​قازاقستانداعى بىرقاتار ءىرى قوعامدىق بىرلەستىكتەر, سالالىق قاۋىمداستىقتار مەن كاسىبي ۇيىمدار «ادىلەت» ساياسي پارتياسىمەن ىنتىماقتاستىق ورناتۋعا دايىن ەكەندەرىن جەتكىزدى.

​پارتيانى قولداۋشىلار قاتارىندا جۇمىسشىلار مەن جۇمىس بەرۋشىلەردىڭ, ۇكىمەتتىك ەمەس سەكتوردىڭ, ۆولونتەرلىك قوزعالىستىڭ, كاسىبي قاۋىمداستىقتاردىڭ, بيزنەس, عىلىم, مادەنيەت, ءبىلىم بەرۋ, دەنساۋلىق ساقتاۋ, ەكولوگيا, IT جانە كرەاتيۆتى يندۋستريا سالالارىنىڭ مۇددەسىن قورعايتىن ۇيىمدار بار.

​بۇگىنگى تاڭدا «ادىلەت» پارتياسىن قولدايتىنىن مالىمدەگەن ۇيىمداردىڭ قاتارىندا «PARYZ» جۇمىس بەرۋشىلەردىڭ ۇلتتىق كونفەدەراتسياسى, قازاقستان ينۆەستورلارى قاۋىمداستىعى, قازاقستان تاۋ-كەن پالاتاسى, قازاقستان اۆتوموبيل وداعى, مەديتسينالىق جانە فارماتسەۆتيكالىق بيزنەس ۇلتتىق قاۋىمداستىعى, «Qazaq Green» جاڭارتىلاتىن ەنەرگيا كوزدەرى قاۋىمداستىعى, قازاقستانداعى جاساندى ينتەللەكتتى دامىتۋ قاۋىمداستىعى, Women in Tech Kazakhstan, قازاقستاننىڭ كرەاتيۆتى يندۋستريالار اليانسى, قازاقستان كينەماتوگرافيستەر ليگاسى, Q88 اۋماقتاردى تۇراقتى دامىتۋ قاۋىمداستىعى, قر الەۋمەتتىك يننوۆاتورلار قاۋىمداستىعى, SOCIAL INNOVATION HUB, «جاڭا ادامدار» قوعامدىق بىرلەستىگى, «دالا قىراندارى» قوعامدىق بىرلەستىگى جانە باسقا دا ۇيىمدار بار.

​«ادىلەت» پارتياسى الداعى ۋاقىتتا دا ازاماتتىق قوعام ينستيتۋتتارىمەن, كاسىبي قاۋىمداستىقتارمەن, ساراپشىلار مەن ەلدىڭ بارلىق وڭىرلەرىندەگى باستاماشىل ازاماتتارمەن ءوزارا ءىس-قيمىلدى نىعايتا بەرەدى.

Abai.kz