الماتىدا ەلەكتر قۋاتىن وندىرەتىن زاماناۋي قوقىس وڭدەۋ زاۋىتىنىڭ قۇرىلىسىنا كاپسۋلا سالۋ ءراسىمى ءوتتى. ءىس-شاراعا الماتى اكىمى دارحان ساتىبالدى، «Junxin Environmental Protection» كومپانياسىنىڭ توراعاسى داي داوگۋو، مەملەكەتتىك ورگاندار، بيزنەس جانە قوعام وكىلدەرى قاتىستى.

سۋرەت: الماتى قالاسى اكىمدىگىنەن الىندى.

جوبا مەملەكەت باسشىسىنىڭ ەكولوگيالىق احۋالدى جاقسارتۋ جانە ەكولوگيالىق ينفراقۇرىلىمدى دامىتۋ جونىندەگى تاپسىرمالارى اياسىندا، سونداي-اق «تازا قازاقستان» باعدارلاماسى شەڭبەرىندە قولعا الىنعان.

سالتاناتتى راسىمدە ءسوز سويلەگەن دارحان ساتىبالدى قازاقستان مەن قىتايدىڭ ستراتەگيالىق سەرىكتەستىكتى دايەكتى تۇردە نىعايتىپ كەلە جاتقانىن اتاپ ءوتتى. ونىڭ ايتۋىنشا، بىرلەسكەن ەكولوگيالىق جوبالاردى جۇزەگە اسىرۋ – ەكىجاقتى ىنتىماقتاستىقتىڭ ماڭىزدى باعىتى.

سۋرەت: الماتى قالاسى اكىمدىگىنەن الىندى.

«بۇگىن الماتى مەن قازاقستان ءۇشىن ماڭىزدى ەكولوگيالىق جوبالاردىڭ ءبىرى باستاۋ الىپ وتىر. جاڭا زاۋىت قاتتى تۇرمىستىق قالدىقتاردى ءتيىمدى وڭدەپ قانا قويماي، قالانىڭ ەنەرگيامەن جابدىقتاۋ جۇيەسىنە ەلەكتر قۋاتىن وندىرۋگە مۇمكىندىك بەرەدى»، — دەدى الماتى اكىمى.

«Junxin Environmental Protection» كومپانياسىنىڭ توراعاسى داي داوگۋو بۇل جوبا قازاقستان مەن قىتايدىڭ جاسىل ەكونوميكا جانە تۇراقتى دامۋ سالاسىنداعى ستراتەگيالىق ىنتىماقتاستىعىنىڭ ناتيجەسى ەكەنىن ايتتى.

سۋرەت: الماتى قالاسى اكىمدىگىنەن الىندى.

«بۇگىن باستاۋ الىپ وتىرعان جوبا قالدىقتاردى وڭدەۋ مەن ەلەكتر قۋاتىن وندىرۋدەگى وزىق تەحنولوگيادى ەنگىزۋدىڭ ۇلگىسىنە اينالادى. ول الماتىداعى تۇرمىستىق قالدىقتار ماسەلەسىن ءتيىمدى شەشىپ قانا قويماي، قالدىقتاردى «جاسىل» ەنەرگيا كوزىنە اينالدىرۋعا مۇمكىندىك بەرەدى. ءبىز ءىس جۇزىندە «قالدىقتان — رەسۋرسقا» قاعيداتىن جۇزەگە اسىرىپ وتىرمىز. بۇل «جاسىل جىبەك جولى» باستاماسىنىڭ ەكولوگيالىق ءارى تۇراقتى دامۋ ۇستانىمدارىنا تولىق سايكەس كەلەدى»، — دەدى داي داوگۋو.

زاۋىتتىڭ قۋاتتىلىعى تاۋلىگىنە شامامەن 2 مىڭ توننا قالدىق وڭدەۋگە جانە 60 مەگاۆاتتقا دەيىن ەلەكتر قۋاتىن وندىرۋگە مۇمكىندىك بەرەدى. جوباعا سالىناتىن ينۆەستيتسيا كولەمى 130 ملرد تەڭگەدەن اسادى.

زاۋىت سينگاپۋر، كوپەنگاگەن جانە توكيو سەكىلدى الەمنىڭ جەتەكشى قالالارىندا قولدانىلاتىن جوعارى حالىقارالىق ەكولوگيالىق ستاندارتتارعا ساي بولادى. كاسىپورىن قورشاعان ورتاعا اسەردى بارىنشا ازايتۋ قاعيداتىمەن جانە زاماناۋي تازارتۋ تەحنولوگيالارىن قولدانۋ ارقىلى جۇمىس ىستەيدى.

ايتا كەتەيىك، «Junxin Environmental Protection» كومپانياسىنىڭ وسىنداي جوبالاردى جۇزەگە اسىرۋدا حالىقارالىق تاجىريبەسى بار.

Abai.kz