ۇكىمەت  مەملەكەت باسشىسى قاسىم-جومارت توقاەۆتىڭ ادىلەتتى جانە الەۋمەتتىك باعدارلانعان قازاقستان قۇرۋ جونىندەگى تاپسىرمالارىن جۇزەگە اسىرۋ اياسىندا حالىقتى قولداۋعا باعىتتالعان اۋقىمدى جۇمىستار جۇرگىزۋدە. جاڭا كونستيتۋتسيادا بەكىتىلگەن الەۋمەتتىك مەملەكەت قاعيداتتارى ازاماتتاردىڭ بارلىق ساناتىن — بالالى وتباسىلاردى، جاستاردى، مۇگەدەكتىگى بار ادامداردى، زەينەتكەرلەردى، الەۋمەتتىك سالا قىزمەتكەرلەرىن جانە تابىسى تومەن ازاماتتاردى قامتيتىن ناقتى شەشىمدەر ارقىلى جۇزەگە اسىرىلىپ وتىر.

بۇگىندە الەۋمەتتىك قولداۋ اۋقىمى ميلليونداعان ادامدى جانە جۇزدەگەن ميلليارد تەڭگەنى قامتىپ وتىر. 2,5 ميلليوننان استام ادام زەينەتاقى الادى، 630 مىڭنان اسا كوپبالالى وتباسى جاردەماقىمەن قامتىلعان، 544 مىڭنان استام ازامات مۇگەدەكتىك بويىنشا قولداۋ الادى، اۋىلدىق جەرلەردە شامامەن ءبىر ميلليون تۇرعىن جاڭا مەديتسينالىق ينفراقۇرىلىمعا قول جەتكىزدى، ال ءبىلىم بەرۋ گرانتتارىنىڭ سانى سوڭعى بەس جىلدا 93 مىڭنان استامعا جەتتى.

بۇگىندە ەلىمىزدە الەۋمەتتىك قولداۋدىڭ كوپ دەڭگەيلى جۇيەسى قالىپتاسقان. ول تەگىن مەديتسينالىق كومەك، مەملەكەتتىك جاردەماقىلار، زەينەتاقىمەن قامسىزداندىرۋ، ءبىلىم مەن عىلىمدى قولداۋ، انا مەن بالانى قورعاۋ، سونداي-اق الەۋمەتتىك تۇرعىدان وسال توپتارعا ارنالعان ارنايى قورعاۋ باعدارلامالارىن قامتيدى.

بۇل شارالاردىڭ كوپشىلىگى قارجىلاندىرۋ كولەمى جاعىنان دا، قامتيتىن ازاماتتار سانى جاعىنان دا بۇرىن-سوڭدى بولماعان.

بارشاعا قولجەتىمدى مەديتسينا

تەگىن مەديتسينالىق كومەكتىڭ كەپىلدەندىرىلگەن كولەمىن ساقتاۋ جانە مىندەتتى الەۋمەتتىك مەديتسينالىق ساقتاندىرۋ جۇيەسىن ءارى قاراي دامىتۋ الەۋمەتتىك ساياساتتىڭ باستى جەتىستىكتەرىنىڭ ءبىرى بولىپ قالا بەرمەك. ۇكىمەت مەملەكەت باسشىسىنىڭ تاپسىرماسىنا سايكەس، ازاماتتاردىڭ تۇرعىلىقتى جەرىنە قاراماستان مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋعا باعىتتالعان دەنساۋلىق ساقتاۋ جۇيەسىن دايەكتى تۇردە جاڭعىرتۋ جۇمىستارىن جۇرگىزۋدە.

بۇگىندە قازاقستاندىقتار مەملەكەت ەسەبىنەن كەڭ اۋقىمدى مەديتسينالىق كومەكتەر: دارىگەرلەر كەڭەسى مەن پروفيلاكتيكالىق تەكسەرۋلەردەن باستاپ، قۇنى ونداعان ميلليون تەڭگەگە جەتەتىن جوعارى تەحنولوگيالى وپەراتسيالارعا دەيىن تەگىن الۋدا. كارديوحيرۋرگيالىق وپەراتسيالار، نەيروحيرۋرگيالىق ارالاسۋلار، اعزا ترانسپلانتاتسياسى، ونكولوگيالىق اۋرۋلاردى ەمدەۋ، سيرەك پاتولوگياسى بار ناۋقاستارعا كومەك جانە باسقا دا قىمبات ەم تۇرلەرى قارجىلاندىرىلادى. مەملەكەتتىك قولداۋ بولماعان جاعدايدا مۇنداي ەم كوپتەگەن وتباسىلار ءۇشىن قولجەتىمسىز بولار ەدى.

