«زاڭ مەن ءتارتىپ» يدەولوگەماسىن ىسكە اسىرۋ اياسىندا ەلوردالىق پروكۋراتۋرا پوليتسيا دەپارتامەنتىمەن جانە اكىمدىكپەن بىرلەسىپ، № 4 قالالىق ەمحانادا ەسىرتكى قۇمارلىقتىڭ الدىن الۋ جانە مەديتسينا قىزمەتكەرلەرى اراسىندا ەڭبەك زاڭناماسى نورمالارىن ساقتاۋ بويىنشا ءتۇسىندىرۋ جۇمىستارىن جۇرگىزدى، دەپ حابارلايدى ەلوردا اكىمدىگىنىڭ رەسمي سايتى.
جىل باسىنان بەرى ەلوردادا ەسىرتكىنىڭ زاڭسىز اينالىمىنا بايلانىستى 288-گە جۋىق قىلمىستىق ءىس  قوزعالسا، ونىڭ 95-تەن استامى ەسىرتكى وتكىزۋمەن اينالىسقان تۇلعالارعا قاتىستى. زاڭسىز اينالىمنان 42 كيلوگراممعا جۋىق ەسىرتكى زاتى تاركىلەندى.
استانا قالاسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ ءبولىم باستىعى اليا قيباتقىزىنىڭ ايتۋىنشا، زاڭسىز ارەكەتتەرگە كوبىنەسە جاستار تارتىلادى.
«سينتەتيكالىق ەسىرتكىلەر ەرەكشە قاۋىپ توندىرەدى، سەبەبى ولار ادام بويىندا لەزدە فيزيكالىق تاۋەلدىلىك تۋدىرادى. ولاردى تاراتۋ جاسىرىن جارنامالار مەن ينتەرنەت-رەسۋرستار ارقىلى بەلسەندى تۇردە جۇزەگە اسىرىلۋدا»، — دەپ اتاپ ءوتتى ول.
مامانداردىڭ مالىمەتىنشە، ۇستالعانداردىڭ كوبى وزدەرىنىڭ ەسىرتكى تاراتىپ جۇرگەنىن ءتىپتى سەزبەگەن دە. سونىمەن قاتار، «كۋرەر» بولىپ جالداناتىنداردىڭ «مانسابى» ادەتتە ەكى ايدان اسپايدى.
قاسكويلەر تىيىم سالىنعان زاتتاردى تاراتۋ ءۇشىن ءتۇرلى ادىستەردى قولدانادى: گراففيتي-جازۋلار قالدىرادى، QR-كودتارى بار بيلبوردتار ورناتادى، پاراقشالار تاراتادى، شتامپتاردى پايدالانادى جانە ينتەرنەت-سايتتار قۇرادى. جىل باسىنان بەرى ەسىرتكى زاتتارىن جارنامالايتىن 488-دەن استام ينتەرنەت-رەسۋرس انىقتالدى.
پوليتسيا ەسىرتكى قىلمىستارى اۋىر جانە اسا اۋىر ساناتقا جاتاتىنىن ەسكەرتتى. ول ءۇشىن قىلمىستىق جاۋاپكەرشىلىك 14 جاستان باستالادى.
قازاقستان رەسپۋبليكاسى قىلمىستىق كودەكسىنىڭ 297-بابىنا سايكەس، ەسىرتكى قۇرالدارىن، پسيحوتروپتىق زاتتاردى جانە ولاردىڭ انالوگتارىن وتكىزۋ ماقساتىندا زاڭسىز يەمدەنۋ، ساقتاۋ، تاسىمالداۋ، جونەلتۋ نەمەسە وتكىزۋ مۇلكى تاركىلەنىپ، بەس جىلدان سەگىز جىلعا دەيىنگى مەرزىمگە باس بوستاندىعىنان ايىرۋمەن جازالانادى.
ءتارتىپ ساقشىلارى ەگەر قالا تۇرعىندارىنا پسيحواكتيۆتى زاتتاردى ساقتاۋ نەمەسە وتكىزۋ دەرەكتەرى، سونداي-اق وسى قۇقىق بۇزۋشىلىقتارعا قاتىسى بار ادامدار تۋرالى اقپارات بەلگىلى بولسا، استانا قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ ءانونيمدى سەنىم تەلەفوندارىنا حابارلاۋعا بولاتىنىن ەسكە سالدى.
قوڭىراۋلار تاۋلىك بويى كەلەسى نومىرلەر بويىنشا قابىلدانادى: 71-63-93 جانە 102.
سونىمەن قاتار، سپيكەرلەر مەديتسينا قىزمەتكەرلەرىنىڭ كۇن سايىن جوعارى قاۋىپ جاعدايىندا جۇمىس ىستەيتىنىن اتاپ ءوتتى. بۇعان ماس كۇيدەگى نەمەسە ەسىرتكىگە ەلىتكەن پاتسيەنتتەرگە بارۋ، سونداي-اق باسقا دا قاۋىپتى جاعدايلار جاتادى.
مەديتسينا قىزمەتكەرلەرىنىڭ قاۋىپسىزدىگىن ارتتىرۋ ماقساتىندا جەدەل مەديتسينالىق جاردەم قىزمەتى دەڭگەيىندە زاماناۋي باقىلاۋ جانە قورعاۋ شارالارى ەنگىزىلۋدە. اتاپ ايتقاندا، بارلىق بريگادالاردا اۋديومونيتورينگ ەنگىزىلدى. بۇل جۇيە قاقتىعىستاردى ازايتۋعا، سويلەسۋ مادەنيەتىن جاقسارتۋعا، دالەلدەمەلىك بازانى قامتاماسىز ەتۋگە جانە مەديتسينا قىزمەتكەرلەرىنىڭ قۇقىقتىق قورعالۋىن كۇشەيتۋگە مۇمكىندىك بەرەدى.
ەستەرىڭىزگە سالا كەتەيىك، قازاقستان رەسپۋبليكاسىنىڭ قىلمىستىق كودەكسىنە مەديتسينا قىزمەتكەرلەرى مەن جەدەل جاردەم جۇرگىزۋشىلەرىنە قىزمەتتىك مىندەتتەرىن اتقارۋ كەزىندە قوقان-لوققى كورسەتكەنى جانە كۇش قولدانعانى ءۇشىن جاۋاپكەرشىلىكتى بەلگىلەيتىن جاڭا 380-3-باپ ەنگىزىلگەن بولاتىن.

Abai.kz