قازاقستان رەسپۋبليكاسى ۇلتتىق ورتالىق مۋزەيىندە، شاكەن ايمانوۆ اتىنداعى «قازاقفيلم» جانە مەڭتاي كينومۋزەيى بىرلەسىپ ۇلى مۇرا – ۇرپاققا وسيەت» اتتى كورمە اشتى.

ەكسپوزيتسيا قازاق كسر-ءنىڭ حالىق ءارتىسى، اكتەر، وپەرا ءانشىسى كاۋكەن كەنجەتاەۆتىڭ 110 جىلدىعىنا  جانە  قازاقستاننىڭ ەڭبەك سىڭىرگەن ءارتىسى، كينواكتەر مەڭتاي وتەپبەرگەنوۆتىڭ 80 جىلدىعىنا ارنالدى.

ءىس-شارا  اياسىندا قازاق ونەرىنىڭ دارا تۇلعاسىنا ارنالعان «كاۋكەن كەنجەتاەۆ» كىتابىنىڭ تۇساۋكەسەر ءراسىمى ءوتتى. بۇل ەڭبەك – ارحيۆ دەرەكتەرىنە نەگىزدەلگەن، ونەر يەسىنىڭ شىعارماشىلىق جولىن، ءومىر بەلەستەرىن جانە ۇلتتىق مادەنيەتكە قوسقان زور ۇلەسىن ايقىندايتىن قۇندى باسىلىم. كەش بارىسىندا اباي اتىنداعى قازاق ۇلتتىق وپەرا جانە بالەت تەاترىنىڭ ارتىستەرى ونەر كورسەتتى.

كورمەدە مەڭتاي وتەپبەرگەنوۆتىڭ جەكە كوللەكتسياسىنىنداعى زاتتار كوپشىلىكتىڭ قىزىعۋشىلىعىن  تۋدىردى. ولاردىڭ قاتارىندا 1931-1970 جىلدار ارالىعىندا جارىق كورگەن 200-گە جۋىق كينوافيشالار مەن 1932-1990 جىلدار ارالىعىندا شىعارىلعان فوتوكامەرالاردىڭ بىرەگەي ۇلگىلەرى، اشىق حاتتار، كينو جۋرنالدارى مەن فوتوماتەريالدار بار.

كەش سوڭىندا كاۋكەن كەنجەتاەۆتىڭ قاتىسۋىمەن تۇسىرىلگەن «گاۋھار تاس» ءفيلمىنىڭ وڭدەۋدەن وتكەن، جاڭارتىلعان نۇسقاسى العاش رەت كورسەتىلدى. سونىمەن قاتار، تالانتتى اكتەر مەڭتاي وتەپبەرگەنوۆ باستى ءرولدى سومداعان «ستراننىي مير جەلاني ي نادەجد» ءفيلمىنىڭ كورسەتىلىمى ءوتتى.

Abai.kz