بۇگىن قازاقستاندا مەملەكەت باسشىسى قاسىم-جومارت توقاەۆتىڭ باستاماسىمەن بەكىتىلگەن ۇلتتىق كىتاپ كۇنىمەن قاتار كىتاپحاناشىلار كۇنى دە اتالىپ وتۋدە. پرەزيدەنت كىتاپتىڭ قوعام دامۋىنداعى ايرىقشا ورنىن ۇنەمى ايتىپ كەلەدى. مەملەكەت باسشىسى: «كىتاپ وقىعان ۇرپاق وزىق ويلى بولادى. ساپالى ۇلت وسىنداي قۇندىلىقتار ارقىلى قالىپتاسادى»، – دەگەن بولاتىن.
بۇگىندە ەلىمىزدە 12 مىڭعا جۋىق كىتاپحانا بار. بۇل سالادا 20 مىڭعا تارتا مامان ەڭبەك ەتىپ ءجۇر.
مەملەكەت باسشىسى جۋىردا اتاپ وتكەندەي، كىتاپ ءالى دە ءبىلىم مەن تۇلعالىق دامۋدىڭ ماڭىزدى قاينار كوزى بولىپ قالا بەرەدى. وسىعان وراي قازىرگى ۋاقىتتا كىتاپحانا ءىسىن جاڭعىرتۋعا ەرەكشە ءمان بەرىلىپ وتىر. كىتاپحانالار اۆتوماتتاندىرىلعان جۇيەلەرگە كوشىپ، جاساندى ينتەللەكت تەحنولوگيالارىن ەنگىزىپ، ەلەكتروندىق رەسۋرستارىن دامىتىپ كەلەدى. سونىڭ ناتيجەسىندە ازاماتتارعا كىتاپ قورىنا قاشىقتان قول جەتكىزۋ مۇمكىندىگى كەڭەيە ءتۇستى. مەملەكەتتىك ونلاين پلاتفورمالاردا دا تۇراقتى ءوسىم بايقالادى. ەلەكتروندىق كىتاپحانا رەسۋرستارىن پايدالانۋشىلار سانى 30 پايىزعا ارتىپ، 718 مىڭ ادامعا جەتتى.
جالپى، كەيىنگى بەس جىلدا ونلاين وقىرماندار سانى 4 ميلليوننان، ەلەكتروندىق فورماتتا قارالعان كىتاپتار سانى 9 ميلليوننان اسىپ وتىر.
ەڭ باستىسى، ەل ىشىندە كىتاپ وقۋعا دەگەن قىزىعۋشىلىقتىڭ تۇراقتى تۇردە ارتىپ كەلە جاتقانى انىق بايقالادى. اسىرەسە بالالار ادەبيەتىنە سۇرانىس ەداۋىر كوبەيدى. تەك سوڭعى ءبىر جىلدىڭ وزىندە بالالار كىتاپتارىنا سۇرانىس 75 پايىزعا ارتسا، قازاق تىلىنە اۋدارىلعان كلاسسيكالىق قازاق ادەبيەتى مەن الەم كلاسسيكاسىنا دەگەن قىزىعۋشىلىق 50 پايىزعا ءوستى. بۇل قازاقستانداعى وقىرمان قاۋىمنىڭ اۋقىمى كەڭەيىپ، تالعامى تەرەڭدەپ، ساناسى سەرگەك بولا تۇسكەنىن اڭعارتادى.
پرەزيدەنتتىڭ «كىتاپ وقيتىن ۇلت» تۇجىرىمداماسى اياسىندا ەلىمىزدە كىتاپحانالار سالۋ جانە ولاردى جاڭعىرتۋ باعىتىندا اۋقىمدى جۇمىس جۇرگىزىلىپ جاتىر. استانا، الماتى جانە قىزىلوردا قالالارىندا جاڭا پرەزيدەنت كىتاپحانالارى سالىناتىن بولدى.
قازىردىڭ وزىندە 36 قالالىق جانە اۋىلدىق كىتاپحانا جاڭعىرتىلدى. ال، 2026 جىلى تاعى 30 كىتاپحانانى جاڭارتۋ جوسپارلانىپ وتىر.
