ەكولوگيا سالاسىنداعى جاۋاپكەرشىلىكتى كۇشەيتۋ جانە قورشاعان ورتانى قورعاۋ نورمالارىن كونستيتۋتسيالىق دەڭگەيدە بەكىتۋ قاجەتتىگىن قىزىلوردا وبلىسىنىڭ اكىمى نۇرلىبەك نالىباەۆ كونستيتۋتسيالىق رەفورما جونىندەگى كوميسسيانىڭ توعىزىنشى وتىرىسىندا كوتەردى.

كوميسسيا وتىرىسىندا ول ەكولوگيالىق نورمالاردىڭ وڭىرلەر ءۇشىن، سونىڭ ىشىندە ەكولوگيالىق احۋالى كۇردەلى ارال ماڭى ايماقتارى ءۇشىن ەرەكشە ماڭىزعا يە ەكەنىن ايتتى. وبلىس اكىمىنىڭ پىكىرىنشە، تەڭىزدىڭ تارتىلۋى قورشاعان ورتاعا عانا ەمەس، ايماق حالقىنىڭ ءومىر ساپاسىنا، دەنساۋلىعىنا جانە الەۋمەتتىك جاعدايىنا دا تىكەلەي اسەر ەتىپ وتىر.

«ارال تەڭىزىنىڭ تاعدىرى – بۇكىل ادامزات ءۇشىن اۋىر ساباق. ونىڭ سالدارىن ءبىز ءالى كۇنگە دەيىن سەزىنىپ كەلەمىز. سوندىقتان مەملەكەتتىڭ قولايلى قورشاعان ورتانى قامتاماسىز ەتۋ مىندەتىن، ازاماتتاردىڭ ەكولوگيالىق قاۋىپسىزدىككە قاتىستى قۇقىقتارىن كونستيتۋتسيالىق دەڭگەيدە بەكىتۋ – ۋاقىت تالابى»، – دەدى نۇرلىبەك نالىباەۆ.

ونىڭ ايتۋىنشا، جاڭا كونستيتۋتسيا جوباسىندا ەكولوگيالىق اقپاراتتىڭ اشىقتىعىن قامتاماسىز ەتۋگە جانە قورشاعان ورتاعا زيان كەلتىرگەنى ءۇشىن جاۋاپكەرشىلىكتى ارتتىرۋعا باعىتتالعان نورمالار قاراستىرىلعان. بۇل وزگەرىستەر ەكولوگيا سالاسىنداعى مەملەكەتتىك باقىلاۋدى كۇشەيتىپ، وڭىرلەردە الدىن الۋ شارالارىن ءتيىمدى ىسكە اسىرۋعا مۇمكىندىك بەرەدى.

سونىمەن قاتار، نۇرلىبەك نالىباەۆ جاڭا كونستيتۋتسيا جوباسى مەملەكەتتىڭ الەۋمەتتىك باعىتتاعى ءرولىن ارتتىرۋعا ارنالعانىن اتاپ ءوتتى. قۇجات الەۋمەتتىك تەڭسىزدىكتى قىسقارتۋعا، اۋىلدىق اۋماقتاردى قولداۋعا، جۇمىسپەن قامتۋدى كەڭەيتۋگە جانە ينفراقۇرىلىمدى جۇيەلى تۇردە دامىتۋعا قۇقىقتىق نەگىز قالىپتاستىرادى.

ونىڭ سوزىنشە، ءبىلىم بەرۋ سالاسىن ستراتەگيالىق باسىمدىق رەتىندە بەكىتۋ – ادامي كاپيتالدى دامىتۋدىڭ باستى تەتىگى. بۇل جاستاردى سۇرانىسقا يە ماماندىقتارعا دايارلاۋعا جانە ولاردىڭ الەۋەتىن تۋعان وڭىرلەرىندە جۇزەگە اسىرۋىنا جاعداي جاساۋعا باعىتتالعان.

«ەلىمىزدە ادامي كاپيتالدى دامىتۋ ءۇشىن ءبىلىم بەرۋدى ستراتەگيالىق باسىمدىق رەتىندە بەكىتەدى. ءبىز جاستاردىڭ بولاشاعىنا ينۆەستيتسيا سالۋدى، سۇرانىسقا يە مامانداردى دايارلاۋدى، جاس ازاماتتاردىڭ ءوز الەۋەتىن تۋعان جەرىندە ىسكە اسىرىپ، بولاشاعىن تۋعان ەلمەن بايلانىستىرۋىنا جاعداي جاساۋدى تولىق قولدايمىز»، - دەپ اتاپ ءوتتى وبلىس اكىمى.

سونداي-اق، بايانداماسىندا نۇرلىبەك نالىباەۆ جاڭا كونستيتۋتسيا جوباسى مەملەكەتتىك باسقارۋدىڭ تيىمدىلىگىن ارتتىرۋعا، وكىلەتتىكتەر مەن جاۋاپكەرشىلىكتى ناقتى اجىراتۋعا جانە بيلىك ورگاندارىنىڭ حالىق الدىنداعى جاۋاپكەرشىلىگىن كۇشەيتۋگە باعىتتالعانىن ايتتى.

Abai.kz