سارسەنبى كۇنى باق وكىلدەرىنىڭ.: «كيم چەن ىنمەن بيىل كەزدەسەسىز بە؟!» دەگەن سۇراعىنا اق ءۇي باسشىسى ترامپ: «ءيا، مەن ونىمەن كەزدەسەمىن» دەپ جاۋاپ بەرگەن. ەگەر راسىندا كەزدەسۋ وتسە، بۇل ەكى كوشباسشى اراسىنداعى ءتورتىنشى كەزدەسۋ بولادى. كەيبىر ساراپشىلار كەزدەسۋ قاراشا ايىندا قىتايدا وتەتىن APEC ءسامميتى كەزىندە ءوتۋى مۇمكىن دەپ بولجايدى.

ترامپ پرەزيدەنتتىككە كەلگەلى بەرى سولتۇستىك كورەيا ديكتاتورىمەن ەرەكشە قارىم-قاتىناستا ەكەنىن ايتىپ كەلەدى، ال اقش بارلاۋ اگەنتتىكتەرى كيم چەن ىننىڭ مەملەكەتىن اقش قاۋىپسىزدىگىنە ۇلكەن قاۋىپ توندىرەدى دەپ سانايدى.

ترامپ پەن كيم چەن ىن اراسىنداعى «ەرەكشە قارىم-قاتىناس» اقش پرەزيدەنتى جەكسەنبى كۇنى وڭتۇستىك كورەيامەن بىرلەسكەن اسكەري جاتتىعۋلاردى قىسقارتۋ تۋرالى شەشىم قابىلداعان كەزدە تاعى دا كوپشىلىكتىڭ نازارىنا ىلىكتى. ترامپ بىرلەسكەن جاتتىعۋلار پحەنيانعا «مۇلدەم ورىنسىز جانە دۇشپاندىق سيگنال» جىبەرەدى دەپ مالىمدەدى. وڭتۇستىك كورەيا اسكەريلەرى باستاپقىدا 27 تامىزعا دەيىن جالعاسۋى ءتيىس اقش-پەن بىرلەسكەن جاتتىعۋلار جۇما كۇنى اياقتالاتىنىن جەتكىزدى.

دەگەنمەن، كيم چەن ىننىڭ ىقپالدى اپكەسى كيم يو چجون سارسەنبىدە اعاسى مەن ترامپتىڭ كەزدەسۋى تۋرالى «مۇلدەم بىلمەيتىنىن» مالىمدەدى، بۇل اقش پرەزيدەنتىنىڭ سوزىنە كەرەعار.

بىراق كيم يو چجون مالىمدەمەسىندە ترامپ پەن كيم اراسىنداعى قارىم-قاتىناس «وتە جاقسى» ەكەنىن اتاپ وتكەن. سونىمەن قاتار ترامپتىڭ بىرلەسكەن جاتتىعۋلارعا قاتىستى شەشىمى «پىكىر ايتۋعا تۇرارلىق ەمەس» جانە «ماعىناسىز» دەگەن.

سارسەنبى كۇنى ترامپ سولتۇستىك كورەيانىڭ يادرولىق ارسەنالىنا ناقتى باعا بەرىپ، ەلدە «57 يادرولىق بومبا بار» دەپ مالىمدەدى. ول: «بۇل بولماۋى كەرەك ەدى. (...) ەگەر مەن پرەزيدەنت بولسام، بۇعان ەشقاشان جول بەرمەس ەدىم»، - دەپ قوستى. امەريكا قۇراما شتاتتارى سولتۇستىك كورەيانى رەسمي تۇردە يادرولىق دەرجاۆا رەتىندە تانىمايدى.

ترامپتىڭ ۇستانىمىنىڭ اياق استىنان وزگەرۋى امەريكا قۇراما شتاتتارىنىڭ تاريحي وداقتاسى وڭتۇستىك كورەيا ءۇشىن كۇتپەگەن سوققى بولدى. وڭتۇستىك كورەيانىڭ سىرتقى ىستەر ءمينيسترى چو حيون دجۋ سارسەنبى كۇنى ۇلتتىق اسسامبلەياعا سەۋل جاتتىعۋدىڭ ۋاقىتىن قىسقارتۋ تۋرالى الدىن الا حابارلاما الماعانىن ءتۇسىندىردى.

وڭتۇستىك كورەيادا اقش-تىڭ 28 500 اسكەرى بار، ولاردىڭ ءبىر ءبولىمى 18 000 وڭتۇستىك كورەيالىق اسكەرىمەن بىرگە جاتتىعۋلارعا قاتىسۋى ءتيىس ەدى.

اقش پەن وڭتۇستىك كورەيانىڭ بىرلەسكەن اسكەري جاتتىعۋلارىن توقتاتۋ– سولتۇستىك كورەيانىڭ امەريكا قۇراما شتاتتارىمەن ديالوگ جۇرگىزۋ ءۇشىن قويعان العىشارتتارىنىڭ ءبىرى ەكەنى ايتىلۋدا.

Abai.kz