اكتەردىڭ شىنايى ويناۋى – كورەرمەندى سەندىرە الاتىن، كەيىپكەردىڭ جان دۇنيەسىن تابيعي ءارى نانىمدى جەتكىزە ءبىلۋى. بۇل تەك ءماتىندى جاتقا ايتۋ ەمەس، ءرولدى «سەزىنۋ» جانە سول كەيىپكەر بولىپ ءومىر ءسۇرۋ بولىپ تابىلادى. مىنە، شىن دارىندى اكتەرگە كەرەك وسى قاسيەت. اتالمىش بولمىس ق.قۋانىشباەۆ اتىنداعى قازاق ۇلتتىق مۋزىكالىق دراما  تەاترىنىڭ اكتەرى سارسەن بەيبارىستىڭ بويىنان بايقالادى.

بۇرىندارى بەيبارىس تۋرالى سىرتىنان كوپ جاقسى پىكىرلەردى ەستۋشى ەدىم. ستۋدەنت كۇنىنەن باستاپ ونەردەگى ۇلاعاتتى ۇستازدارى قر حالىق ءارتيسى، پروفەسسور تىلەكتەس مەيراموۆ پەن قر ەڭبەك سىڭىرگەن ءارتيسى، پروفەسسور جۇماگۇل مەيراموۆانىڭ ۇزدىك شاكىرتىنىڭ ءبىرى اتانىپ، ع.مۇسىرەپوۆتىڭ «اقان سەرى-اقتوقتى» تراگەدياسىنداعى اقان سەرى،  ش.ايتماتوۆتىڭ ء“جاميلا” دراماسىنداعى-دانيار جانە ت.ب. كەسەكتى كەيىپكەرلەردى كەسكىندەدى.  بۇل ستۋدەنتتىك كەزەڭىننىڭ جارقىن ەستەلىكتەرى بولسا، تەاتر ساحناسىنىڭ جولى بولەك. ب.برەحتتىڭ «شەڭبەر» شىعارماسىنداعى اسكەرىن كورىپ، بويىنان«كەيىپكەرسىندىلىق» دەڭگەيىن بايقادىم.  ال بەيبارىستىڭ جاقىندا عانا تۇساۋى كەسىلگەن دۋلات يسابەكوۆتىڭ «بوناپارتتىڭ ۇيلەنۋى» كومەدياسىنداعى بوناپارت ءرولى بەيبارىستىڭ اكتەرلىك قىرىن اشتى.  بوناپارت-بەيبارىس-قالادا وسكەن، بالالىق شاعى شەتەلدە وتكەن اقساۋساق قازاق بالاسى. ونىڭ انا ءتىلىن بىلمەسە دە، قازاقشا ۇيرەنۋگە تىرىسىپ جۇرگەنىنە ىشتەي سۇيسىنەسىن. اكتەر نۇسقالاۋىنداعى بوناپارت-بويىندا ەشكىمگە زيانى جوق، اقكوڭىلدىگى باسىم جان.سوزىمىزگە بوناپارتتىڭ اۋىلدان تۋىستارى كەلگەندەگى قۋانىش سەزىمىنەن بايقاي الامىز.  بەيبارىستىڭ بەينەلەۋىندەگى بوناپارت-اۋىزىن اشسا جۇرەگى كورىنەتىن كەيىپكەر. بەيبارىس-بوناپارتتىڭ تەك قانا ءبىر جاعىن ياعني، اقكوڭىلدىگىن عانا ەمەس، سونداي-اق،  وزگە دە، قىرلارىن بايقاتۋ ارقىلى قاھارماننىڭ مىنەز-قۇلقىننىڭ كىلتىن تاپتى. اريستوتەلدىڭ: «ارەكەتسىز-مىنەز بولمايدى»-دەيتىن قاناتتى ءسوزى بار. اكتەردىڭ  اتا-اناسىنا ىنجىقتىقپەن ەركەلەۋىن بوناپارتتىڭ ەركە، اكە-اناسىنا دەگەنىن ورىنداتاتىن ادام رەتىندە كورەمىز. بىراق، كورشى نۇرجامالدىڭ ايلاسى مەن ءدورجان اقساقالدىڭ باكىسىنىڭ ارقاسىندا بوناپارتتىڭ ومىرىمەن بىرگە كوڭىل-كۇيىنىڭ 180 گرادۋسقا  وزگەرگەنى كورەرمەنگە ايقىندالدى. بوناپارت ارقىلى سارسەن بەيبارىستىڭ-ساحنا الاڭىندا تابيعيلىعى  (ورگانيكاسى)  باسىم اكتەر ەكەنىن كوردىك. قازىرگى تاڭدا، تابيعيلىق اكتەر ويىنى ءۇشىن باستى قاجەتتىلىكتىڭ ءبىرى.

كونستانتين ستانيسلاۆسكي: «ساحنادا وتىرىك ايتۋعا بولمايدى. ونەردىڭ شىندىعى – ءومىردىڭ شىندىعى»-دەيدى. بوناپارت-بەيبارىس ونەر ارقىلى بۇگىنگى اقساۋساق ۇرپاقتىڭ شىنايىلىعىن اكتەرلىك ويىنىمەن ايقىندادى.

بولاشاعىنان ءۇمىت كۇتتىرەتىن سارسەن بەيبارىستىڭ شىعارماشىلىق جولىنا ساتتىلىك تىلەيمىز!

باحتيار تۇرسىن، تەاترتانۋشى

Abai.kz