ونكولوگيالىق تەكسەرۋلەر تەگىن مەديتسينالىق كومەكتىڭ كەپىلدەندىرىلگەن كولەمىنە ەنگىزىلدى. سونىڭ ناتيجەسىندە شامامەن 300 مىڭ ادام قوسىمشا دياگنوستيكادان ءوتۋ مۇمكىندىگىن الدى.

جۇرگىزىلىپ جاتقان جۇمىستاردىڭ ناتيجەسىندە دەموگرافيالىق كورسەتكىشتەر تۇراقتى تۇردە جاقسارىپ كەلەدى. ءومىر ءسۇرۋ ۇزاقتىعى تاريحي ەڭ جوعارى دەڭگەيگە جەتىپ، 75,97 جاستى قۇرادى. قازاقستان سونداي-اق دۇنيەجۇزىلىك دەنساۋلىق ساقتاۋ ۇيىمىنىڭ جۇقپالى ەمەس اۋرۋلاردان بولاتىن مەزگىلسىز ءولىم-ءجىتىمدى ازايتۋ جونىندەگى ماقساتتى كورسەتكىشىنە مەرزىمىنەن بۇرىن قول جەتكىزدى. سونىمەن قاتار پروفيلاكتيكالىق مەديتسينا دامىپ كەلەدى، سكرينينگتىك باعدارلامالار كەڭەيتىلۋدە، ەرتە دياگنوستيكانىڭ جاڭا ادىستەرى ەنگىزىلۋدە جانە ديسپانسەرلىك باقىلاۋ جۇيەسى جەتىلدىرىلۋدە.

مەملەكەت ەسەبىنەن جوعارى تەحنولوگيالى مەديتسينالىق كومەك

مەملەكەت ازاماتتاردى قىمبات ءارى جوعارى تەحنولوگيالى مەديتسينالىق كومەكپەن قامتاماسىز ەتۋ باعىتىنداعى جۇمىستى جۇيەلى تۇردە جالعاستىرىپ كەلەدى. تەگىن مەديتسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ جۇيەسى ارقىلى قازاقستاندىقتار تابىس دەڭگەيىنە قاراماستان زاماناۋي دياگنوستيكا، ەمدەۋ ادىستەرى جانە كۇردەلى حيرۋرگيالىق وپەراتسيالارعا قول جەتكىزۋدە.

اۋىر تۋا بىتكەن اۋرۋلارى مەن پاتولوگيالارى بار بالالارعا ەرەكشە كوڭىل بولىنەدى. جىل سايىن تۋا بىتكەن اۋرۋلارى بار شامامەن 1,5 مىڭ نارەستەگە وپەراتسيا جاسالادى، ولاردىڭ شامامەن 40%-ى از ءينۆازيۆتى ەندوۆيدەوحيرۋرگيالىق تەحنولوگيالارمەن جاسالادى.

سونىمەن قاتار بالالار كارديوحيرۋرگياسى دا دامىپ كەلەدى. جىل سايىن ەلىمىزدە جۇرەك-قان تامىر جۇيەسىنىڭ تۋا بىتكەن اقاۋلارى بار بالالارعا شامامەن 2 مىڭ اشىق وپەراتسيا جاسالادى.

زاماناۋي مەديتسينالىق تەحنولوگيالاردى ەنگىزۋ نارەستەلەردىڭ وپەراتسيادان كەيىنگى ومىرشەڭدىگىن 88%-دان 93%-عا دەيىن ارتتىرۋعا مۇمكىندىك بەردى. بۇدان بولەك، 19 يننوۆاتسيالىق مەديتسينالىق تەحنولوگيانىڭ ەنگىزىلۋى بالالاردى شەتەلدە ەمدەۋگە جىبەرۋ سانىن ەكى ەسە قىسقارتىپ، جوعارى تەحنولوگيالى كومەكتى ەل ىشىندە قولجەتىمدى ەتتى.

