«جاڭا كونستيتۋتسيا جوباسى ەڭبەك ادامدارىنىڭ تىلەگىمەن ۇندەسەدى» – كاسىپوداقتار فەدەراتسياسىنىڭ توراعاسى
قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ساتىبالدى داۋلەتالين كونستيتۋتسيالىق كوميسسيانىڭ 10-وتىرىسىندا جاڭا اتا زاڭ جوباسى ءاۋ باستان-اق ونىڭ قوعامعا جانە ءاربىر ازاماتتىڭ ومىرىنە ۇزاق مەرزىمدى اسەرى ەسكەرىلە وتىرىپ ازىرلەنگەنىن العا تارتتى.
ونىڭ ايتۋىنشا، كاسىپوداقتار ءۇشىن بۇل ۇدەرىستىڭ اشىقتىعىن قامتاماسىز ەتۋ، تالقىلاۋعا جۇمىس ىستەيتىن حالىقتى تۇتاستاي تارتۋدىڭ ماڭىزى ەرەكشە.
«كاسىپوداقتاردىڭ شامامەن ەكى ميلليون مۇشەسىنىڭ وكىلى رەتىندە بۇل قۇجاتتى تالقىلاۋ كوميسسيا مەن ساراپشىلار ورتاسىنىڭ اياسىندا عانا قالماۋى مەن ءۇشىن اسا ماڭىزدى بولدى»، – دەدى ساتىبالدى داۋلەتالين.
وڭىرلەردە جانە ەڭبەك ۇجىمدارىندا وتكەن تالقىلاۋلار بارىسىندا ادال ەڭبەك ەتىپ جۇرگەن ادامداردىڭ كۇندەلىكتى ومىرىنە تىكەلەي قاتىستى ماسەلەلەر كوتەرىلگەن.
«تالقىلاۋ ازاماتتارمەن بەتپە-بەت، كەيدە قىزۋ پىكىرتالاس تۇرىندە، بىراق شىنايى اڭگىمە سيپاتىندا ءوتتى. ادامدار ەڭبەك قاۋىپسىزدىگى، بالالارىنىڭ بولاشاعى تۋرالى ايتتى. كاسىپوداقتار فەدەراتسياسى جاڭا كونستيتۋتسيا جوباسىن قولدادى. سەبەبى ول كوپ جاعدايدا ءبىز ەڭبەك ادامدارىنان ەستىپ وتىرعان وي-پىكىرلەرمەن سايكەس كەلدى»، – دەپ تولىقتىردى سپيكەر.
ءوز سوزىندە ول الەۋمەتتىك مەملەكەت قاعيداتىنا جانە ادامنىڭ ەڭ جوعارى قۇندىلىق رەتىندە بەكىتىلۋىنە دە نازار اۋداردى. كاسىپوداقتار فەدەراتسياسى توراعاسىنىڭ پىكىرىنشە، بۇل – مەملەكەتتىك شەشىمدەر ءۇشىن نەگىزگى باعدار.
«العاشقى باپتىڭ وزىندە-اق قازاقستان الەۋمەتتىك مەملەكەت رەتىندە ايقىندالىپ، ەڭ جوعارى قۇندىلىق رەتىندە ادام، ونىڭ ءومىرى، قۇقىقتارى مەن بوستاندىقتارى اتالادى. جالدامالى جۇمىسكەر ءۇشىن بۇل – اسا ماڭىزدى بەلگى. مەملەكەت ەندى ساندار مەن ەسەپتەردىڭ اينالاسىندا ەمەس، ەڭبەك ەتىپ، ءونىم وندىرەتىن، ەلىمىزدىڭ تۇراقتىلىعىن قامتاماسىز ەتەتىن ادامدار اينالاسىندا قۇرىلادى»، – دەدى ساتىبالدى داۋلەتالين.
ەڭبەك قۇقىقتارى تۋرالى ايتا كەلە، ساتىبالدى داۋلەتالين ەكونوميكالىق جانە تەحنولوگيالىق وزگەرىستەر كەزەڭىندە جۇمىسپەن قامتۋ سالاسىنا جانە ەڭبەك جاعدايلارىنا مەملەكەت جاۋاپكەرشىلىگىنىڭ ساپالىق تۇرعىدان وزگەرگەنىنە توقتالدى.
«ەڭبەك ادامنىڭ جەكە تاۋەكەلى رەتىندە ەمەس، لايىقتى ءومىردىڭ نەگىزى رەتىندە مويىندالادى. تاعى ءبىر ماڭىزدى باعىت – ىنتىماقتاستىق قاعيداتى. مۇندا ول ءوزىنىڭ ناعىز شىنايى مانىنە قايتا ورالادى. بۇل – مەملەكەت، بيزنەس جانە ەڭبەك اراسىنداعى ىنتىماقتاستىق. تاۋەكەلدى جۇمىسكەردىڭ موينىنا ىلە سالۋ ەمەس. بىرجاقتى جاۋاپكەرشىلىك تە ەمەس. بۇل – مەملەكەت بەلسەندى قاتىسۋشى بولا وتىرىپ، ادامداردىڭ تۇرمىس جاعدايىنا جاۋاپكەرشىلىك الاتىن مۇددەلەردىڭ ءادىل تەڭگەرىمى. جۇمىسشى ءۇشىن بۇل، ەڭ الدىمەن، ەرتەڭگى كۇنگە دەگەن سەنىم»، – دەپ مالىمدەدى سپيكەر.
ءسوز سوڭىندا ساتىبالدى داۋلەتالين اۋىزبىرشىلىك پەن قوعامنىڭ ءبىر كىسىدەي اتسالىسۋى تۇراقتى دامۋدىڭ نەگىزگى تەتىگى ەكەنىن تاعى ەسكە سالدى. سونداي-اق، كونستيتۋتسيالىق كوميسسيا مۇشەلەرىنە اشىق ءارى مازمۇندى ديالوگ ءۇشىن العىس ايتتى.
Abai.kz
