سەنات دەپۋتاتتارى قىلمىستىق، قىلمىستىق-پروتسەستىك، قىلمىستىق-اتقارۋ زاڭناماسىن جانە اكىمشىلىك قۇقىق بۇزۋشىلىق تۋرالى كودەكستى جاڭارتىلعان كونستيتۋتسيا تالاپتارىنا سايكەستەندىرۋگە باعىتتالعان زاڭدى ەكىنشى وقىلىمدا ماقۇلدادى.

قۇجاتتا سونداي-اق سايلاۋ سالاسىنا، پروكۋراتۋرا قىزمەتىنە جانە قىلمىستىق-اتقارۋ جۇيەسىن ودان ءارى ىزگىلەندىرۋگە قاتىستى وزگەرىستەر كوزدەلگەن.

زاڭداعى ماڭىزدى جاڭالىقتاردىڭ ءبىرى – سوتتالعاندارعا زاڭدا بەلگىلەنگەن تالاپتار ورىندالعان جاعدايدا باس بوستاندىعىنان ايىرۋ مەرزىمىن شارتتى تۇردە قىسقارتۋ تەتىگىنىڭ ەنگىزىلۋى. سونىمەن قاتار بۇل شارا قولدانىلمايتىن ادامدار ساناتى دا ناقتى ايقىندالعان.

تۇزەتۋلەر ارقىلى جەدەل-ىزدەستىرۋ قىزمەتى مەن سوتقا دەيىنگى تەرگەپ-تەكسەرۋدىڭ زاڭدىلىعىن قاداعالايتىن پروكۋراتۋرا لاۋازىمدى تۇلعالارىنىڭ ءتىزىمى ناقتىلانادى. وعان ينۆەستورلاردىڭ قۇقىقتارىن قورعاۋ كوميتەتىنىڭ توراعاسى ەنگىزىلگەن.

وزگەرىستەردىڭ جەكە ءبىر بولىگى قىلمىستىق-اتقارۋ جۇيەسى مەكەمەلەرىندەگى ايەلدەردىڭ ۇستالۋى جاعدايلارىنا قاتىستى. زاڭ ولاردىڭ ازىق-تۇلىك پەن ءبىرىنشى كەزەكتەگى قاجەتتى زاتتاردى ساتىپ الۋ قۇقىقتارىن كەڭەيتەدى، سالەمدەمە الۋ جانە كەزدەسۋ مۇمكىندىكتەرىن ارتتىرادى، سونداي-اق ۇستاۋ جاعدايلارىن جاقسارتۋدى كوزدەيدى.

بۇدان بولەك، كامەلەتكە تولماعان بالالارىن تاربيەلەپ وتىرعان سوتتالعان ايەلدەر مەن بالالارىن جالعىز تاربيەلەپ وتىرعان ەر ادامدار تەلەفون ارقىلى بالاسىمەن ەشقانداي شەكتەۋسىز بايلانىس جاساي الادى. جۇكتى ايەلدەر ءۇشىن قىلمىستىق-اتقارۋ جۇيەسى مەكەمەلەرىنەن تىس مەديتسينالىق ۇيىمداردا بوسانۋ مۇمكىندىگى قاراستىرىلعان.

سونداي-اق جۇكتى جانە بالا ەمىزەتىن انالاردىڭ دەنساۋلىعى مەن بالانىڭ جاعدايى ءۇشىن قاجەت بولعان جاعدايدا ازىق-تۇلىك ساتىپ الۋعا قويىلعان شەكتەۋلەر الىنىپ تاستالادى.

سايلاۋ سالاسىندا ونلاين-پلاتفورمالاردا كانديداتتار مەن ساياسي پارتيالارعا نەگىزسىز ارتىقشىلىق بەرگەنى ءۇشىن، سونداي-اق اقپاراتتى تەڭ جاعدايدا ورنالاستىرۋدان باس تارتقانى ءۇشىن جاۋاپكەرشىلىك ەنگىزىلەدى. بۇعان قوسا، سايلاۋ قورلارىنا قاتىسى جوق كوزدەردەن سايلاۋالدى قىزمەتتى قارجىلاندىرعانى ءۇشىن دە جاۋاپكەرشىلىك قاراستىرىلعان.

تاعى ءبىر تۇزەتۋ شاعىن كولەمدى سۋ كولىكتەرىن باقىلاۋ جانە قاداعالاۋ فۋنكتسيالارىن كولىك مينيسترلىگىنەن توتەنشە جاعدايلار مينيسترلىگىنە بەرۋدى كوزدەيدى. ازاماتتىق قورعاۋ ورگاندارىنىڭ قىزمەتكەرلەرىنە ءتيىستى اكىمشىلىك قۇقىق بۇزۋشىلىقتاردى قاراۋ جانە جازا قولدانۋ وكىلەتتىگى بەرىلەدى.

Abai.kz