شىمكەنتتە «ورداباسى» مەن «اقتوبە» جاستار كوماندالارىنىڭ ويىنشىلارى اراسىندا جاپپاي توبەلەس بولدى. الەۋمەتتىك جەلىلەردە تاراعان بۇل اقپاراتقا قاتىستى اقتوبە كلۋبىنىڭ ءباسپاسوز قىزمەتى تۇسىنىكتەمە بەردى. 

«اقتوبە» فۋتبول كلۋبى الەۋمەتتىك جەلىلەردە تارالىپ جاتقان شىمكەنتتە وتكەن جاستار ماتچىنداعى قاقتىعىس تۋرالى تومەندەگىدەي حابارلايدى. شىمكەنت قالاسىندا جەرگىلىكتى «ورداباسى» مەن «اقتوبە» جاستار كوماندالارى اراسىندا باقىلاۋ ماتچى ءوتىپ جاتتى. ەكىنشى تايمنىڭ باسىندا ويىن ەپيزودى ناتيجەسىندە كەلىسپەۋشىلىك ورىن الىپ، ارتى جاپپاي توبەلەسكە ۇلاستى. وكىنىشكە قاراي، جانجال سالدارىنان «اقتوبەنىڭ» ەكى جاس ويىنشىسى اۋرۋحاناعا جەتكىزىلدى. بىرەۋىنىڭ جاعى سىنىپ، ەكىنشىسى ەرىن (يەك) جاراقاتىن الدى. العاشقىسىنا وتا جاسالادى، - دەپ حابارلادى «اقتوبە» فۋتبول ورتالىعىنىڭ رەسمي اككاۋنتى.

سونداي-اق، «اقتوبە» فۋتبول كلۋبى زورلىق-زومبىلىقتى قاتاڭ سىناي وتىرىپ، ءتيىستى ورگاندار اتالمىش جاعدايدى مۇقيات تەرگەيدى دەپ سەنىم بىلدىرەدى.

«اقتوبە» فۋتبول ورتالىعىنىڭ ءباسپاسوز قىزمەتى جاسوسپىرىمدەرىمىزدىڭ تەز ساۋىعۋىن تىلەيتىنىن جانە ەم ءۇشىن قاجەتتىنىڭ ءبارىن جاسايتىنىن حابارلادى.

Abai.kz