قازاقستاندا لاگەرلەردىڭ قىزمەتى ليتسەنزيالانادى. جاڭا زاڭ نورماسى 1 ساۋىردەن باستاپ كۇشىنە ەندى. ليتسەنزيانىڭ مەرزىمى بۇرىنعى 1 جىلدان 5 جىلعا دەيىن ۇزارتىلدى.

بۇنداعى باستى ماقسات - ءبىلىم بەرۋ-ساۋىقتىرۋ ورتالىقتارىنىڭ قىزمەتىن باقىلاۋدى كۇشەيتۋ. لاگەرلەرگە قويىلاتىن تالاپتاردىڭ وزگەرۋى تۋرالى قر وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ باسقارما باسشىسى اسىل تۇيمەباەۆ «24KZ» تەلەارناسىنداعى «ءتۇيىن» باعدارلاماسىنا بەرگەن سۇحباتىندا ايتىپ بەردى. ەندى لاگەر عيماراتى جالعا الىنسا، ونى جالداۋ مەرزىمى 10 جىلعا دەيىن بولۋى شارت.

«ەڭ ءبىرىنشى تالاپ - عيماراتتىڭ بولۋى نەمەسە ونىڭ جالداۋ ۋاقىتى 10 جىلعا دەيىن بولۋى. ول بىزگە تۇراقتىلىقتى كورسەتەدى. ەكىنشى تالاپ - باسشىلىق نەمەسە پەداگوگتاردىڭ ساپالىق قۇرامى. سونداي-اق، ءورت قاۋىپسىزدىگى، تاماقتاندىرۋ بويىنشا تالاپتاردان ءوتۋى ياعني سانيتارلىق-ەپيدەميولوگيالىق دەپارتامەنتتىڭ وڭ شەشىمى بولۋى دەگەن سياقتى تالاپتار قويىلادى. جەرگىلىكتى اتقارۋشى ورگاندار بارلىق جۇمىستاردىڭ ۇيلەستىرىلۋىنە جاۋاپ بەرەدى»، - دەدى اسىل تۇيمەباەۆ.

سپيكەردىڭ ايتۋىنشا، جىل بويى جۇمىس ىستەيتىن (ولاردىڭ سانى 17) جانە ماۋسىمدىق جۇمىس ىستەيتىن (ولاردىڭ سانى 192) ۇيىمدارعا قويىلاتىن تالاپتاردىڭ ايىرماشىلىعى بار.

«باقىلاۋ كۇشەيتىلدى. ليتسەنزيا الۋعا ءوتىنىم بىلدىرگەن ۇيىمدار بەلگىلى ءبىر تالاپتاردى ورىنداپ بارىپ ليتسەنزيا الادى. ءبىز ليتسەنزيانى 5 جىلعا بەرەمىز الايدا ءار ماۋسىم باستالاردا جاڭاعى ايتىلعان تالاپتاردىڭ بارلىعىنا قايتادان تەكسەرىستەر وتكىزىلىپ وتىرادى»، - دەپ قورىتتى باعدارلاما قوناعى.

ايتا كەتەيىك، بيىلعى جاز ايلارىندا رەسپۋبليكالىق دەڭگەيدەگى 17 مىڭ ءبىلىم بەرۋ-ساۋىقتىرۋ ورتالىعى جۇمىس ىستەيدى. ول جەرلەردە 18 مىڭعا جۋىق بالا دەمالىسىن وتكىزەدى. سونداي-اق، مەكتەپ جانىنداعى لاگەرلەردە 2 ملن 900 مىڭعا جۋىق بالا دەمالادى. ەلىمىزدە بيىل جاڭا 50 لاگەر اشىلادى.

باعدارلامانىڭ تولىق نۇسقاسى:

https://youtu.be/iOOEXZXFVDY?si=hJQ21hQCua7Iwti9

Abai.kz