بۇگىندە ۇلتتىق كىتاپ كۇنى جاڭا مازمۇندا، كەڭ كولەمدە اتالىپ ءوتىپ جاتقانىن دا ەرەكشە اتاپ وتكەن ءجون. قر مادەنيەت جانە اقپارات مينيسترلىگى ۇلتتىق كىتاپ كۇنىنە وراي بۇكىل ەل كولەمىندە ونكۇندىك ۇيىمداستىردى. وعان ءبىلىم جانە مادەنيەت ۇيىمدارى، كىتاپحانالار، كوللەدجدەر، جوعارى وقۋ ورىندارى مەن قوعامدىق بىرلەستىكتەر قاتىسۋدا. ءتۇرلى اقپاراتتىق الاڭداردا كىتاپقا، كىتاپ وقۋعا، كىتاپحانالاردىڭ رولىنە جانە وقۋ مادەنيەتىن دارىپتەۋگە ارنالعان 10 مىڭعا جۋىق ماتەريال جاريالاندى.
جالپى ەل بويىنشا كىتاپ وقۋ مادەنيەتىن دامىتۋعا جانە قوعامنىڭ زياتكەرلىك الەۋەتىن نىعايتۋعا باعىتتالعان 100 مىڭعا جۋىق ءىس-شارا ءوتىپ جاتىر. ولاردىڭ قاتارىندا كىتاپ فەستيۆالدەرى، جارمەڭكەلەر، اۆتورلارمەن كەزدەسۋلەر، ءتۇرلى اكتسيالار، ادەبي كەشتەر، بالالار مەن جاستارعا ارنالعان اعارتۋشىلىق ءىس-شارالار بار.
قالامگەرلەر مەن باسپا ءىسىن مەملەكەتتىك قولداۋ جۇيەسى دە تۇراقتى تۇردە دامىپ كەلەدى. ەلوردادا ءوتىپ جاتقان IX حالىقارالىق Astana Eurasian Book Fair كىتاپ كورمە-جارمەڭكەسىندە بۇگىن «ۇلتتىق كىتاپ» بايقاۋى قورىتىندىلاندى. توعىز اتالىم بويىنشا جەڭىمپازدار انىقتالىپ، «جىل كىتابى» دا جاريالانادى.
سونىمەن قاتار جاس جازۋشىلارعا ارنالعان پرەزيدەنتتىك ارناۋلى ادەبي سىيلىق، «قازاقستاننىڭ حالىق جازۋشىسى» قۇرمەتتى اتاعى جانە «ايبوز» ۇلتتىق ادەبي سىيلىعى تاعايىندالعان.
قازاقستان جازۋشىلار وداعىمەن ستراتەگيالىق ارىپتەستىك اياسىندا دا بىرقاتار ءىرى جوبالار جۇزەگە اسىرىلىپ كەلەدى. ولاردىڭ قاتارىندا «جاڭا قازاقستاننىڭ ادەبي-تانىمدىق پانوراماسى» جانە «جازۋشىلاردىڭ ادەبي شەبەرلىك مەكتەبى» جوبالارى بار. بيىل قازاقستان، ازەربايجان، قىرعىزستان جانە وزبەكستان اراسىنداعى مادەني-ادەبي بايلانىستى نىعايتۋعا، شىعارماشىلىق ىقپالداستىقتى دامىتۋعا باعىتتالعان «تۇركى الەمىنىڭ ادەبيەتى» اتتى جاڭا جوبانى ىسكە اسىرۋ جوسپارلانىپ وتىر.
سونىمەن بىرگە مينيسترلىك كوركەم شىعارما ارقىلى قاراپايىم ەڭبەك ادامدارىنىڭ ءوز ىسىنە ادالدىعىن ناسيحاتتاۋدى ماقسات ەتكەن «ەرلىك پەن ەڭبەك داستانى» رەسپۋبليكالىق بايقاۋىن ۇيىمداستىردى.
كەيىنگى ون جىل ىشىندە مەملەكەتتىك قولداۋ اياسىندا 2 مىڭنان استام كىتاپ جارىق كورىپ، ولاردىڭ جالپى تارالىمى 6 ميلليون دانادان استى.

قۇرمەتتى دوستار!
قازىرگى قوعامدا كىتاپتى ءبىلىم مەن پاراساتتىڭ، مادەنيەت پەن رۋحانياتتىڭ اسىل ارناسى رەتىندە باعالاي ءبىلۋدىڭ ماڭىزى ايرىقشا. كىتاپ وقۋدى قولداۋ – بۇل بىلىمگە جاسالعان ينۆەستيتسيا عانا ەمەس، ويلى، جاۋاپتى، زەردەلى ۇلت قالىپتاستىرۋعا قوسىلعان ۇلەس.
بارشا كىتاپحاناشىلاردى، جازۋشىلاردى، باسپاگەرلەردى، سالا ماماندارىن جانە وقىرمان قاۋىمدى ۇلتتىق كىتاپ كۇنىمەن جانە كىتاپحاناشىلار كۇنىمەن شىن جۇرەكتەن قۇتتىقتايمىن!

Abai.kz