راۋان كەنجەحانۇلى: ءتىل جاناشىرلارىنىڭ ۇسىنىستارى ەسكەرىلدى
جاڭا كونستيتۋتسيا جوباسى تاۋەلسىزدىكتىڭ 35 جىلدىق تاجىريبەسى مەن قوعام سۇرانىسىنان، سونداي-اق بولاشاقتىڭ مۇددەسىنەن تۋىنداعان تاريحي قاجەتتىلىك. بۇل تۋرالى «قازاق ءتىلى» قوعامىنىڭ پرەزيدەنتى راۋان كەنجەحانۇلى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ العاشقى وتىرىسىندا ايتتى.
ءوز سوزىندە راۋان كەنجەحانۇلى بۇل وزگەرىستەردىڭ تۇپكى ءمانى ەل ەكونوميكاسىنىڭ دامۋىنا ۇلەس قوساتىن قابىلەتتى ءارى بىلىكتى جاڭا ۇرپاقتىڭ قالىپتاسۋىنا جول اشۋ ەكەنىن اتاپ ءوتتى.
«بۇگىندە ەلدىڭ وركەندەۋى تابيعي بايلىقپەن ەمەس، ادامي كاپيتالمەن ولشەنەدى. قابىلەت پەن ءبىلىم ۇشتاسقاندا الىنباس قامال جوق. ءبىلىمدى، جاڭاشىل ۇلتتاردىڭ ءداۋىرى كەلدى. سوندىقتان زياتكەرلىك ۇلت قالىپتاستىرۋ – جاي عانا ۇران ەمەس، جاڭا كەزەڭدەگى مەملەكەتتىك ساياساتتىڭ وزەگى», – دەدى ول.
بۇل رەتتە راۋان كەنجەحانۇلى ءار بالانىڭ ساپالى ءارى قولجەتىمدى ءبىلىم الۋىنا، عىلىممەن اينالىسۋىنا جاعداي جاسالۋى جانە كاسىپكەرلەردىڭ يننوۆاتسيا ەنگىزۋ ەركىندىگى كونستيتۋتسيالىق دەڭگەيدە قورعالاتىن قۇندىلىققا اينالاتىنىن اتاپ ءوتتى. سونىمەن قاتار قوعام قايراتكەرى كونستيتۋتسيا جوباسىندا ءتىل ماسەلەسىنە دە ايرىقشا نازار اۋدارىلعانىن جەتكىزدى. ونىڭ ايتۋىنشا، «قازاق ءتىلى» قوعامى مەن ءتىل جاناشىرلارىنىڭ ۇسىنىستارى ەسكەرىلىپ، مەملەكەتتىك ءتىلدىڭ مارتەبەسىن ايقىندايتىن ماڭىزدى نورما ەنگىزىلدى.
«ءبىز تاريحي تاعدىر توعىستىرعان بارلىق تىلدەردى قۇرمەتتەيمىز. الايدا قازاق ءتىلىنىڭ مەملەكەتتىك تۇعىرداعى ايرىقشا مارتەبەسى ايقىن كورسەتىلۋى كەرەك. بۇل باعىتتاعى ۇسىنىستارىمىز قولداۋ تاپتى. ەندىگى بولاشاعىمىز – قازاق تىلىندە، سول تىلدە داميتىن عىلىم مەن بىلىمدە», – دەدى راۋان كەنجەحانۇلى.
قورىتىندىلاي كەلە، ول جاڭا كونستيتۋتسيا جوباسىن ەلدىڭ ورتاق كەلىسىمى ءارى كەلەر ۇرپاققا قالدىراتىن امانات رەتىندە باعالادى.
ەسكە سالا كەتەيىك، بۇگىن استانادا كونستيتۋتسيالىق رەفورمانى قولداۋ ماقساتىندا «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» دەپ اتالاتىن جالپىۇلتتىق كواليتسياسى قۇرىلدى. ونىڭ قۇرامىنا ەلىمىزدەگى ساياسي پارتيالار، قوعامدىق ۇيىمدار، دەپۋتاتتار، زيالى قاۋىم وكىلدەرى، جاستار بىرلەستىكتەرى، كاسىپوداق ۇيىمدارى جانە تاعى باسقالار كىردى.
Abai.kz
