پرەمەر-مينيستر ولجاس بەكتەنوۆ Kazakh Tourism Development Ltd كومپانياسى ديرەكتورلار كەڭەسىنىڭ وتىرىسىن وتكىزدى. وندا الماتى تاۋ كلاستەرىن دامىتۋ ماسەلەلەرى قارالدى.

«Kazakh Tourism Development Ltd.» جك باس اتقارۋشى ديرەكتورى ەرجان ەركىنباەۆ Almaty SuperSki جوباسىن جۇزەگە اسىرۋدىڭ قازىرگى جاي-كۇيى تۋرالى باياندادى.

جيىندا جوبانىڭ نەگىزگى نىساندارىن جوبالاۋ جانە سالۋ ماسەلەلەرى بويىنشا بىرقاتار شەشىم قابىلداندى. اتاپ ايتقاندا، اشىق كونكۋرس شەڭبەرىندە اسپالى جولدار سالۋ، عيماراتتاردىڭ كونسترۋكتسيالىق جوبالانۋى جانە وزگە دە باعىتتار بويىنشا حالىقارالىق جەتەكشى كومپانيالار ايقىندالدى. وسىلايشا، Almaty SuperSki جوباسى دايىندىق كەزەڭىنەن ناقتى جۇزەگە اسىرۋ ساتىسىنا ءوتتى. 

11 اسپالى جولدىڭ قۇرىلىسىن قامتيتىن جۇمىستار كەشەنىن ورىنداۋعا مەردىگەر انىقتاۋ ماقساتىندا اسپالى جول وندىرۋشىلەرى اراسىندا اشىق كونكۋرس وتكىزىلدى. حالىقارالىق PGI, Hill International جانە DCSA كەڭەسشىلەرى تاۋەلسىز باقىلاۋ جۇرگىزدى.

11 زاماناۋي اسپالى جول سالۋ ءۇشىن اسپالى كولىك جۇيەلەرىن جوبالاۋ، ءوندىرۋ جانە پايدالانۋ سالاسىنداعى الەمدىك كوشباسشىلاردىڭ ءبىرى – POMA فرانتسۋز كومپانياسى تاڭدالدى. كومپانيا 1936 جىلدان بەرى جۇمىس ىستەپ كەلەدى جانە الەمنىڭ 90 ەلىندە 8 مىڭعا جۋىق جوبانى جۇزەگە اسىرعان. كومپانيانىڭ تەحنولوگيالىق شەشىمدەرى الەمدەگى جەتەكشى تاۋ شاڭعىسى كۋرورتتارى مەن قالالىق كولىك جەلىلەرىندە كەڭىنەن قولدانىلىپ، قاۋىپسىزدىك، سەنىمدىلىك جانە ەكولوگيالىق تۇراقتىلىق سالاسىنداعى حالىقارالىق تالاپتارعا تولىق سايكەس كەلەدى. Almaty SuperSki جوباسى اياسىندا 3S جۇيەسىندەگى گوندولالى اسپالى جولدار، 10 ورىندىق گوندولالى جەلى جانە كرەسلولى كوتەرگىشتەر سەكىلدى ءتۇرلى تيپتەگى اسپالى جولدار سالۋ جوسپارلانعان.

جوبادا حالىقارالىق ساۋلەت بيۋروسى Foster + Partners ازىرلەگەن تۇجىرىمدامانىڭ ماڭىزدى ەلەمەنتى بولىپ سانالاتىن زاماناۋي اعاش كونسترۋكتسيالاردى پايدالانۋ كوزدەلگەن. كونسترۋكتسيالاردى جوبالاۋ مەن ءوندىرۋدىڭ ساپاسىن قامتاماسىز ەتۋ ءۇشىن بۇكىل الەم بويىنشا بىرەگەي نىسانداردى جۇزەگە اسىرۋدا ايتارلىقتاي تاجىريبەسى بار جاپپاي اعاشتان جاسالعان ينجەنەرلىك شەشىمدەر سالاسىنداعى جەتەكشى الەمدىك كومپانيالاردىڭ ءبىرى StructureCraft (كانادا) كومپانياسىمەن ىنتىماقتاستىق تۋرالى شەشىم قابىلداندى.

جوبانى باسقارۋدى شوعىرلاندىرۋ ءۇشىن قۇرىلىستى دايىنداۋعا جانە كەيىننەن جۇزەگە اسىرۋعا Hill International (اقش) كومپانياسى تارتىلدى، ول جوبالاۋدى، قۇرىلىستى ۇيلەستىرۋدى، جۇمىس كەستەسىن ساقتاۋدى جانە تاعى دا باسقالارىن قامتاماسىز ەتەدى.

وتىرىس قورىتىندىسى بويىنشا پرەمەر-مينيستر ولجاس بەكتەنوۆ جوبالاۋ مەرزىمى مەن ساپاسىنا قاتاڭ باقىلاۋدى، قاۋىپسىزدىك پەن ەكولوگيالىق جاۋاپكەرشىلىكتىڭ حالىقارالىق ستاندارتتارىن ساقتاۋدى قامتاماسىز ەتۋدى تاپسىردى. Almaty SuperSki جوباسىن جۇزەگە اسىرۋ تاۋ كلاستەرىنىڭ الەۋەتىن اشۋعا مۇمكىندىك بەرەدى، تۋريستىك سالانىڭ دامۋىنا ەلەۋلى سەرپىن بەرەدى جانە قىزمەت كورسەتۋ سالاسى مەن ساباقتاس سالالارعا كەڭ مۋلتيپليكاتيۆتىك اسەر ەتەدى. قالا تۇرعىندارى مەن قوناقتارى ءۇشىن قولجەتىمدى ءارى قاۋىپسىز تۋريستىك ينفراقۇرىلىمدى قالىپتاستىرۋعا باسىمدىق بەرىلگەن.

بەكىتىلگەن كەستەگە سايكەس الاڭدا قۇرىلىس جۇمىستارى باستالدى. «Almaty SuperSki» تاۋ شاڭعىسى كۋرورتىنىڭ ىسكە قوسىلۋى 2028 جىلعى جەلتوقسانعا جوسپارلانعان.

Abai.kz