اقش، لوس-اندجەلەس. الەمدىك كينواكادەميانىڭ باستى ماراپاتى سانالاتىن 98-ءشى «وسكار» سىيلىعىن تابىستاۋ راسىمىندە كۇتپەگەن جاعداي ورىن الدى. «ۇزدىك دەرەكتى فيلم» اتالىمىندا باس جۇلدەنى رەسەيلىك بيلىك پەن ۋكرايناداعى قاقتىعىستى سىنعا العان «اتى جوق مىرزا پۋتينگە قارسى» (اعىلش. Mr. Nobody Against Putin) كارتيناسى جەڭىپ الدى.

ساحناعا كوتەرىلگەن رەجيسسەرلەر توبىنىڭ اراسىندا بۇرىن چەليابى وبلىسىندا مۇعالىم بولىپ جۇمىس ىستەگەن پاۆەل تالانكين بولدى. قولىنا التىن ءمۇسىندى ۇستاعان ول جينالعان جۇرتشىلىققا ورىس تىلىندە ۇندەۋ جاسادى. ونىڭ سوزىنشە، ادامدار بەيبىت اسپاندى ارماندايدى، الايدا كەيبىر وڭىرلەردە كۇن سايىن زىمىراندار مەن ۇشقىشسىز اپپاراتتار ۇشىپ جاتىر. تالانكين بارشاعا قايرىلا سويلەپ، سوعىس قيمىلدارىن دەرەۋ توقتاتۋعا شاقىردى!

ءفيلمنىڭ تاعى ءبىر اۆتورى، امەريكالىق رەجيسسەر دەۆيد بورەنشتەين تۋىندىنىڭ يدەياسىن ءتۇسىندىردى. ونىڭ پايىمداۋىنشا، بۇل لەنتا ادامنىڭ ءوز وتانىن قالاي جوعالتاتىنى جايلى سىر شەرتەدى. «بۇل ۇنسىزدىك پەن ىمىراشىلدىقتىڭ سالدارىنان بولاتىن قۇبىلىس»، - دەپ اتاپ ءوتتى بورەنشتەين.

مۇعالىمنىڭ تاۋەكەلى

پاۆەل تالانكين — بۇرىن كاراباش قالاسىنداعى جالپى ءبىلىم بەرەتىن مەكتەپتە ساباق بەرگەن پەداگوگ. 2022 جىلدىڭ اقپان ايىنان كەيىن وقۋ ورىندارىندا جۇرگىزىلەتىن تاربيە ساباقتارىنىڭ بارىسىن جاسىرىن تۇردە بەينەتۇسىرىلىمگە ءتۇسىرىپ وتىرعان. باستاپقىدا بۇل ماتەريالدار ەسەپ بەرۋ ءۇشىن قاجەت ەدى، دەگەنمەن كەيىن ولار ماڭىزدى دەرەكتى دالەلگە اينالدى. 2024 جىلى تالانكين ەلدەن كەتىپ، جيناعان جازبالارىن شەتەلدىك ارىپتەسىنە تاپسىرعان. وسىلايشا، ەكى رەجيسسەردىڭ بىرلەسكەن جۇمىسى دۇنيەگە كەلگەن. ايتا كەتەيىك، بۇعان دەيىن بۇل تۋىندى «ساندەنس» پەن «BAFTA» سىندى بەدەلدى كينوفەستيۆالداردا توپ جارىپ ۇلگەرگەن.

ماسكەۋدىڭ رەاكتسياسى

رەسەي فەدەراتسياسىنىڭ رەسمي وكىلدەرى بۇل ماراپاتقا قاتىستى پىكىر بىلدىرۋدەن باس تارتتى. ماسەلەن، پرەزيدەنت اكىمشىلىگىنىڭ وكىلى دميتري پەسكوۆ جۋرناليستەرگە اتالمىش ءفيلمدى كورمەگەنىن جەتكىزدى. ونىڭ سوزىنە سەنسەك، تۋىندىنىڭ مازمۇنىمەن تانىسپاي تۇرىپ، ەشقانداي تۇسىنىكتەمە بەرۋ مۇمكىن ەمەس.

مەملەكەتتىك تەلەارنالار دا بۇل جاڭالىقتى نازاردان تىس قالدىردى. «ءبىرىنشى ارنا»، «روسسيا-1» جانە «نتۆ» سياقتى ءىرى مەديارەسۋرستار تاڭعى اقپاراتتىق باعدارلامالارىندا «وسكار» جەڭىمپازدارىن اتاعان كەزدە بۇل ءفيلمدى تىلگە تيەك ەتپەگەن. تەك جەكەلەگەن ينتەرنەت-باسىلىمدار عانا ماراپات تۋرالى قىسقاشا حابارلاما جاريالادى.

كەيبىر مەملەكەتتىك دۋما وكىلدەرى بولسا، اتالمىش ماراپاتتىڭ ماڭىزى تومەندەپ كەتكەنىن ايتىپ، ونى ەلەمەۋگە شاقىردى. الايدا حالىقارالىق باسىلىمدار بۇل وقيعانى رەسەيلىك باق-تاعى تسەنزۋرانىڭ ايقىن كورىنىسى رەتىندە باعالاپ وتىر.

سيمۆولدىق بەلگى

پاۆەل تالانكين ماراپاتتاۋ كەشىندە ەرەكشە تانامونشاق (بروش) تاققان. ول كىشكەنتاي تەلەديدار پىشىنىندە جاسالىپ، ىشىندە «اققۋ كولى» بالەتىنىڭ كادرلارى كورسەتىلىپ تۇرعان. بۇل كەڭەس داۋىرىندەگى تەلەديداردىڭ سيمۆولى سانالادى. وسىلايشا رەجيسسەر رەسەيلىك ناسيحاتتىڭ بۇگىنگى ادىستەرى مەن كەڭەستىك وتكەن ءداۋىرى اراسىنداعى بايلانىستى مەڭزەگىسى كەلگەندەي.

قازىرگى ۋاقىتتا چەحيادا تۇراتىن تالانكين ءۇشىن بۇل جەتىستىك — تەك كاسىبي ماراپات قانا ەمەس، سونىمەن قاتار جەكە ەرلىكتىڭ دە كورىنىسى. ءوز وتانىندا ول الەۋمەتتىك جەلىلەردە سىنعا ۇشىراپ جاتسا دا، ونىڭ گولليۆۋد ساحناسىندا سويلەگەن ءسوزى الەمدىك باق-تا كەڭىنەن تارادى.

Abai.kz