تالدىقورعان قالاسىندا جەتىسۋ وڭىرىندەگى زاماناۋي تالاپقا ساي العاشقى كوركەم گيمناستيكا زالى قولدانىسقا بەرىلدى. زالدىڭ اشىلۋ قۋانىشىمەن سپورتشىلار مەن قالا تۇرعىندارىن وبلىس اكىمى بەيبىت يساباەۆ قۇتتىقتادى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

سۋرەت: gov.kz سايتىنان الىندى.

- مەملەكەت باسشىسىنىڭ وڭىردە بۇقارالىق سپورتتى دامىتۋ تۋرالى تاپسىرماسىنا سايكەس جىل سايىن كوپتەگەن سپورت نىساندارى سالىنۋدا. جەتىسۋ وبلىسى قۇرىلعاننان بەرى 39 نىسان بوي كوتەرىپ، جاڭعىرتىلدى. ولاردىڭ قاتارىندا تۇرعىن ءۇيى بار ۆولەيبول جاتتىعۋ بازاسى، ۇستەل تەننيسى ورتالىعى، مۇز ارەناسى جانە بۇگىنگى اشىلىپ وتىرعان زاماناۋي كوركەم گيمناستيكا زالى بار. جاڭا سپورت كەشەنىندە جاسالىپ وتىرعان جاعدايلار وسى كۇردەلى ءارى اسەم سپورت تۇرىنە جاستاردى كوبىرەك تارتۋعا ىقپال ەتەتىنە سەنىمدىمىن، - دەدى ب. يساباەۆ.

سالتاناتتى لەنتا قيۋ راسىمىنەن كەيىن قوناقتار جاڭا سپورت نىسانىنىڭ ءىشىن ارالاپ، جابدىقتالۋىمەن تانىستى. جاس سپورتشىلارمەن اڭگىمەلەسكەن ءوڭىر باسشىسى كوركەم گيمناستيكانى دامىتۋعا وبلىستا بۇگىنگى كۇنى بارلىق جاعداي جاسالىپ وتىرعانىن ايتىپ، بولاشاقتا ەلىمىزدىڭ اتىن شىعاراتىن مىقتى چەمپيون بولۋ ءۇشىن قاجىرلى ەڭبەكتەنىپ، ۇزدىكسىز جاتتىعۋ كەرەكتىگىن ايتتى. مۇنان سوڭ سپورت قايراتكەرلەرىمەن بىرگە بالالارعا گيمناستيكا قۇرال-جابدىقتارى، سول سياقتى سپورتتىڭ باسقا دا تۇرلەرىنە ارنالعان ينۆەنتارلار تابىس ەتتى.

سۋرەت: gov.kz سايتىنان الىندى.

جاتتىقتىرۋشىلاردىڭ ءبىرى ەلەنا بەليكوۆا كوركەم گيمناستيكاعا ارنالعان جاڭا زال جونىندە ءوز پىكىرىن ءبىلدىردى:

- جاس سپورتشىلارىمىز ءۇشىن جەكە جاتتىعۋ زالى سالىنعانىنا قۋانىشتىمىز. بۇعان دەيىن ءتۇرلى سپورت كەشەندەرىندە جاتتىعۋىمىزعا تۋرا كەلدى، بۇل ءبىرشاما جايسىزدىق تۋعىزاتىن. بۇل ماسەلەنى وبلىس اكىمىنىڭ حالىقپەن كەزدەسۋىندە كوتەردىك. سول كەزدە بىزگە بۇل ماسەلە نازاردان تىس قالمايدى دەپ ۋادە بەردى. بۇگىن ءبىزدىڭ ارمانىمىز ورىندالدى دەۋگە بولادى. بۇل ارنايى زالدا جاتتىعۋ پروتسەسى ءۇشىن بارلىق قولايلى جاعدايلار جاسالعان - توبەنىڭ بيىكتىگى 14 مەتر، جاراقاتتانۋدى بولدىرماۋ ءۇشىن پلاتفورماسى مەن گيمناستيكا كىلەمى بار اعاش ەدەن توسەلگەن. بۇل زالدىڭ اشىلۋى جەتىسۋدا كوركەم گيمناستيكانىڭ دامۋىنا، ءبىزدىڭ گيمناستتاردىڭ جوعارى ناتيجەلەرگە قول جەتكىزۋىنە تىڭ سەرپىن بەرەدى دەپ ويلايمىن، - دەدى ول.

