شىعىس قازاقستان وبلىسىنىڭ ۇلان اۋداندىق پروكۋراتۋراسى مەملەكەتتىك ساتىپ الۋ سالاسىنا جۇرگىزىلگەن تالداۋ بارىسىندا جەرگىلىكتى اتقارۋشى ورگانداردىڭ قىزمەتىنەن بىرقاتار زاڭ بۇزۋشىلىقتى انىقتاعان.

تەكسەرۋ بارىسىندا بەس اۋىلدىق وكرۋگ اكىمدىگى 2026 جىلعا ارنالعان ساتىپ الۋ جوسپارىنا جالپى قۇنى 44 ملن تەڭگە بولاتىن بالالار جانە سپورت الاڭدارىن اباتتاندىرۋ جوبالارىن ەنگىزگەنى بەلگىلى بولدى. قۇجاتتاردا بۇل جۇمىستار "اعىمداعى جوندەۋ" رەتىندە كورسەتىلگەن.

الايدا سمەتالىق قۇجاتتامانى زەردەلەۋ كەزىندە ءىس جۇزىندە جاڭا قۇرىلىس جۇمىستارى جوسپارلانعانى انىقتالدى. اتاپ ايتقاندا، نەگىز دايىنداۋ، بەتون توسەمدەرىن توسەۋ جانە جاڭا ويىن كەشەندەرىن ورناتۋ كوزدەلگەن.

زاڭ تالاپتارىنا سايكەس مۇنداي جۇمىستارعا جوبالاۋ-سمەتالىق قۇجاتتاما ازىرلەنىپ، مەملەكەتتىك ساراپتامادان ءوتۋى ءتيىس بولعان. بىراق بۇل تالاپتار ورىندالماعان.

سونىمەن قاتار پروكۋراتۋرا لوتتاردى جاساندى تۇردە بولشەكتەۋ فاكتىسىن دە انىقتادى. اكىمدىك شەكتى سومادان اسپاۋ ءۇشىن ساتىپ الۋلاردى بىرنەشە بولىككە ءبولىپ، ءونىم بەرۋشىلەردى ءوز بەتىنشە تاڭداۋعا مۇمكىندىك جاساعان. مۇنداي لوتتاردىڭ جالپى سوماسى 45,1 ملن تەڭگەنى قۇراعان.

پروكۋرورلىق قاداعالاۋ اكتىسى نەگىزىندە بارلىق جوبا قۇجاتتارى زاڭ تالاپتارىنا سايكەستەندىرىلگەنگە دەيىن ساتىپ الۋ جوسپارلارىنان الىنىپ تاستالدى.

ناتيجەسىندە پروكۋراتۋرانىڭ ارالاسۋىمەن 90 ملن تەڭگەدەن استام بيۋدجەت قاراجاتىنىڭ نەگىزسىز جۇمسالۋىنا جول بەرىلمەدى.

Abai.kz