اقش-تىڭ بۇرىنعى پرەزيدەنتى بيلل كلينتون جۇما كۇنى جابىق ەسىك جاعدايىندا وتكەن تىڭداۋدا كونگرەسس كوميتەتىنىڭ دجەففري ەپشتەينمەن قارىم-قاتىناسى تۋرالى سۇراعىنا ەپشتەينمەن ارالاسقان ۋاقىتىندا «ونى مازالايتىن ەشتەڭە بايقاماعانىن» ايتتى. ءوز سوزىندە كلينتون وكىلدەر پالاتاسىنىڭ باقىلاۋ كوميتەتىنە «ەگەر ەپشتەيننىڭ قىلمىستىق ارەكەتتەرى تۋرالى بىلگەن بولسام، ەشقاشان ەپشتەيننىڭ جەكە ۇشاعىنا وتىرماس ەدىم» دەپ مالىمدەدى.

ەكس-پرەزيدەنت كلينتون تاعى دا: «ءبىزدىڭ وسى ارادا بولۋىمىز، ونىڭ بۇل قىلمىستاردى سونشالىقتى مۇقيات جانە ۇزاق ۋاقىت بويى جاسىرعانىنىڭ سالدارىنان» دەدى.

بيلل كلينتون 2000 جىلداردىڭ باسىندا پرەزيدەنتتىكتەن كەتكەن سوڭ، ەپشتەين 2008 جىلى «كامەلەتكە تولماعانداردى جەزوكشەلىككە ازعىردى» دەپ سوتتالعانعا دەيىن قارجىگەردىڭ ۇشاعىمەن ءجيى ساياحاتتاعان.

كونگرەسس قابىلداعان زاڭعا سايكەس، ادىلەت مينيسترلىگى قاڭتار ايىنىڭ سوڭىندا ەپشتەينگە قاتىستى 3 ميلليوننان استام بەتتەن تۇراتىن قۇجاتتاردى جاريالادى. بۇل قۇجاتتاردا بيلل كلينتوننىڭ ءجۇزى كومەسكىلەنگەن بىرنەشە ايەلمەن تۇسكەن فوتوسۋرەتتەرى دە بار. بيلل كلينتون ايىپتاۋلاردى بىردەن جوققا شىعارىپ، «مەن ەشتەڭە كورگەن دە جوقپىن. ەشتەڭە جاساعان دا جوقپىن» دەپ مالىمدەدى.

2016 جىلعى دەموكراتيالىق پارتيادان پرەزيدەنتتىككە كانديدات بولعان حيللاري كلينتون الدىڭعى كۇنى جاۋاپقا تارتىلدى. ول 2019 جىلى سوت وتىرىسىنان ءبىر كۇن بۇرىن تۇرمەدە قايتىس بولعان، ءولىمىنىڭ سەبەبى كۇماندى دجەففري ەپشتەينمەن ەشقاشان كەزدەسپەگەنىن ايتتى.

كلينتوندار باستاپقىدا كونگرەسس كوميتەتىنىڭ الدىندا كۋالىك بەرۋدەن باس تارتتى، بىراق سوت ايىپتاۋلارىن قۇرمەتتەمەۋ - قىلمىستىق جاۋاپكەرشىلىككە الىپ كەلەتىنىن بىلگەن سوڭ كەلىستى. ولار نيۋ-يوركتەگى چاپپاكۋاداعى نەگىزگى رەزيدەنتسيالارىنىڭ جانىندا كۋالىك بەردى.

وكىلدەر پالاتاسىنىڭ باقىلاۋ كوميتەتىنىڭ توراعاسى دجەيمس كومەر بيلل كلينتونعا ادىلەت مينيسترلىگى جاريالاعان قۇپياسىز فوتوسۋرەتتەر تۋرالى سۇراق قويۋدى جوسپارلاپ وتىرعانىن ايتقان ەدى. كوميتەت سونىمەن قاتار بۇرىنعى پرەزيدەنتكە دجەففري ەپشتەيننىڭ ءوزىنىڭ اتىنداعى قورمەن قارىم-قاتىناسى تۋرالى دا جاۋاپ الماق.

حيللاري مەن بيلل كلينتون رەسپۋبليكاشىلداردى "قازىرگى پرەزيدەنت ترامپ پەن دجەففري ەپشتەيننىڭ قارىم-قاتىناسىنان نازاردى باسقا جاققا اۋدارۋعا تىرىستى" دەپ ايىپتادى.

دەموكراتتار كوميتەتتەن قازىرگى اق ءۇي باسشىسى ترامپپەن (قۇپياسىزداندىرىلعان قۇجاتتاردا اتى بىرنەشە رەت كەزدەسەدى)  قازىرگى ساۋدا ءمينيسترى حوۆارد لۋتنيكتەن دە جاۋاپ الۋدى تالاپ ەتۋدە. لۋتنيك باستاپقىدا دجەففري ەپشتەيننىڭ جەكە ارالىنا بارعانىن جوققا شىعاردى، بىراق ارتىنان بولعانىن مويىندادى.

دجەيمس كومەر ترامپتان جاۋاپ الۋ مۇمكىندىگىن جوققا شىعاردى.

دەموكراتتار سونىمەن بىرگە ادىلەت مينيسترلىگىن ترامپتى "كامەلەتكە تولماعان كەزىمدە جىنىستىق زورلىق-زومبىلىق كورسەتتى" دەپ ايىپتاعان ايەلگە قاتىستى قۇجاتتاردى جاسىردى دەپ كىنالادى. ادىلەت مينيسترلىگى قۇجاتتاردى قاراپ جاتقانىن جانە قاجەت دەپ تاپسا، ولاردى جاريالايتىنىن مالىمدەدى.

ترامپ1990-شى جىلدارى جانە 2000-شى جىلداردىڭ باسىندا دجەففري ەپشتەينمەن قارىم-قاتىناستا بولعان، بىراق ول 2000-شى جىلداردىڭ ورتاسىندا ەپشتەينمەن بارلىق بايلانىستارىن ۇزگەنىن ايتادى.

Abai.kz