رەسپۋبليكالىق رەفەرەندۋم كۇنى قوناەۆ قالاسىندا رەترواۆتوكولىكتەردىڭ اۆتوشەرۋى ءوتتى. اكتسياعا قاتىسۋشىلار داۋىس بەرۋ ۋچاسكەلەرىنە كونە اۆتوكولىكتەرمەن كەلىپ، ەل ومىرىندەگى ماڭىزدى ساياسي وقيعاعا بەيجاي قارامايتىنىن جانە ازاماتتىق ۇستانىمدارىن كورسەتتى. ەرەكشە باستامانىڭ اۆتورى — قوناەۆ قالاسىنىڭ قۇرمەتتى ازاماتى، مەتسەنات مۋرات سەرگەباەۆ.

سۋرەت: اسلان كاجەكە.

ءسانى مەن سالتاناتى جاراسقان رەترواۆتوكولىكتەر كولونناسى قالانىڭ ورتالىق كوشەلەرىمەن ءجۇرىپ ءوتتى. سيرەك كەزدەسەتىن كولىكتەر تۇرعىنداردىڭ ەرەكشە قىزىعۋشىلىعىن تۋدىرىپ، كوپشىلىك ولاردى تاماشالاپ، سۋرەتكە ءتۇسىپ، اسەرلەرىمەن ءبولىستى. اۆتوشەرۋ رەفەرەندۋم كۇنى قالا ومىرىنە ەرەكشە ءسان بەرىپ، ەستە قالارلىق شارالاردىڭ بىرىنە اينالدى.

سۋرەت: اسلان كاجەكە.

مۋرات سەرگەباەۆ — قوناەۆتاعى بەلگىلى كاسىپكەرلەردىڭ ءبىرى. ول قايىرىمدىلىق جوبالارعا بەلسەندى قاتىسىپ، قالاداعى قوعامدىق باستامالاردى قولداپ كەلەدى. سونىمەن قاتار ول قالاداعى بىرەگەي نىسانداردىڭ ءبىرى سانالاتىن رەترواۆتوكولىكتەر مۋزەيىنىڭ نەگىزىن قالاۋشى.

رەفەرەندۋم كۇنى مۋرات سەرگەباەۆ ءوزى تىركەلگەن ۋچاسكەگە بارىپ، ازاماتتىق تاڭداۋىن جاسادى.

«بۇگىن مەن رەسپۋبليكالىق رەفەرەندۋمعا قاتىسىپ، ءوز داۋىسىمدى بەردىم. كاسىپكەر رەتىندە تۇراقتىلىق پەن زاڭ ۇستەمدىگى بيزنەستىڭ دامۋىنا تىكەلەي اسەر ەتەتىنىن جاقسى تۇسىنەمىن. ەل بولاشاعىنا قاتىستى ماڭىزدى شەشىمدەر قابىلداناتىن ساتتە قوعامنىڭ بىرلىگى اسا ماڭىزدى»، — دەدى ول.

Abai.kz