اقش پرەزيدەنت دونالد ترامپ سارسەنبىدە (1 ءساۋىر) «يراننىڭ امەريكا قۇراما شتاتتارى مەن الەمگە توندىرگەن قاۋپى سەيىلۋ الدىندا تۇر» دەدى. سونداي-اق ءوزى جاريلاعان «ەپيكالىق قاھار وپەراتسياسىنىڭ» اسكەري ماقساتتارى «اياقتالۋعا جاقىن» ەكەنىن مالىمدەدى.

سارسەنبى كۇنى كەشكە تەلەديداردان سويلەگەن سوزىندە ترامپ اقش اسكەري كۇشتەرى يراننىڭ اسكەري-تەڭىز كۇشتەرى مەن اۋە كۇشتەرىن جويۋدى، قورعانىس ونەركاسىبى بازاسىن جانە يران تەرروريستىك رەجيمىنىڭ باسقارۋ جانە باقىلاۋ ورتالىقتارىن جويۋدى قوسا العاندا، ءوز ماقساتتارىنا «كەزەگىمەن» قول جەتكىزىپ جاتقانىن ايتتى.

ول بىلاي دەدى: «ءبىز قول جەتكىزگەن ناتيجە نەگىزىندە وسى كەشتە امەريكا قۇراما شتاتتارىنىڭ بارلىق اسكەري ماقساتتارىنا وتە جاقىن ارادا، تەزىرەك قول جەتكىزەمىز دەپ ايتا الامىن. الداعى ەكى-ءۇش اپتادا ءبىز ولارعا قارسى وتە قۋاتتى سوققى جاسايمىز».

ول وپەراتسيا كەزىندە قازا تاپقان 13 امەريكاندىق اسكەري قىزمەتشى ءۇشىن «جۇمىستى اياقتاۋعا» انت ەتتى.

«سونىمەن قاتار، ءبىز ولاردى تاس عاسىرىنا قايتارامىز»، - دەدى ترامپ. ول 2015 جىلعى ساياسي ناۋقاننىڭ العاشقى كۇنىنەن باستاپ يراننىڭ يادرولىق قارۋعا يە بولۋىنا «ەشقاشان» جول بەرمەۋگە انت بەرگەنىن قوستى.

ول يراننىڭ يادرولىق قارۋعا يە بولۋدىڭ «تابالدىرىعىندا» تۇرعانىن تىلگە تيەك ەتىپ،  «يادرولىق قارۋ ەشقاشان يران رەجيمىنە سەنىپ تاپسىرىلمايدى»، - دەپ قوستى.

«ەسىرگەن بۇل رەجيم 47 جىل بويى «امەريكاعا ءولىم» دەپ ۇرانداپ كەلەدى - بۇل مەن قىزمەتكە كىرىسۋدەن كوپ ۋاقىت بۇرىن-اق شەشىلۋى كەرەك ەدى. بۇگىن كەشتەن باستاپ ءاربىر امەريكاندىق يران اگرەسسياسى مەن يادرولىق بوپسالاۋدىڭ زۇلىمدىعىنان اقىرى ارىلاتىن كۇندى اسىعا كۇتەدى. ءبىز قابىلداعان ارەكەتتەردىڭ ارقاسىندا يراننىڭ امەريكا قۇراما شتاتتارى مەن الەمگە توندىرەتىن زۇلىم قاتەرىن توقتاتۋدىڭ شەشۋشى كەزەڭىندە تۇرمىز»، -  دەدى.

ول امەريكا قۇراما شتاتتارى ايماقتاعى ەلدەردى، سونىڭ ىشىندە ءيزرايلدى، ساۋد ارابياسىن، كاتاردى، كۋۆەيتتى، بىرىككەن اراب امىرلىكتەرىن جانە باحرەيندى قولدايتىنىن ايتتى.«ولاردىڭ ارقانداي فورماداعى قاتەر مەن قۇقايعا ۇشىراماۋىنا» ۋادە بەردى.

ستراتەگيالىق تۇرعىدان ماڭىزدى ورمۋز بۇعازى ارقىلى مۇناي تاسىمالداۋدىڭ توسىلۋىنا قاتىستى ترامپ تاعى دا بۇعازدى اشۋعا كومەكتەسپەگەن ەلدەرگە نارازىلىعىن ءبىلدىردى. الەمدىك مۇنايدىڭ جيىرما پايىزى وسى ماڭىزدى سۋ جولىنان ءوتۋى كەرەك. ول ورمۋز بۇعازىنا تاۋەلدى ەلدەرگە «وتكەلدى باسقارۋدى» تاپسىردى.

"وتىنعا قول جەتكىزە المايتىن ەلدەر ءۇشىن – ولاردىڭ كوپشىلىگى يرانعا قارسى اسكەري ارەكەتكە قاتىسۋدان باس تارتقان – مەنىڭ  بىر ۇسىنىسىم بار: بىرىنشىدەن، امەريكا قۇراما شتاتتارىنان مۇناي ساتىپ الىڭىز; بىزدە جەتكىلىكتى قور بار... ەكىنشىدەن: كەش بولسادا باتىل.قادام جاساپ... بۇعازعا بارىڭىز، ونى تىكەلەي باقىلاۋعا الىڭىز، قورعاڭىز جانە ءوزىڭىز ءۇشىن پايدالانىڭىز. قيىن بولىگى اياقتالدى، سوندىقتان بۇل وڭاي بولۋى كەرەك", - دەپ ءسوزىن تۇيىندەدى اق ءۇي باسشىسى.

Abai.kz