قۇرمەتتى دوستار!

ءبىز بۇگىندە ەلىمىزدىڭ الداعى دامۋ باعىتى ايقىندالاتىن تاريحي كەزەڭدە ءومىر ءسۇرىپ جاتىرمىز. جاڭا كونستيتۋتسيا جوباسىن تالقىلاۋ – مەملەكەتىمىزدىڭ قوعامدىق-ساياسي ومىرىندەگى اسا ماڭىزدى وقيعاعا اينالدى.

وكىنىشكە قاراي، كەيبىر الەۋمەتتتىك جەلى قولدانۋشىلارى جاعدايدى تەرىس ماقساتتا پايدالانىپ، ەلىمىزدەگى قوعامدىق-ساياسي احۋالدى تۇراقسىزداندىرۋعا باعىتتالعان ارەكەتتەرگە بارۋدا. ارانداتۋشىلار نەگىزسىز اقپارات تاراتىپ، جالعان پاراقشالار مەن اككاۋنتتار اشقان (مىسالى، مۇحتار شاحانوۆتىڭ، شاۆكات راحمونوۆتىڭ جانە وزگە دە تۇلعالاردىڭ اتىنان اشىلعان فەيك-اككاۋنتتار ارقىلى ءتىل، جەردى ساتۋ سەكىلدى ماسەلەلەر بويىنشا ارانداتۋشىلىق اقپارات پەن ۇندەۋلەر جاريالانۋدا).

سونداي-اق، ەلدە ءىرى ميتينگىلەر مەن جاپپاي نارازىلىق اكتسيالارى ءوتىپ جاتىر دەگەن جالعان حابارلار تاراتىلىپ، كونستيتۋتسيانىڭ جەكەلەگەن باپتارىن ادەيى بۇرمالاپ ءتۇسىندىرۋ فاكتىلەرى دە كەزدەسۋدە.

بۇدان بولەك، بۇقارالىق اقپارات قۇرالدارى مەن تانىمال پاراقشالارعا تەحنيكالىق شابۋىلدار جاسالىپ جاتقانى تۋرالى دا حابارلار ءتۇسىپ وتىر. قازىرگى ۋاقىتتا ۋاكىلەتتى ورگان رەتىندە ءبىز بۇل جاعدايدى جان-جاقتى زەردەلەپ، ءتيىستى شارالار قابىلداپ جاتىرمىز.

وسىعان بايلانىستى تەك رەسمي اقپارات كوزدەرىنە عانا سەنۋگە جانە جالعان مالىمەتتەردى تاراتپاۋعا شاقىرامىن. جالعان اقپارات تاراتۋ قىلمىستىق جانە اكىمشىلىك جاۋاپكەرشىلىككە اكەپ سوعادى.

ايدا بالاەۆا، قر مادەنيەت جانە اقپارات ءمينيسترى

Abai.kz