بۇگىن وبلىس اكىمى بەيبىت يساباەۆ «جەتىسۋ» كلۋبىنىڭ سپورتشىلارى مەن جاتتىقتىرۋشىلار قۇرامىن قابىلداپ، ولاردى قازاقستان رەسپۋبليكاسىنىڭ ايەلدەر كوماندالارى اراسىنداعى ۇلتتىق ليگانىڭ XXXIV چەمپيوناتىنداعى جەڭىسىمەن قۇتتىقتادى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ەسكە سالساق، بىرنەشە كۇن بۇرىن استانادا ۇلتتىق ليگانىڭ كەزەكتى ماۋسىمى اياقتالىپ، وندا جەتىسۋلىق ايەلدەر كومانداسى ەلدەگى ەڭ مىقتى كلۋبتاردىڭ ءبىرى ەكەنىن تاعى ءبىر مارتە دالەلدەپ، جەڭىس تۇعىرىنا كوتەرىلىپ، قازاقستاننىڭ ون دۇركىن چەمپيونى اتانعان بولاتىن.

ءوڭىر باسشىسى بۇل جەڭىستىڭ بارشامىز ءۇشىن ورتاق ماقتانىش ءارى  كاسىبيلىكتىڭ جارقىن ۇلگىسى ەكەنىن اتاپ ءوتتى.

– تاۋەلسىز قازاقستاننىڭ تاريحىندا سىزدەر ون دۇركىن چەمپيون اتانىپ، رەكورد ورناتقان العاشقى كومانداسىزدار. بۇل – ۇلكەن جەتىستىك. ورتاق جەڭىسكە قوسقان ۇلەستەرىڭىز ءۇشىن ءاربىر ويىنشىعا جانە جاتتىقتىرۋشىلار قۇرامىنا العىسىمدى بىلدىرەمىن. جەڭىسكە جەتەلەيتىن كوماندالىق رۋح پەن بىرلىك، جىگەر مەن تاجىريبە، ماقسات پەن سەنىم سياقتى قارىم-قابىلەتتىڭ ءبارى سىزدەردىڭ بويلارىڭىزدان تابىلادى. ءبىز سپورتقا قولداۋ كورسەتۋدى بۇدان بىلاي دا جالعاستىرامىز. سىزدەرگە جاڭا جەڭىستەر مەن بيىك بەلەستەر تىلەيمىن! – دەگەن بەيبىت يساباەۆ الدا وتەتىن ازيا چەمپيوندار ليگاسىنداعى ويىندارعا ساتتىلىك تىلەدى. سول سياقتى «جەتىسۋ» ۆولەيبول كومانداسىنىڭ 25 جىلدىق مەرەيتويىنا وراي كلۋب بازاسىندا ونىڭ تاريحىن پاش ەتەتىن مۋزەي قۇرۋ تۋرالى ۇسىنىسىن جەتكىزدى.

ءوز كەزەگىندە كوماندانىڭ باس باپكەرى ماركو گرشيچ كلۋبقا كورسەتىلىپ جاتقان قولداۋ ءۇشىن العىسىن ءبىلدىردى.

– قازىرگى سپورتتا ناتيجە كەزدەيسوق بولمايدى – بۇل جۇيەلى ءارى تۇراقتى ەڭبەكتىڭ جەمىسى. بۇل تيتۋل – تەك كوماندانىڭ جەڭىسى عانا ەمەس، ورتاق ەڭبەكتىڭ ناتيجەسى. كلۋبتىڭ ءاربىر مۇشەسى جاۋاپكەرشىلىك سەزىنىپ، ءوز ۇلەسىن قوستى، سوندىقتان بۇل جەتىستىك ءبىز ءۇشىن ەرەكشە قۇندى. اسىرەسە، ويىنشىلارىمىز ماۋسىم بويى مىنەز تانىتىپ، جوعارى دەڭگەيدە ويىن كورسەتتى، – دەگەن م. گرشيچ بۇدان بىلاي دا كلۋبتى دامىتۋ جانە وبلىس پەن قازاقستاندى جوعارى دەڭگەيدە لايىقتى تانىتۋ ءۇشىن بار كۇش-جىگەرىن جۇمسايتىندارىنا سەندىردى.

كوماندا ويىنشىسى ماريا فرولوۆا وزدەرىنىڭ ساپالى جاتتىعۋىنا بارلىق جاعداي جاسالعانىن اتاپ ءوتىپ:

– بىزگە جاتتىعۋعا، تىنباي ەڭبەكتەنىپ، جەڭىسكە جەتۋگە بارلىق جاعداي جاسالعانىن تاجىريبەلى ويىنشى رەتىندە سەنىممەن ايتا الامىن. ءبىز بيىكتەن كورىنۋگە بار كۇشىمىزدى سالىپ كەلەمىز. قولداۋ كورسەتكەنى ءۇشىن وبلىس باسشىلىعىنا، جەڭىسكە جەتۋگە جول نۇسقاعانى ءۇشىن باپكەرلەرگە، جاتتىعۋ مەن ويىن بارىسىندا بارىن سالعان ارىپتەستەرىمە زور العىسىمدى بىلدىرەمىن، – دەدى.

ايتا كەتەيىك، ماۋسىم قورىتىندىسى بويىنشا «جەتىسۋ» ايەلدەر ۆولەيبول كومانداسى نەگىزگى تۋرنيرلەردە جەڭىسكە جەتىپ، ءوزىن دارا كوشباسشى رەتىندە تانىتتى. ناقتىراق ايتقاندا، قازاقستان رەسپۋبليكاسىنىڭ چەمپيوناتىندا، ەل سۋپەركۋبوگىندا توپ جاردى. بۇل رەتتە ماريا فرولوۆا «ەڭ قۇندى ويىنشى» (MVP), داريا شارگورودسكايا «ۇزدىك بايلانىستىرۋشى»، ۆالەريا ياكۋتينا «ۇزدىك توسقاۋىلشى»، ال مياو يۆەن «ۇزدىك شابۋىلشى» اتاندى.

ەندى ءساۋىر ايىنىڭ سوڭىندا كوماندانى جاڭا سىناق كۇتىپ تۇر، ياعني جەتىسۋلىق ۆولەيبولشىلار تايلاندتا وتەتىن ازيا چەمپيوندار ليگاسىنا قاتىسادى. ءوڭىر باسشىلىعى سپورتشىلاردىڭ وبلىس پەن ەل نامىسىن حالىقارالىق ارەنادا لايىقتى قورعايتىنىنا سەنىم ءبىلدىردى.

 Abai.kz