ەلىمىزدىڭ باسىم بولىگىندە سۋ تاسقىنىنىڭ بەلسەندى كەزەڭى بارىنشا ازايدى، جاعداي تۇراقتى، مونيتورينگ جۇرگىزىلىپ جاتىر. ەلىمىزدىڭ وڭتۇستىك، باتىس جانە ورتالىق وڭىرلەرىندە سۋ تاسقىنىنىڭ بەلسەندى كەزەڭى ازايدى. سولتۇستىك قازاقستان وبلىسى مەن شىعىس قازاقستان وبلىسى باقىلاۋدا. 

مۇددەلى مەملەكەتتىك ورگاندار وكىلدەرىنىڭ قاتىسۋىمەن تجم سۋ تاسقىنىنا قارسى جەدەل شتابى ءوز جۇمىسىن جالعاستىرىپ جاتىر.

شىعىس قازاقستاندا سۋ تاسقىنىنىڭ ءبىرىنشى تولقىنى اياقتالدى. ءساۋىر ايىنىڭ ءۇشىنشى ونكۇندىگىنەن مامىر ايىنىڭ ەكىنشى ونكۇندىگىنىڭ سوڭىنا دەيىن وبلىستا ەكىنشى كەزەڭ وتەدى. سۋ تاسقىنىنىڭ ەكىنشى تولقىنى تاۋ بوكتەرىندەگى قاردىڭ ەرۋى، ورتاشا تاۋدىڭ وڭتۇستىك بەتكەيلەرىندەگى قاردىڭ ەرۋى جانە جاۋىن-شاشىن سالدارى بويىنشا باقىلاۋدا بولادى.

وبلىس اۋماعىنداعى قار جامىلعىسىنىڭ ۇلەسى 19 %. مۇددەلى مەملەكەتتىك ورگاندارمەن بىرلەسىپ، سۋ تاسقىنى قاۋپى بار بارلىق ۋچاسكەلەر مەن گيدروتەحنيكالىق قۇرىلىستار باقىلاۋعا الىندى، سۋ تاسقىنىنا قارسى ءىس-شارالاردىڭ ورىندالۋى تەكسەرىلدى.

وڭىردە كانالدار، ارىقتار، سۋ وتكىزۋ قۇرىلىستارى مەن كوپىرلەردى اۋقىمدى تازارتۋ جۇمىستارى جۇرگىزىلدى. 226 شاقىرىم كانال جانە 504 شاقىرىم ارىق تازارتىلدى، 4778 سۋ وتكىزۋ قۇرىلىسى مەن 409 كوپىر رەتكە كەلتىرىلدى. 430 مىڭنان استام تەكشە مەتر قار شىعارىلدى. ىستەلگەن جۇمىستىڭ ناتيجەسىندە 16 ەلدى مەكەندە سۋ باسۋ قاۋپى جويىلدى، 50 ەلدى مەكەندە قاۋىپ ازايتىلدى، ال 5 ەلدى مەكەندە قاۋىپ ساقتالىپ وتىر. ولار گلۋبوكوە جانە التاي اۋداندارى، بارلىعى 813 تۇرعىنى بار 329 ءۇي. قازىرگى تاڭدا وبلىستاعى گيدرولوگيالىق جاعداي تۇراقتى. وزەندەردەگى سۋ دەڭگەيى قاۋىپتى مەجەدەن تومەن، سۋ باسۋ فاكتىلەرى تىركەلگەن جوق. سونىمەن قاتار تاۋلىك بويى مونيتورينگ جۇرگىزىلىپ وتىر، ونىڭ بارىسىندا ماماندار تاۋلى ايماقتارداعى قار قورىن جانە اعىمداعى جاعدايدى باعالاۋدا. قابىلدانعان الدىن الۋ شارالارى حالىقتىڭ قاۋىپسىزدىگىن قامتاماسىز ەتىپ، سۋ تاسقىنى كەزەڭىنىڭ تۇراقتى وتۋىنە مۇمكىندىك بەرىپ وتىر.

سولتۇستىك قازاقستان وبلىسىندا سۋ تاسقىنى جاعدايىنا تۇراقتى مونيتورينگ جۇرگىزىلىپ جاتىر. وبلىستا تجم 28237 اسكەري ءبولىمىنىڭ كۇشتەرى جۇمىلدىرىلعان. ولار پەتروپاۆل قالاسىندا، زارەچنىي كەنتىندە جانە قىزىلجار اۋدانىنىڭ بەسكول اۋىلىندا جۇمىس ىستەپ جاتىر. اتالعان بولىمشەنىڭ كۇشىمەن قىزىلجار اۋدانىندا جانە پەتروپاۆل قالاسىنىڭ ماڭىندا قورعانىش بوگەندەرىن نىعايتۋ ءۇشىن 29 مىڭ قاپ دايىندالىپ، 10 800 قاپ توسەلدى. ەسىل وزەنىنىڭ تاسقىن سۋىنىڭ بوگەندەردى شايىپ كەتۋىنىڭ الدىن الۋ ماقساتىندا 2,5 مىڭ مەتر پوليەتيلەن توسەمى توسەلدى. سۋ تاسقىنى جاعدايىن باقىلاۋ اياسىندا وزەندەر، كولدەر مەن سۋ قويمالارى باسسەيندەرىنە اەروۆيزۋالدى تەكسەرۋ جۇرگىزىلدى.

Abai.kz