ەلىمىزدە مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىپ جاتقان «تازا قازاقستان» تۇجىرىمداماسى اياسىندا «ءمولدىر بۇلاق» ەكولوگيالىق اكتسياسى باستالدى. اكتسيانىڭ ۇيىمداستىرىلۋى ناۋرىزناما ونكۇندىگىنىڭ «تازارۋ كۇنىمەن» تۇسپا-تۇس كەلىپ وتىر.

شارانىڭ ماقساتى - سۋ كوزدەرىن، بۇلاقتاردى، وزەن-كولدەر مەن تەڭىز جاعالاۋلارىن قوقىستان تازارتۋ، جاستاردىڭ بويىندا ەكولوگيالىق مادەنيەتتى قالىپتاستىرۋ.

بۇل يگى باستاماعا ەلىمىزدىڭ بارلىق مەكتەپ وقۋشىلارى، كوللەدج ستۋدەنتتەرى مەن ەرىكتى جاستار قولداۋ بىلدىرۋدە. اكتسيا اياسىندا بۇلاقتاردىڭ كوزىن اشۋ جانە اباتتاندىرۋ، جاعالاۋلاردى تۇرمىستىق قالدىقتاردان تازارتۋ، تابيعاتتى ايالاۋعا باعىتتالعان ەكولوگيالىق شارالار ۇيىمداستىرىلۋدا.

اكتسياعا العاشقىلاردىڭ ءبىرى بولىپ جامبىل وبلىسىنداعى «ءمولدىر بۇلاق» وقۋ-ساۋىقتىرۋ ورتالىعىندا كوكتەمگى كانيكۋلدا دەمالىپ جاتقان وقۋشىلار ۇلەس قوستى. ولار بۇلاق كوزىن اشىپ، ماڭايىن قوقىستان تازالادى. ال، شىمكەنت قالاسىنىڭ ەرىكتى جاستارى، كوللەدج ستۋدەنتتەرى قوشقار اتا وزەنىنىڭ جاعالاۋىندا سەنبىلىك ۇيىمداستىردى.

ماڭعىستاۋ وبلىسىنىڭ ستۋدەنتتەرى دە كاسپي تەڭىزىنىڭ جاعالاۋىندا وتكەن اكتسياعا اتسالىستى. شاراعا قاتىسۋشىلار قورشاعان ورتانى تازا ۇستاۋدىڭ ماڭىزدىلىعىن اتاپ وتەدى.

ايتا كەتەيىك، الداعى ءبىر اي ىشىندە «ءمولدىر بۇلاق» ەكولوگيالىق اكتسياسى ەلىمىزدىڭ باسقا وڭىرلەرىندە دە جالعاسىن تابادى.

Abai.kz