«دەموكراتياداعى بارشا دوستارىما سالەم!

مىنە، تۇرمەدە وتىرعانىما ەكىنشى جىل تولدى...

ومىرىمدەگى وسى تۇرمە تاجىريبەسىنەن وتكەننەن كەيىن، سىزدەرگە حات جازۋدى ۇيعاردىم.

وسى ەكى جىل ىشىندە مەن كوپتەگەن پروتسەستەر مەن داعدارىستاردى باستان وتكەردىم. مۇندا سوتتالعاندار مەن كەيبىر قىزمەتكەرلەر تاراپىنان ينتريگالار، قارالاۋ جانە اياقتان شالۋ ارەكەتتەرى بولدى.

ولار مەنى سىندىرۋ ارقىلى ۇكىمەتتەن بوستاندىق تۇرىندەگى سىياقى الامىز نەمەسە قىزمەتىمىز وسەدى دەپ ويلادى.

بىراق مەن سىنباۋ ءۇشىن بار كۇش-جىگەرىمدى جۇمسادىم. ءوزىمدى جالعىز ءارى تاستالعانداي سەزىنگەن كۇندەرىم دە بولدى. سونداي ساتتەردە سىزدەردىڭ حاتتارىڭىز بەن تىلەكتەرىڭىز ماعان قانات ءبىتىرىپ، العا جىلجۋعا جىگەر مەن سەنىم سىيلادى.

سىزدەر مەنى قولىمنان ۇستاپ، العا سۇيرەگەن ۇلكەن كۇش بولدىڭىزدار.

وسى ەكى جىلداعى ءاربىر ءسات مەنى قورقىنىشقا بوي الدىرماي، ودان اتتاپ وتۋگە ۇيرەتتى. ماسەلەلەرگە قارسى تۇرۋدى جانە ودان ەڭ از شىعىنمەن نەمەسە ەڭ كوپ شىعىنمەن شىعۋدى ۇيرەندىم. قارىم-قاتىناسقا اشىق بولا باستادىم جانە كەز كەلگەن جاعدايدا امان قالۋدى ۇيرەنىپ جاتىرمىن.

مەن بارلىق سوتتالعانداردى نەمەسە قىزمەتكەرلەردى جامان دەپ ايتا المايمىن. ولاردىڭ اراسىندا دا ماعان قولداۋ كورسەتكەن جاقسى، ىزەتتى ادامدار بار.

مەكەمە اكىمشىلىگى ماعان شىعارماشىلىقپەن اينالىسۋعا، ياعني سۋرەت سالۋعا، ۇلتتىق اسپاپ قومىزدا ويناۋعا جانە ءان ايتۋعا رۇقسات بەردى. ول ءۇشىن بارلىق جاعدايدى جاسادى. مەنىڭ ءوتىنىشىم بويىنشا كىتاپحانا قورىن زاماناۋي ادەبيەتتەرمەن جاڭارتتى.

قازىر مەندە ءبارى جاقسى، ويتكەنى مەن ەڭ قيىن مەكتەپتەن ءوتىپ، ەمتيحاندى «وتە جاقسى» دەگەن باعاعا تاپسىردىم. قازىرگى ۋاقىتتا مەنى جاقسى كورەدى جانە سىيلايدى. ال الدا نە بولاتىنىن ۋاقىت كورسەتەدى.

وتكەنگە كوز جىبەرسەم، مەن بۇل مەكتەپتەن ءدال وسى جەردە ءوتۋىم كەرەك بولعانىن تۇسىنەمىن. ويتكەنى مۇنداعى ساباقتار باسقا ەش جەردە وقىتىلمايدى.

مەن بولاتتاي شيرىقتىم، ءيىلدىم، بىراق سىنعان جوقپىن.

ءبارىن سارالاي كەلە، مەن تەك دوستارىم مەن نيەتتەستەرىمە عانا ەمەس، مەنىڭ وسى جەرگە كەلۋىمە سەبەپشى بولعان ادامدارعا دا ريزا ەكەنىمدى ءتۇسىندىم.

سىزدەرگە، اناما، جولداسىما، ىنىلەرىمە جانە مەن ءۇشىن الاڭدايتىن جانداردىڭ بارىنە شەكسىز العىس ايتامىن.

سىزدەردىڭ ماحابباتتارىڭىز، قولداۋلارىڭىز بەن سەنىمدەرىڭىز ماعان عالامات كۇش بەرەدى.

وزدەرىڭىزدى جانە مەنى ساقتاڭىزدار

قۇرمەتپەن، سىزدەردىڭ تاجىبەك كىزى ماحابات

قر ءام قجقب №2 مەكەمەسى، ستەپنوە اۋىلى

18.02.2026»

ەستەرىڭىزگە سالا كەتەيىن: بۇۇ-نىڭ زاڭسىز ۇستاۋ جونىندەگى جۇمىس توبى قىرعىز رەسپۋبليكاسىنىڭ ادام قۇقىقتارىنىڭ جالپىعا بىردەي دەكلاراتسياسىنىڭ جەتى بابىن جانە ازاماتتىق جانە ساياسي قۇقىقتار تۋرالى حالىقارالىق پاكتىنىڭ التى بابىن بۇزعانىن انىقتادى. ولار ماحاببات تاجىبەك قىزىنىڭ باس بوستاندىعىنان ايىرىلۋى ونىڭ زاڭدى تۇردە پىكىر ءبىلدىرۋ ەركىندىگىنىڭ، جۋرناليستىك قىزمەتىنىڭ جانە جەمقورلىقتى زەرتتەۋىنىڭ تىكەلەي سالدارى دەگەن قورىتىندىعا كەلدى.

10 ناۋرىزدا جوعارعى سوتتا ماحاببات تاجىبەكقىزىنىڭ ءىسىن قايتا قاراۋ مۇمكىندىگى تۋرالى وتىرىس وتەدى.

ءومىر شىنىبەكۇلىنىڭ الەۋمەتتىك جەلىدەگى پاراقشاسىنان

Abai.kz