بيىل ەگىس القاپتارىنىڭ جالپى اۋماعى 23,8 ملن گەكتاردان اسادى. بۇل تۋرالى ۇكىمەتتىڭ ءباسپاسوز قىزمەتى حابارلادى.

ءارتاراپتاندىرۋ قاعيداتتارىن ەنگىزۋ جانە جوعارى سۇرانىسقا يە داقىلدارعا باسا دەن قويۋ ىشكى نارىقتى الەۋمەتتىك ماڭىزى بار تاۋارلارمەن قامتاماسىز ەتۋگە جانە باعانىڭ اۋىتقۋ تاۋەكەلدەرىن تومەندەتۋگە مۇمكىندىك بەرەدى. ۇكىمەت وتىرىسىندا كوكتەمگى دالا جۇمىستارىنىڭ بارىسى تۋرالى اۋىل شارۋاشىلىعى ۆيتسە-ءمينيسترى ازات سۇلتانوۆ باياندادى.

ونىڭ ايتۋىنشا، بيىل ەگىس القاپتارىنىڭ جالپى اۋماعى 23,8 ملن گەكتاردى قۇرايدى، بۇل وتكەن جىلدىڭ كولەمىنەن 180 مىڭ گەكتارعا ارتىق. مايلى داقىلدار القابى 4 ملن گەكتاردان، جەمشوپ داقىلدارى القابى 3,3 ملن گەكتاردان اسادى. قايتا وڭدەۋ جوبالارىن شيكىزاتپەن قامتاماسىز ەتۋ ماقساتىندا جۇگەرى القابى 265 مىڭ گەكتارعا دەيىن كەڭەيتىلدى، ال ۇيىمداسقان شارۋاشىلىقتاردا كارتوپ وتىرعىزۋ 10 مىڭ گەكتارعا ۇلعايادى.

«مەملەكەت باسشىسىنىڭ تاپسىرماسى بويىنشا ءارتاراپتاندىرۋ جۇمىستارى جالعاسۋدا. وسى جىلى بيداي القابى 125 مىڭ گەكتارعا قىسقارىپ، 12,1 ملن گەكتاردى قۇرايدى، سونداي-اق سۋ رەسۋرستارىن ۇنەمدەۋ ماقساتىندا كۇرىش القاپتارى 20,2 مىڭ گەكتارعا وڭتايلاندىرىلدى، بۇل رەتتە تامشىلاتىپ سۋارۋعا ارنالعان ماقتا القاپتارى 29,8 مىڭ گەكتارعا ۇلعايادى. ەگىستىكتەردىڭ بەكىتىلگەن قۇرىلىمى ەگىننىڭ قاجەتتى كولەمىن الۋعا جانە سىرتقى سۇرانىس كونيۋنكتۋراسىن ەسكەرۋگە مۇمكىندىك بەرەدى»، - دەپ اتاپ ءوتتى ۆيتسە-مينيستر.

Abai.kz