مەملەكەت باسشىسى بيزنەس وكىلدەرى كورپوراتيۆتىك ۆولونتەرلىك قىزمەتكە نازار اۋدارىپ، وسى باعىتتاعى جوبالارعا قولداۋ كورسەتۋى ءتيىس دەپ سانايدى.

سونداي-اق، قاسىم-جومارت توقاەۆ ەلىمىزدە وتانشىل ازاماتتارعا ارنالعان "مەيىرىم" وردەنى تاعايىندالعانىن جەتكىزدى.

"كورپوراتيۆتىك ەرىكتىلەر قوزعالىسىن دامىتۋ – وتە ماڭىزدى مىندەت. بيزنەس الەۋمەتتىك جاۋاپكەرشىلىكتى سەزىنە بىلۋگە ءتيىس. مەملەكەتىمىز ۇلتتىق بۋرجۋازيانى ۇنەمى قولداۋدا، ال ءبىزدىڭ كاسىپكەرلەر حالقىمىزعا قامقور بولىپ، ءاردايىم كومەكتەسۋى كەرەك.

تاريحتا مۇنداي مىسالدار از ەمەس. باقۋاتتى ازاماتتار مەكتەپ سالىپ، وقۋ-اعارتۋ ءىسىن دامىتۋعا ۇلەس قوسقان. كىتاپتار، گازەت-جۋرنالدار شىعارۋعا، حالىقتىڭ ساۋاتىن اشۋعا زور ەڭبەك سىڭىرگەن. ءبىر سوزبەن ايتقاندا، ۇلتتىڭ بويىندا، بولمىسىندا جاڭا قاسيەتتەر قالىپتاستىرۋعا بەلسەنە اتسالىسقان.

قازىر دە كوپتەگەن جومارت جاندى ازاماتتارىمىز بار. ولار قايىرىمدىلىق جانە باسقا دا الەۋمەتتىك ماڭىزى بار شارالارعا ەرىكتىلەردى كوپتەپ تارتاتىن بولدى.

بيزنەس وكىلدەرى كورپوراتيۆتىك ۆولونتەرلىك قىزمەتكە نازار اۋدارىپ، وسى باعىتتاعى جوبالارعا بارىنشا قولداۋ كورسەتۋى كەرەك. قىزمەتكەرلەردىڭ قوعامدىق جۇمىسقا بەلسەنە اتسالىسۋىنا جاعداي جاساۋى قاجەت.

مەملەكەت جۇرتقا جاقسىلىق جاساپ، قوعامدىق ىستەرگە ۇيىتقى بولىپ جۇرگەن كاسىپكەرلەردى قولدايدى.

سوندىقتان مەن بىلتىر ارنايى "مەيىرىم" وردەنىن تاعايىنداۋ تۋرالى شەشىم قابىلدادىم. بۇل ماراپات حالىقتىڭ قامىن ويلايتىن وتانشىل ازاماتتارعا دەگەن شىنايى قۇرمەتتىڭ بەلگىسى بولماق", – دەپ مالىمدەدى مەملەكەت باسشىسى قاسىم-جومارت توقاەۆ.

Abai.kz