سۋرەت: gov.kz سايتىنان الىندى.

جاس سپورتشىلار دا ءوز ويلارىن ورتاعا سالدى:

- مەن كوركەم گيمناستيكامەن ون جىلدان بەرى شۇعىلدانامىن. بۇعان دەيىن ءارتۇرلى سپورت كەشەندەرىنىڭ زالدارىندا جاتتىعىپ جۇردىك، ولاردىڭ توبەسى الاسا بولدى دا جاتتىعۋدا تاۋەكەلدەرگە بارۋعا مۇمكىندىك بەرمەيتىن. قازىر جاڭا زالدىڭ توبەسى بيىك، ءتۇرلى كۇردەلى جاتتىعۋلاردى جاساۋعا ىڭعايلى، ياعني ۇلكەن مۇمكىندىكتەرگە جول اشىلدى، ەندى سپورت شەبەرلىگىن قورعاۋعا بولادى، - دەيدى سپورت شەبەرلىگىنە ۇمىتكەر اناستاسيا تەرياەۆا.

سۋرەت: gov.kz سايتىنان الىندى.

تاعى ءبىر جاس گيمناستشى ايانا مۇرات تا وسىنداي پىكىردە:

- كوركەم گيمناستيكادان سپورت شەبەرلىگىنە ۇمىتكەرمىن. سپورتتىڭ وسى تۇرىمەن اينالىسقانىما جەتى جىل بولدى. قازىرگى زالىمىز جارىق، بيىك، ۇلكەن. مۇندا كاسىبي دايىندىعىمىزدى شىڭداپ، الەمدىك سپورت جارىستارىندا ەلىمىزدىڭ تۋىن كوككە كوتەرەمىز دەپ سەنەمىن، - دەدى ول.

سۋرەت: gov.kz سايتىنان الىندى.

انا-انالاردىڭ ءبىرى گۇلجانات ۋمەنتاەۆا زالدىڭ سالىنعانىنا ريزاشىلىعىن ءبىلدىردى:

- مەنىڭ ءتورت قىزىم بار. ەكىنشى قىزىم اياۋلىم ءتورت جاسىنان بەرى گيمناستيكاعا قاتىسادى. جاستايىنان ءوزىنىڭ بەيىمى بولدى، سوندىقتان تانىستارىمنىڭ كەڭەسى بويىنشا گيمناستيكا ۇيىرمەسىنە بەردىم. قازىر سەگىز جىلدان بەرى وسى سپورت تۇرىمەن تۇراقتى اينالىسىپ كەلەدى. قالامىزدا تۇراقتى جاتتىعاتىن كوركەم گيمناستيكانىڭ ارنايى زالى بولعانىنا اتا-انا رەتىندە قۋانىشتىمىن. بولاشاقتا قىزىم چەمپيون بولاتىنىنا سەنەمىن، - دەيدى گۇلجانات.

سۋرەت: gov.kz سايتىنان الىندى.

اتاپ وتسەك، عيماراتتىڭ قۇرىلىسى وتكەن جىلدىڭ اقپان ايىندا باستالعان بولاتىن. مۇندا ەكى زال بار، ونىڭ ءبىرى گيمناستيكا جاتتىعۋلارىنا ارنالسا، ەكىنشىسى ۆولەيبول، باسكەتبول، ميني فۋتبول ويىندارىن وتكىزۋگە بولاتىن امبەباپ زال.

سۋرەت: gov.kz سايتىنان الىندى.

جالپى، بۇگىنگى كۇنى تالدىقورعاندا 200-گە جۋىق بالا تۇراقتى تۇردە كوركەم گيمناستيكامەن اينالىسادى، ولاردى كاسىبي جاتتىقتىرۋشىلار جاتتىقتىرادى.

Abai.kz