2026 جىلعى 26 ناۋرىزدا قر ۇەم تابيعي مونوپوليالاردى رەتتەۋ كوميتەتى موراتوري اياقتالعاننان كەيىنگى تاريفتىك ساياسات ماسەلەلەرى بويىنشا دوڭگەلەك ۇستەل وتكىزدى.

ءىس-شاراعا مەملەكەتتىك ورگانداردىڭ، ساراپشىلار قاۋىمداستىعىنىڭ جانە قوعام وكىلدەرى قاتىستى. تالقىلاۋ بارىسىندا جىلۋمەن جابدىقتاۋ، ەلەكترمەن جابدىقتاۋ، سۋمەن جابدىقتاۋ جانە سۋ بۇرۋ، سونداي-اق گازبەن جابدىقتاۋ سالالارىنداعى تاريفتىك رەتتەۋدىڭ نەگىزگى باعىتتارى قارالدى.

ۇكىمەت قابىلداعان شارالار كەشەنى ازاماتتاردىڭ تابىسىن قورعاۋعا جانە ينفلياتسيانى 10%-دان تومەن دەڭگەيدە ۇستاپ تۇرۋعا باعىتتالعانى اتاپ ءوتىلدى. 2026 جىلعى ناۋرىز ايىنىڭ سوڭىنا دەيىن كوممۋنالدىق تاريفتەردى كوتەرۋگە ەنگىزىلگەن موراتوري وسى كەزەڭدە تۇتىنۋشىلارعا تۇسەتىن تاريفتىك جۇكتەمەنىڭ ءوسۋىن تولىق بولدىرماۋعا جانە ءۇي شارۋاشىلىقتارىنىڭ قارجىلىق تۇراقتىلىعىن قامتاماسىز ەتۋگە مۇمكىندىك بەردى.

تالقىلاۋ قورىتىندىسى بويىنشا بىرىڭعاي ءتاسىل ايقىندالدى: موراتوري اياقتالعاننان كەيىن تاريفتىك ساياسات كەزەڭ-كەزەڭىمەن جانە تەڭگەرىمدى تۇردە جۇزەگە اسىرىلادى. بۇل رەتتە حالىققا تۇسەتىن قارجىلىق جۇكتەمە مينيمالدى دەڭگەيدە ساقتالادى، ال قابىلداناتىن شەشىمدەر ماسەلەنىڭ الەۋمەتتىك ماڭىزدىلىعىن ەسكەرە وتىرىپ قابىلدانادى.

كوممۋنالدىق ينفراقۇرىلىمدى جاڭعىرتۋ ماسەلەلەرىنە ەرەكشە نازار اۋدارىلدى. ينۆەستيتسيالىق جوبالاردى ىسكە اسىرۋ بەكىتىلگەن كەستەلەرگە سايكەس تولىق كولەمدە جالعاسۋدا، بۇل جەلىلەردىڭ توزۋىن تومەندەتۋگە جانە ءومىردى قامتاماسىز ەتۋ جۇيەلەرىنىڭ سەنىمدىلىگىن ارتتىرۋعا باعىتتالعان.

مەملەكەتتىك تاريفتىك ساياساتتىڭ نەگىزگى قاعيداتى رەتىندە تۇتىنۋشىلار مەن تابيعي مونوپوليا سۋبەكتىلەرىنىڭ مۇددەلەرى اراسىنداعى تەڭگەرىمدى قامتاماسىز ەتۋ بەلگىلەندى.

قابىلدانعان شارالاردىڭ جيىنتىق اسەرى 2026 جىلى ينفلياتسيالىق ۇدەرىستەرگە باقىلاۋداعى جانە ەكونوميكا مەن ازاماتتاردىڭ تابىستارى ءۇشىن قاۋىپسىز دەڭگەيدە ىقپال ەتۋگە مۇمكىندىك بەرەدى.

سونداي-اق الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ شارالارى قارالدى. وسى ماقساتتا وندىرۋشىلەر ءۇشىن ەلەكتر ەنەرگياسى باعاسىنىڭ جانە تەمىرجول تاسىمالدارى تاريفتەرىنىڭ ءوسۋىن تەجەۋ كوزدەلگەن، بۇل ءونىمنىڭ وزىندىك قۇنىن تومەندەتۋگە جانە نەگىزگى ازىق-تۇلىك تاۋارلارى باعاسىنىڭ ءوسۋىن تۇراقتاندىرۋعا ىقپال ەتەدى.

حالىقتى الەۋمەتتىك قورعاۋ ماسەلەلەرى باسىم باعىتتاردىڭ ءبىرى بولىپ قالا بەرەدى. الەۋمەتتىك تۇرعىدان وسال ساناتتاعى ازاماتتار ءۇشىن كوممۋنالدىق قىزمەتتەرگە جۇمسالاتىن شىعىنداردى وتەۋدى كوزدەيتىن تۇرعىن ءۇي كومەگى مەحانيزمى ارقىلى قوسىمشا قولداۋ كورسەتىلەدى.

دوڭگەلەك ۇستەل قورىتىندىسى بويىنشا تاريفتىك ساياساتتى ودان ءارى جەتىلدىرۋدىڭ نەگىزگى باعىتتارى ايقىندالىپ، ولار كوممۋنالدىق قىزمەتتەردىڭ قولجەتىمدىلىگىن قامتاماسىز ەتۋگە، ينفراقۇرىلىمنىڭ ساپاسى مەن سەنىمدىلىگىن ارتتىرۋعا جانە حالىق مۇددەسىن قورعاۋعا باعىتتالعان.

Abai.kz