىڭ ۋاقىتىلى ساتىلۋىنا كەدەرگى كەلتىرىپ وتىر.

مىسالى، 2025 جىلى تاراز قالاسىندا ساتىلىمعا شىعارىلعان 706 پاتەردىڭ تەك 588-ءى عانا ازاماتتاردىڭ تولەم قابىلەتىنىڭ راستالماۋىنا بايلانىستى بەرىلگەن. ال 2026 جىلى تاراز قالاسىندا 1 278 پاتەردەن تۇراتىن 29 كوپقاباتتى تۇرعىن ءۇي پايدالانۋعا بەرىلىپ، ساتىلىمعا شىعارىلماق.

ەگەر زاڭناماعا سايكەس بۇل پاتەرلەردىڭ 70 پايىزى الەۋمەتتىك وسال توپتاعى ازاماتتارعا ۇسىنىلسا، وتكەن جىلعى جاعدايدىڭ قايتا قايتالانۋ قاۋپى بار، – دەدى دەپۋتات.

قازىرگى تاڭدا جامبىل وبلىسىندا تۇرعىن ءۇي كەزەگىندە تۇرعان 31 055 ازامات نەمەسە 54% الەۋمەتتىك وسال توپقا جاتادى.

دەپۋتاتتىڭ پىكىرىنشە، وسال توپتاعى ازاماتتاردىڭ تولەم قابىلەتىنىڭ تومەندىگى پاتەرلەردىڭ ۋاقىتىندا ساتىلماۋىنا جانە جەرگىلىكتى اتقارۋشى ورگانداردىڭ وبليگاتسيالىق قارىزدارىن وتەۋىنە كەرى اسەر ەتۋى مۇمكىن.

دەپۋتات قانداي ۇسىنىس ايتتى؟

وسىعان بايلانىستى مۇقاش ەسكەندىروۆ ۇكىمەتكە:

• الەۋمەتتىك وسال توپتارعا ساتىلاتىن پاتەرلەردىڭ ۇلەسىن 70%-دان 50%-عا دەيىن تومەندەتۋدى
• يپوتەكالىق تۇرعىن ءۇي قارىزدارىن بەرۋ شارتتارىن جەڭىلدەتۋ مۇمكىندىگىن قاراستىرۋدى ۇسىندى.

Abai.kz