تاعى ءبىر مەدال تاعىلدى. ءبىزدىڭ وڭىرگە. ال ءبىز تەك مەملەكەتتىك ناگرادانى مويىندايمىز. ۇيىمىزدە قازاقستان رەسپۋبليكاسىنىڭ ەڭبەك سىڭىرگەن قايراتكەرى ەكەنىمىزدى بىلدىرەتىن مەدال عانا ساقتاۋلى. ول مەملەكەت باسشىسىنىڭ جارلىعىمەن بەرىلگەن.

باسقاسى — قوعامدىق ۇيىمدار، مەكەمەلەر، ءتىپتى جەكە كىسىلەر جاساعان مەدال مەن بەلگىنى ساقتاعان ەمەسپىز. جول-جونەكەي كەزىككەن ۇلكەن كىسىگە، بيلياردتاعى اقساقالدارعا بەرە سالامىز.

مىنە، كەزەكتى قوعامدىق قور مەدال تاقتى. ومىربەك جولداسبەكوۆكە ارنالعان ەكەن. ومىربەك ارسلانۇلى ءۇشىن ەشقانداي ەڭبەك ەتپەپ ەدىك. ىڭعايسىز. ال ءبىزدىڭ ءومىرىمىزدىڭ وسى ارناعا تۇسۋىنە جولداسبەكوۆتىڭ تىكەلەي ىقپالى بولعان.

تۋرا ەلۋ جىل بۇرىن 1976 جىلى كازگۋ-ءدىڭ جۋرناليستيكا فاكۋلتەتىنە قۇجات تاپسىرىپ، ەمتيحانداردان قۇلاماي وتتىك. ول ۋاقىتتا ەكى جىل ەڭبەك ستاجى بارلار مەن كەڭەس ارمياسى قاتارىندا اسكەري بورىشىن وتەپ كەلگەندەر ەمتيحاننان وتسە، ارى قاراي بالل سانايتىن كونكۋرسقا تۇسپەي، بىردەن وقۋعا قابىلداناتىن. ءبىز ەكى جىل قوي باعىپ كەلگەنبىز. كوڭىل ورنىقتى.

ال وقۋعا تۇسكەندەردىڭ ءتىزىمى ىلىنگەندە قاراساق، فاميليامىز جوق. دەكاناتقا بارىپ، “بۇل قالاي؟” دەپ سۇراساق، “ەڭبەك ستاجىڭ 1 جىل 10 اي، دەمەك تولىق ەكى جىل ەمەس” دەگەن جاۋاپ الدىق.

ءيا، 1974 جىلى ماۋسىم ايىندا مەكتەپ بىتىردىك، ال ءبىز باعاتىن قوي ءالى ەنەسىن ەمەتىن قوزى ەكەن، ونى قىركۇيەك ايىنىڭ باسىندا بولەك وتار ەتەدى. سونىمەن شوپان بولاتىن بۇيرىعىمىز 1974 جىلى 1 قىركۇيەكتە شىققان. جۇمىستان 1976 جىلى ماۋسىم ايىنىڭ سوڭىندا بوساعانبىز. ويتكەنى، ول ۋاقىتتا جۋرناليستيكا فاكۋلتەتىنە قۇجات قابىلداۋ باسقالاردان جارتى اي بۇرىن باستالىپ، ەكى كەزەڭنەن تۇراتىن “شىعارماشىلىق كونكۋرس” دەگەنى بولاتىن. سوعان ۇلگەرۋمىز كەرەك ەدى.

قازاق “باسقا سالدى، ءبىز كوندىك” دەمەي مە؟! ەندى قالعان 49 بەن 50-ورىندارعا 18,5 بالل جيناعان 6 ابيتۋريەنت ۇمىتكەر ەكەنبىز. ول دەكاناتتا ەمەس، رەكتوراتتا “زاچيسلەنيە” دەپ اتالاتىن جيىندا شەشىلەدى ەكەن. كۇتتىك.

مەجەلى كۇنى ماسانشى كوشەسى مەن ول كەزدەگى كيروۆ كوشەسىنىڭ قيىلىسىنداعى وقۋ كورپۋسىندا “زاچيسلەنيە” باستالدى. جينالعان بالل ارقىلى سوڭعى ورىندارعا تالاساتىندار توپىرلاپ سىرتتا تۇرمىز.

الفاۆيتپەن بيوفاك شاقىرىلدى. ودان گەوفاكقا تالاپكەرلەردىڭ تاعدىرى شەشىلدى. مىنە، “جۋرفاك، قازاق ءبولىمى ىشكە كىرسىن!”

جۇرەگىمىز ۇلپىلدەگەن التاۋىمىزدى ەسىك جاقتاعى قاتقىل ورىندىقتارعا وتىرعىزدى. ءتور جاق دوعا تارىزدەس ەكەن. قازاق ۋنيۆەرسيتەتىنىڭ قايماعى. پروفەسسورلار قۇرامى تەگىس. دەكانداردىڭ ءتورت كوزى تۇگەل. ءبىزدىڭ قۇجاتتارىمىز جۋرفاكقا ەش قاتىسى جوق التى ادامعا بەرىلىپتى. سول كىسىلەر تاعى الفاۆيت بويىنشا پاپكاداعى قاعازداردى وقي باستادى. مىنەزدەمە، گازەتكە شىققان ماقالالار سانى، ەمتيحانداعى باعالار… ءبىر كەزدە ءبىزدىڭ قۇجات وقىلدى. “ەڭبەك كىتاپشاسىنىڭ كوشىرمەسى بار. 1974-1976 جىلدارى سەمەي وبلىسى اقسۋات اۋدانى “لەنين جولى” سوۆحوزىندا قوي باعىپتى”.

وسى كەزدە ءتوردىڭ ەڭ ورتاسىنداعى قاراتورى، يىقتى، كەۋدەلى، قارا بۇيرا شاشىن ارتقا قايىرعان كىسى العاش سويلەدى. ءبىزدىڭ دەكانعا بۇرىلىپ:

-تەمىربەك قوجاكەۇلى، بۇل ابيتۋريەنت نەگە كونكۋرسسىز قابىلدانباعان؟- دەپ سۇرادى.

ورنىنان تۇرعان ءبىزدىڭ دەكان:

-ومىربەك ارسلانۇلى. ەڭبەك ستاجىن ساناعانبىز. ەكى جىلعا ەكى ايى جەتپەدى،- دەدى.

-ولاي بولمايدى، ابيتۋريەنتتى بوسقا قيناعانسىزدار، - دەپ تۇجىردى توردەگى كىسى.

سودان كەيىن التاۋىمىزعا قارادى:

-قايسىڭ ولجاەۆسىڭ؟

-مەن!- دەپ اتىپ تۇردىق.

-ءسىز قابىلداندىڭىز، قۇتتىقتايمىن! - دەدى توردەگى كىسى.

نەگىزى ءبىز مەدال جاساساق، سول كىسى — ومىربەك ارسلانۇلى جولداسبەكوۆ لايىق ەدى!

قاينار ولجاي

Abai.kz