اقش-تىڭ ادىلەت مينيسترلىگى ەپشتەين ىسىنە قاتىستى 3 ميلليوننان استام قوسىمشا بەت ماتەريالدى جاريالادى. قۇجاتتاردىڭ بىرىندەگى حات-حابار الماسۋدا قازاقستان ۇلتتىق بانكىنىڭ بۇرىنعى توراعاسى قايرات كەلىمبەتوۆتىڭ ەسىمى تاعى دا اتالادى، دەپ حابارلايدى Ulysmedia.kz.

جاريالانعان ماتەريالداردىڭ ىشىندە 2 مىڭنان استام بەينەماتەريال مەن 180 مىڭعا جۋىق سۋرەت بار. بۇعان دەيىن اشىق شىققان دەرەكتەرمەن قوسا ەسەپتەگەندە، جاريالانعان قۇجاتتاردىڭ جالپى كولەمى شامامەن 3,5 ميلليون بەتكە جەتتى. ماتەريالداردى جاريالاۋ جۇمىسىنا 500-دەن استام زاڭگەر مەن مامان تارتىلعان.

سونىمەن قاتار نيۋ-يوركتىڭ وڭتۇستىك وكرۋگى پروكۋراتۋراسى سوتتىڭ تالابىن ورىنداۋ ءۇشىن قوسىمشا تەكسەرۋ حاتتاماسىن قولدانعان. بۇل تالاپقا سايكەس، اشىق جاريالانعان ماتەريالداردا جابىرلەنۋشىلەردىڭ جەكە باسىن انىقتاۋعا مۇمكىندىك بەرەتىن قورعالماعان اقپارات بولماۋى ءتيىس.

جاريالانعان قۇجاتتارعا سايكەس، قايرات كەلىمبەتوۆ دجەففري ەپشتەينمەن 2014 جىلدىڭ قازان ايىندا نيۋ-يوركتە كەزدەسكەن. 2014 جىلعى حاتتاردىڭ بىرىندە حات جولداۋشى ەپشتەيننەن: «ماسىموۆكە جەتكىزگىم كەلەتىن قانداي دا ءبىر نارسە بار ما؟» دەپ سۇرايدى. ەپشتەين ءوز جاۋابىندا ءۇشىنشى ادام ارقىلى نيۋ-يوركتە «جاقسى ۋاقىت وتكىزگەن» كەلىمبەتوۆكە «قۇشاعىن جولداۋعا» بولاتىنىن جازادى.

ايتا كەتەيىك، قايرات كەلىمبەتوۆتىڭ ەسىمى ەپشتەينگە قاتىستى قۇجاتتاردا 2025 جىلدىڭ قاراشاسىندا جاريالانعان ماتەريالداردا دا كەزدەسكەن.

ەسكە سالايىق، 2024 جىلدىڭ جازىندا قايرات كەلىمبەتوۆ Freedom Holding Corp. ديرەكتورلار كەڭەسىنىڭ قۇرامىنا ەندى.

ءار جىلدارى ول قازاقستان رەسپۋبليكاسىنىڭ ستراتەگيالىق جوسپارلاۋ اگەنتتىگىن (1999–2001), ەكونوميكا جانە بيۋدجەتتىك جوسپارلاۋ مينيسترلىگىن (2002–2006) باسقاردى. سونداي-اق «قازىنا» تۇراقتى دامۋ قورىن (2006–2008), كەيىن «سامۇرىق-قازىنا» ۇلتتىق ءال-اۋقات قورىن (2008–2011) باسقارعان. سونىمەن بىرگە پرەزيدەنت اكىمشىلىگىنىڭ باسشىسى (2008), ەكونوميكالىق دامۋ جانە ساۋدا ءمينيسترى (2011–2012), ۆيتسە-پرەمەر (2012–2013), ۇلتتىق بانك توراعاسى (2013–2015), احقو باسقارۋشىسى (2015–2023), ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى (2020–2022) قىزمەتتەرىن اتقارعان.

ەپشتەين ءىسى

وتكەن جۇما كۇنى اقش-تىڭ ادىلەت مينيسترلىگى قارجىگەر دجەففري ەپشتەيننىڭ ىسىنە قاتىستى وسى ۋاقىتقا دەيىنگى ەڭ اۋقىمدى ماتەريالدار توپتاماسىن جاريالادى. ول — سەكسۋالدىق قىلمىستار ءۇشىن سوتتالىپ، تۇرمەدە قازا تاپقان تۇلعا. ماتەريالدار «ەپشتەين فايلدارى» دەپ اتالاتىن اشىقتىق تۋرالى زاڭ اياسىندا جاريالانعان.

اقش بيلىگى بۇل دەرەكتەردىڭ بارلىعى ءىس بويىنشا سوڭعى ءارى تولىق اقپارات ەكەنىن ناقتىلاعان جوق.

سونىمەن قاتار، بۇعان دەيىن جاريالانعان قۇجاتتاردا قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ بۇرىنعى كۇيەۋ بالاسى راحات اليەۆتىڭ اقش-قا قونىس اۋدارۋعا كومەك سۇراپ، ەكى ميلليارد دوللاردى قايتارۋدى تالاپ ەتكەنى تۋرالى دا ايتىلعان. بۇل مالىمەتتەر 2025 جىلدىڭ قاراشاسىندا جارىق كورگەن دجەففري ەپشتەيننىڭ حاتتارىنان بەلگىلى بولعان.

Abai.kz