قر پرەزيدەنتى قاسىم-جومارت توقاەۆتىڭ پاكىستانعا مەملەكەتتىك ساپارى اياسىندا يسلاماباد قالاسىندا پاكىستاننىڭ جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ بازاسىندا قازاقستاندىق ءبىلىم بەرۋ جانە عىلىمي ورتالىقتاردىڭ سالتاناتتى اشىلۋ ءراسىمى ءوتتى.

سالتاناتتى ءىس-شاراعا سونداي-اق پاكىستان يسلام رەسپۋبليكاسىنىڭ پرەمەر-ءمينيسترى شاحباز  شاريف، عىلىم جانە جوعارى ءبىلىم ءمينيسترى ساياسات نۇربەك، پاكىستاننىڭ ءبىلىم جانە كاسىپتىك دايارلاۋ ءمينيسترى حاليد مابۋل سيدديكي قاتىستى، – دەپ حابارلايدى Aikyn.kz.

ءال-فارابي اتىنداعى قازاق ۇلتتىق ۋنيۆەرسيتەتىنىڭ ءال-فارابي اتىنداعى ورتالىعى قايد-ي ازام ۋنيۆەرسيتەتىنىڭ بازاسىندا اشىلدى. 1993 جىلى قۇرىلعان ورتالىق 30 جىلدان استام ۋاقىت بويى فارابيتانۋ عىلىمىن دامىتىپ، قازاق جانە شىعىس فيلوسوفياسىن الەمدىك دەڭگەيدە ناسيحاتتاپ كەلەدى. ورتالىقتىڭ تولىققاندى جۇمىس ىستەۋى ءۇشىن قاجەتتى ماتەريالدىق-تەحنيكالىق بازا قالىپتاستىرىلىپ، وقۋ جانە عىلىمي اۋديتوريالار، كومپيۋتەرلىك سىنىپتار مەن كەڭسە بولمەلەرى تولىق جابدىقتالعان.

ورتالىقتا شەتەلدىك ازاماتتارعا ارنالعان قازاق ءتىلى كۋرستارى، سونداي-اق قازاقستاننىڭ مادەني مۇراسىن زەرتتەۋگە باعىتتالعان مادەني-اعارتۋشىلىق ءىس-شارالار، سەمينارلار مەن عىلىمي كونفەرەنتسيالار ۇيىمداستىرىلادى. سونىمەن قاتار ورتالىق سەرىكتەس ەلدەردىڭ جەتەكشى ءبىلىم بەرۋ جانە عىلىمي ۇيىمدارىمەن ارىپتەستىك بايلانىستاردى نىعايتۋعا باعىتتالعان.

ق.ساتباەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتىنىڭ قانىش ساتباەۆ اتىنداعى عىلىمي-ءبىلىم بەرۋ ورتالىعى ۇلتتىق عىلىم جانە تەحنولوگيالار ۋنيۆەرسيتەتىنىڭ (NUST) بازاسىندا اشىلدى. ورتالىق بىرلەسكەن عىلىمي جانە ءبىلىم بەرۋ جوبالارىن ىسكە اسىرۋعا، ستۋدەنتتەر مەن وقىتۋشىلار الماسۋىن دامىتۋعا، سونداي-اق قازاقستاندىق عىلىمدى حالىقارالىق دەڭگەيدە ىلگەرىلەتۋگە ارنالعان الاڭعا اينالادى. ورتالىق كورنەكتى قازاقستاندىق گەولوگ، اكادەميك قانىش ساتباەۆتىڭ عىلىمي مۇراسىنا ارنالعان.

Satbayev Center ستۋدەنتتەر مەن زەرتتەۋشىلەردىڭ بىرلەسىپ جۇمىس ىستەۋىنە، يدەيالار الماسۋىنا، حالىقارالىق عىلىمي جوبالارعا قاتىسۋىنا، PolytechOnline پلاتفورماسى مەن زاماناۋي ينجەنەرلىك كۋرستارعا قول جەتكىزۋىنە مۇمكىندىك بەرەتىن زاماناۋي كەڭىستىك رەتىندە قۇرىلدى.

ورتالىق ازيا يسلام ءبىلىمى، مادەنيەتى جانە وركەنيەتىنە باعىتتالعان ياساۋي زەرتتەۋ ورتالىعى يسلامابادتاعى حالىقارالىق يسلام ۋنيۆەرسيتەتىنىڭ يسلام زەرتتەۋلەرى ينستيتۋتىنىڭ بازاسىندا اشىلدى. ورتالىق يسلام جانە وڭىرلىك زەرتتەۋلەر سالاسىنداعى بىرلەسكەن عىلىمي-زەرتتەۋلەر جۇرگىزۋگە، عىلىمي پىكىرتالاستار ۇيىمداستىرۋعا جانە اكادەميالىق ديالوگتى دامىتۋعا ارنالعان ينتەللەكتۋالدىق پلاتفورما رەتىندە جۇمىس ىستەيدى.

الداعى كەزەڭدە قازاقستاندىق عالىمداردىڭ پاكىستانعا عىلىمي ساپارلارىن ۇيىمداستىرۋ، پاكىستاندىق مامانداردىڭ تۇركىستان قالاسىندا دارىستەر وقۋى، بىرلەسكەن زەرتتەۋلەر جۇرگىزۋ جانە اكادەميالىق تاجىريبە الماسۋ جوسپارلانىپ وتىر.

Abai.kz