ەلىمىزدىڭ اۋىلدارىنداعى رەسمي جۇمىسسىزداردىڭ سانى 162,3 مىڭ ادامدى قۇرايدى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى مادەنيەت جانە اقپارات ءمينيسترى ايدا بالاەۆانىڭ جاۋابىندا ايتىلعان. 

— ۇلتتىق ستاتيستيكا بيۋروسىنىڭ مالىمەتىنە سايكەس، 2025 جىلعى 4 توقساندا اۋىلداردا جۇمىس كۇشىنىڭ سانى 3,6 ملن ادام بولدى، ونىڭ ىشىندە 3,4 ملن — جۇمىسپەن قامتىلعان حالىق جانە 1,1 ملن — ءوزىن-ءوزى جۇمىسپەن قامتىعان اۋىل تۇرعىندارى. اۋىلداردا رەسمي جۇمىسسىزداردىڭ سانى 162,3 مىڭ ادام. جۇمىسسىزدىق دەڭگەيى جۇمىس كۇشىنە شاققاندا 4,6 پايىز مولشەرىندە قالىپتاستى، — دەدى ايدا بالاەۆا.

ۆيتسە-پرەمەردىڭ دەرەگىنشە، 2025 جىلى اۋىلداردا 174,7 مىڭ ادام جۇمىسپەن قامتۋعا جاردەمدەسۋدىڭ بەلسەندى شارالارىنا تارتىلدى. ونىڭ ىشىندە:

— 107,2 مىڭ ادام سۋبسيديالاناتىن جۇمىس ورىندارىنا ورنالاستى;

— 28,9 مىڭ ادام «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتىلدى;

— 28,2 مىڭ ادام ەڭبەك نارىعىندا سۇرانىسقا يە كاسىپتەر بويىنشا ونلاين وقۋمەن قامتاماسىز ەتىلدى;

— حالىقتىڭ الەۋمەتتىك وسال توپتارىنا جاتاتىن 5,6 مىڭ ادامعا جاڭا بيزنەسيدەيانى ىسكە اسىرۋعا 400 اەك مولشەرىندە گرانتتار بەرىلدى;

— 4,8 مىڭ ادام جۇمىس بەرۋشىلەردىڭ وتىنىمدەرى بويىنشا قىسقا مەرزىمدى كاسىپتىك وقىتۋعا جىبەرىلدى.

Abai.kz