سوڭعى ايلاردا ۋكراينانىڭ درون شابۋىلدارى رەسەيدىڭ ەنەرگەتيكالىق كەشەنىنە قىسىمدى كۇشەيتە ءتۇستى. ۋكراينا پرەزيدەنتى زەلەنسكي: "سوعىستى شىققان جەرىنە قايتارىپ جاتىرمىز", - دەپ سويلەپ، وسىلايشا ستراتەگيالىق ماقساتتارعا قول جەتكىزىلىپ جاتقانىن اتاپ ءوتتى.

الدىڭعى كۇنى ۋكراينا دروندارى رەسەيدىڭ ستراتەگيالىق ماڭىزى بار "سلاۆنەفت-يانوس" مۇناي وڭدەۋ زاۋىتىنا سوققى جاساسا، تۇندە نوۆوروسسيسك ايماعىنا سوققى جاسالدى. شابۋىلدان "گرۋشوۆايا" مۇناي جونەلتۋ تەرمينالى وتقا ورانعان.

بۇل رەسەيدىڭ ورتالىق بولىگىندەگى ءىرى كاسىپورىندارعا جاسالعان جۇيەلى سوققىلاردىڭ ءبىر پاراسى عانا. Reuters اگەنتتىگىنىڭ مالىمەتىنشە، وسى اپتادا "لۋكويل" كومپانياسىنا تيەسىلى "NORSI" مۇناي وڭدەۋ زاۋىتى دروندار شابۋىلىنان كەيىن ءوز جۇمىسىن ءىشىنارا توقتاتتى. رەسەيدەگى كولەمى جاعىنان ءتورتىنشى ورىندا تۇرعان بۇل كاسىپورىن جىلىنا 16 ميلليون تونناعا دەيىن مۇناي وڭدەيتىن جانە بەنزين وندىرۋدەن ەلدەگى ەڭ ءىرى ەكىنشى ورىنداعى كاسىپورىن سانالاتىن.

جالپى العاندا، سوعىس باستالعالى بەرى رەسەي اۋماعىنداعى مۇناي وڭدەۋ زاۋىتتارىنا 158 رەت سوققى جاسالعان ەكەن. ۋكراينانىڭ درون شابۋىلدارى رەسەيدىڭ ەنەرگەتيكالىق ينفراقۇرىلىمىن نىساناعا الۋدا وتە بەلسەندى. ستاتيستيكاعا جۇگىنسەك، بۇگىندە رەسەيدەگى ءىرى جانە ورتا دەڭگەيدەگى 33 مۇناي وڭدەۋ زاۋىتىنىڭ 24-ءى ءارتۇرلى دارەجەدە شابۋىلعا ۇشىراعان. سىزران ءموز-ءى 11 مارتە، ال ريازان مەن ساراتوۆتاعى زاۋىتتاردىڭ ارقايسىسى 15 رەتتەن نىساناعا الىندى. قازىرگى تاڭدا رەسەيدە شابۋىلعا ۇشىراماعان نەبارى 2 ءىرى ءموز قالدى، ولاردىڭ ەكەۋى دە ورال تاۋلارىنىڭ ارعى جاعىندا ورنالاسقان.

Reuters پەن Bloomberg تالداۋشىلارى شابۋىلعا ۇشىراعان كاسىپورىنداردىڭ جۇمىسىن توقتاتۋى سالدارىنان رەسەيدەگى مۇناي وڭدەۋ كولەمى 2009 جىلعى دەڭگەيگە دەيىن قۇلدىراعانىن حابارلايدى. اشىق دەرەككوزدەرگە سايكەس، 2026 جىلعى جاعداي بويىنشا رەسەيدە 38 ءىرى جانە ورتا مۇناي وڭدەۋ زاۋىتى جۇمىس ىستەيدى. بۇدان بولەك، 80-گە جۋىق شاعىن مۇناي وڭدەۋ زاۋىتى بار. دەگەنمەن، سوڭعى ۋاقىتتاعى قارقىندى سوققىلار بۇل سالانىڭ تۇراقتىلىعىنا ۇلكەن قاۋىپ ءتوندىرىپ، رەسەي ەكونوميكاسىنىڭ نەگىزگى تىرەگى سانالاتىن سەكتورعا ەلەۋلى زارداپ تيگىزىپ وتىر.

Abai.kz