زاڭ مەن ءتارتىپتى ساقتاعان ەلدەر الەمدەگى ەڭ قاۋىپسىز مەملەكەتتەر قاتارىندا – جەڭىس قاسىمبەك
كونستيتۋتسياعا ەنەتىن جاڭا وزگەرىستەردە «حالىق ۇنىنە قۇلاق اساتىن مەملەكەت»، «زاڭ مەن ءتارتىپ»، «تازا قازاقستان» سىندى نەگىزگى يدەيالىق قاعيداتتاردى نورماتيۆتىك تۇرعىدا بەكىتۋ كوزدەلگەن. بۇل تۋرالى كونستيتۋتسيالىق كوميسسيا مۇشەسى، استانا قالاسىنىڭ اكىمى جەڭىس قاسىمبەك ايتتى.
«اتا زاڭىمىزداعى «زاڭ مەن ءتارتىپ» قاعيداتى – ادىلەتتى قازاقستان يدەياسىن نىعايتۋدىڭ نەگىزگى شەشىمى دەپ سانايمىن. بۇگىندە الەم جۇرتى قازاقستاندى ازاماتتاردىڭ قۇقىعى مەن بوستاندىقتارىن مۇلتىكسىز ساقتاۋعا ايرىقشا باسىمدىق بەرەتىن ەل دەپ تانيدى. بۇل باستاما بولاشاق ۇرپاق ءۇشىن بىرلىك پەن ىنتىماقتى، ەتنوسارالىق جانە كونفەسسياارالىق كەلىسىمدى ودان ءارى ساقتاۋدىڭ بەرىك ىرگەتاسىنا اينالادى»، – دەدى جەڭىس قاسىمبەك كونستيتۋتسيالىق رەفورمالار كوميسسياسىنىڭ V وتىرىسىندا.
ەلوردا اكىمى كوپتەگەن ەلدە دامۋدىڭ نەگىزگى فاكتورى زاڭ ۇستەمدىگى مەن ءتارتىپتىڭ ساقتالۋىمەن بايلانىستى ەكەنىن اتاپ ءوتتى. ازاماتتارى ءوزىنىڭ زاڭ الدىنداعى قاتاڭ جاۋاپكەرشىلىگىن تۇسىنەدى جانە زاڭ مەن تارتىپكە باعىنۋ مادەنيەتىن قاتاڭ ۇستانادى. مۇنداي ەلدەر الەمدەگى ەڭ قاۋىپسىز مەملەكەتتەردىڭ قاتارىندا، ال ادامدارى مەملەكەتتىك ينستيتۋتتارعا تولىقتاي سەنەدى.
2023 جىلى مەملەكەت باسشىسى كوتەرگەن «تازا قازاقستان» يدەياسى دا ەل ازاماتتارىنىڭ ءومىر سالتىنا اينالدى.
«بۇل قاعيداتتى نەگىزگى پوستۋلاتتاردىڭ ءبىرى رەتىندە ەنگىزۋ – ازاماتتاردىڭ قورشاعان ورتا مەن بولاشاق ۇرپاق الدىنداعى جاۋاپكەرشىلىگىن قالىپتاستىرادى. «تازا قازاقستان» – تەك قورشاعان ورتاعا قامقورلىق قانا ەمەس: وي مەن ءسوزدىڭ تازالىعى، ءىس-ارەكەتتەگى جاۋاپكەرشىلىك، زاڭعا جانە قوعامدىق قۇندىلىقتارعا دەگەن قۇرمەت، كۇندەلىكتى ومىردە مادەنيەتتى ساقتاۋ دەگەن ءسوز»، – دەدى جەڭىس قاسىمبەك.
سونىمەن بىرگە، جەڭىس قاسىمبەك ءار ادامدى قۇندىلىق رەتىندە باعالايتىن «حالىق ۇنىنە قۇلاق اساتىن مەملەكەت» قاعيداسىنا دا ەرەكشە توقتالدى.
«جەرگىلىكتى مەملەكەتتىك ورگاندار جۇمىسىنىڭ جەمىستى بولۋى – حالىقپەن جۇيەلى بايلانىستى تالاپ ەتەدى. تاجىريبە كورسەتكەندەي تۇرعىندارمەن تۇراقتى جانە كونسترۋكتيۆتى ديالوگ ورناتۋ – ايماقتاردى كەشەندى دامىتۋداعى نەگىزگى فاكتوردىڭ ءبىرى. وسىعان وراي اتالعان ۇسىنىستاردىڭ بەكىتىلۋىن قولدايمىن»، – دەدى جەڭىس قاسىمبەك.
Abai.kz
