حالىقارالىق اقپارات قۇرالدارىنىڭ حابارلاۋىنشا، اقش پەن يران اراسىندا ەكى اپتاعا سوزىلعان شيەلەنىستەن كەيىن ۋاقىتشا بىتىمگە كەلۋ تۋرالى كەلىسىم جاسالدى. الايدا تاراپتاردىڭ ارقايسىسى بۇل كەلىسىمدى ءوز جەڭىسى رەتىندە باعالاپ وتىر.

CNN مالىمەتىنشە، كەلىسىمگە قول جەتكىزىلگەننەن كەيىن يران تاراپى ورمۋز بۇعازى ارقىلى وتەتىن تەڭىز جولدارىنىڭ قاۋىپسىزدىگىن قامتاماسىز ەتۋ ءۇشىن اسكەري قۇرىلىمدارىمەن ۇيلەستىرۋ جۇرگىزەتىنىن مالىمدەدى. سونىمەن قاتار، پاكىستان اقش پەن يراندى جۇما كۇنى يسلامابادتا كەلىسسوز جۇرگىزۋگە شاقىرعان.

ال BBC دەرەگىنە سۇيەنسەك، ءدال وسى بىتىمگە قول جەتكىزۋدە پاكىستان ماڭىزدى دەلدالدىق ءرول اتقارعان. انونيم تۇردە پىكىر بىلدىرگەن پاكىستاندىق دەرەككوز كەلىسسوزدەردىڭ «جوعارى قارقىنمەن» وتكەنىن ايتىپ، ەلدىڭ يران مەن اقش اراسىندا بايلانىس ورناتۋشى بولعانىن جەتكىزدى. ونىڭ سوزىنشە، كەلىسسوزدەرگە قاتىسقان توپ وتە شاعىن بولعان جانە احۋال «سالماقتى ءارى ۇمىتكە تولى» سيپاتتا وربىگەن.

پاكىستان سوڭعى اپتالاردا ەكى ەل اراسىندا حابار جەتكىزۋشى رەتىندە ارەكەت ەتىپ، ۇزاق جىلداردان بەرى يرانمەن قالىپتاسقان «باۋىرلاستىق» قاتىناسىن پايدالاندى. سونىمەن قاتار، اقش-پەن دە بايلانىسى نازار اۋدارتادى. بۇعان دەيىن اقش-تىڭ بۇرىنعى پرەزيدەنتى Donald Trump پاكىستان ارمياسىنىڭ باسشىسى Asim Munir تۋرالى جىلى پىكىر ءبىلدىرىپ، ونى «ەڭ سۇيىكتى فەلدمارشالىم» دەپ اتاعانى بەلگىلى.

دەگەنمەن كەلىسىمگە كەلۋ وڭاي بولعان جوق. پاكىستاننىڭ سىرتقى ىستەر ءمينيسترى Ishaq Dar پارلامەنتتەگى سوزىندە جاعدايدىڭ ءبىرشاما جاقسارعانىن ايتقانىمەن، ءيزرايلدىڭ يرانعا جاساعان شابۋىلى جانە يراننىڭ ساۋد ارابياسىنا جاۋاپ سوققىسى جاعدايدى كۇردەلەندىرگەنىن مالىمدەدى. ونىڭ ايتۋىنشا، پاكىستان «احۋالدى مۇمكىندىگىنشە باقىلاۋدا ۇستاۋعا تىرىسقان».

ال Sky News حابارلاۋىنشا، دونالد ترامپ ءبىتىم جاريالانعاننان كەيىن بىرنەشە ساعات وتكەن سوڭ امەريكالىق تىلشىمەن تەلەفون ارقىلى سويلەسىپ، كەلىسىمنىڭ سوڭعى ساتتە جۇزەگە اسقانىن راستاعان.

ساراپشىلاردىڭ پىكىرىنشە، بۇل ءبىتىم ازىرگە وتە نازىك جانە ۋاقىتشا سيپاتقا يە. ايماقتاعى گەوساياسي شيەلەنىس تولىق شەشىلگەن جوق، ال پاكىستاننىڭ دەلدالدىق ءرولى الداعى كەلىسسوزدەردە دە ماڭىزدى بولا بەرۋى مۇمكىن.

Abai.kz