سەنات دەپۋتاتتارى قازاقستان كونستيتۋتسياسىنىڭ جاڭارتىلعان رەداكتسياسىنا سايكەس زاڭنامانى كەشەندى تۇردە جاڭارتۋدى كوزدەيتىن زاڭ جوباسىن ءبىرىنشى وقىلىمدا قولدادى.

قۇجاتتا سايلاۋ جۇيەسىنە، پروكۋراتۋرا قىزمەتىنە، ينۆەستورلاردىڭ قۇقىقتارىن قورعاۋعا جانە وزگە دە سالالارعا قاتىستى تۇزەتۋلەر قاراستىرىلعان.

زاڭ جوباسى 77 زاڭنامالىق اكتىگە، ونىڭ ىشىندە 11 كودەكسكە وزگەرىستەر مەن تولىقتىرۋلار ەنگىزۋدى كوزدەيدى. تۇزەتۋلەر ازاماتتىق، جەر، ەڭبەك، ەكولوگيا، بيۋدجەت كودەكستەرىن جانە باسقا دا بىرقاتار كودەكستى قامتيدى.

رەفورمانىڭ نەگىزگى باعىتتارىنىڭ ءبىرى مەملەكەتتىك باسقارۋ جۇيەسىن جەتىلدىرۋگە ارنالعان. اتاپ ايتقاندا، سايلاۋ كوميسسيالارىن قۇرۋ ءتارتىبىن ناقتىلاۋ جانە سايلاۋشىلاردىڭ كەرى شاقىرىپ الۋىنا بايلانىستى ءماسليحات دەپۋتاتىنىڭ وكىلەتتىگىن مەرزىمىنەن بۇرىن توقتاتۋ ءراسىمىن رەتتەۋ ۇسىنىلىپ وتىر.

سونىمەن قاتار جەرگىلىكتى ءوزىن-ءوزى باسقارۋ ورگاندارى جەرگىلىكتى قوعامداستىق جيىندارىنىڭ قۇرامى تۋرالى اقپاراتتى وزدەرىنىڭ ينتەرنەت-رەسۋرستارىندا جاريالاۋعا مىندەتتەلەدى.

تۇزەتۋلەردىڭ جەكە ءبىر بلوگى ينۆەستورلاردىڭ قۇقىقتارىن قورعاۋعا ارنالعان. پرەزيدەنت تاپسىرمالارىن ىسكە اسىرۋ اياسىندا ينۆەستورلاردىڭ قۇقىقتارىن قورعاۋ كوميتەتىن قۇرۋ جانە ينۆەستيتسيالىق جوبالاردى سۇيەمەلدەۋ تەتىكتەرىن كەڭەيتۋ ۇسىنىلادى. باس پروكۋرور ينۆەستيتسيالىق ومبۋدسمەننىڭ فۋنكتسيالارىن اتقارا الادى، ال وڭىرلەردە بۇل وكىلەتتىك ينۆەستيتسيالىق پروكۋرورلارعا جۇكتەلمەك.

سونداي-اق زاڭ جوباسىندا باس پروكۋراتۋراعا زاڭسىز شىعارىلعان اكتيۆتەردى قايتارۋ جونىندەگى ۋاكىلەتتى ورگان مارتەبەسىن بەرۋ جانە مۇلىكتىڭ زاڭدى جولمەن الىنعانىن تەكسەرۋ ءتارتىبىن ناقتىلاۋ كوزدەلگەن.

زاڭ جوباسىن ازىرلەۋشىلەردىڭ پىكىرىنشە، قۇجاتتى قابىلداۋ جەكەلەگەن قۇقىقتىق قايشىلىقتاردى جويۋعا، زاڭنامانى كونستيتۋتسيا تالاپتارىنا سايكەستەندىرۋگە جانە ازاماتتار مەن ينۆەستورلاردىڭ قۇقىقتارىن قورعاۋ تەتىكتەرىنىڭ تيىمدىلىگىن ارتتىرۋعا مۇمكىندىك بەرەدى.

تالقىلاۋ قورىتىندىسى بويىنشا سەناتتىڭ بەيىندى كوميتەتتەرى زاڭ جوباسىنىڭ تۇجىرىمداماسىنا قاتىستى ەسكەرتۋ مەن ۇسىنىس بىلدىرگەن جوق.

Abai.kz