قىمبات ەم مەن ءدارى-دارمەكپەن قامتۋ دا كەڭەيىپ كەلەدى. 2018 جىلى تەگىن ءدارى-دارمەكپەن 1,9 ميلليون ادام قامتىلسا، 2025 جىلعا قاراي بۇل كورسەتكىش 3,4 ميلليونعا جەتتى. امبۋلاتوريالىق ءدارى-دارمەكپەن قامتاماسىز ەتۋگە بولىنەتىن قارجى وسى كەزەڭدە 87,2 ميلليارد تەڭگەدەن 337,4 ميلليارد تەڭگەگە دەيىن ءۇش ەسە ءوستى.

مەديتسينالىق ينفراقۇرىلىمدى اۋقىمدى جاڭعىرتۋ

مەديتسينالىق ينفراقۇرىلىمدى دامىتۋ دەنساۋلىق ساقتاۋ جۇيەسىن جاڭعىرتۋدىڭ ەڭ اۋقىمدى باعىتتارىنىڭ بىرىنە اينالدى. سوڭعى جەتى جىلدا ەلىمىزدە 1250-دەن استام دەنساۋلىق ساقتاۋ نىسانى سالىندى، ونىڭ 800-دەن استامى سوڭعى ءۇش جىلدا عانا پايدالانۋعا بەرىلدى.

اۋىل مەديتسيناسىن دامىتۋعا ەرەكشە كوڭىل بولىنۋدە. اۋىلدا دەنساۋلىق ساقتاۋدى جاڭعىرتۋ جونىندەگى ۇلتتىق جوبا اياسىندا 655 العاشقى مەديتسينالىق-سانيتاريالىق كومەك نىسانى سالىندى. 200-دەن استام اۋىلدىق ەلدى مەكەندەر العاش رەت وزدەرىنىڭ مەديتسينالىق مەكەمەلەرىنە يە بولدى، ال ميلليونعا جۋىق اۋىل تۇرعىندارى اۋداندىق نەمەسە وبلىستىق ورتالىقتارعا بارماي-اق تۇرعىلىقتى جەرىنىڭ جانىندا مەديتسينالىق كومەك الۋعا مۇمكىندىك الدى.

ءبىر مەزگىلدە جۇمىس ىستەپ تۇرعان اۋرۋحانالار مەن ەمحانالاردى جاڭعىرتۋ جۇرگىزىلۋدە، مەديتسينالىق جابدىقتار جاڭارتىلۋدا، تسيفرلىق تەحنولوگيالار مەن تەلەمەديتسينا ەنگىزىلۋدە، كونسۋلتاتسيالىق-دياگنوستيكالىق كومەك كورسەتۋ مۇمكىندىكتەرى كەڭەيتىلۋدە.

انالاردى ەرەكشە قولداۋ

انالاردى قولداۋ جانە ايەلدەردىڭ دەنساۋلىعىن قورعاۋ الەۋمەتتىك ساياساتتىڭ نەگىزگى باعىتتارىنىڭ ءبىرى بولىپ قالا بەرەدى. مەملەكەت باسشىسىنىڭ تاپسىرماسى بويىنشا ۇكىمەت جۇكتىلىكتى جوسپارلاۋدان باستاپ بالانىڭ دۇنيەگە كەلۋى مەن بوسانعاننان كەيىنگى باقىلاۋعا دەيىنگى بارلىق كەزەڭدەردى قامتيتىن كەشەندى جۇمىستى جۇزەگە اسىرۋدا.

تاۋەلسىزدىك جىلدارى قازاقستاندا انا ءولىمىنىڭ كورسەتكىشى التى ەسەگە تومەندەدى. تەك سوڭعى بەس جىلدا ول تاعى 35%-عا قىسقاردى. بۇگىنگى تاڭدا جۇكتى ايەلدەردىڭ 90%-دان استامى جۇكتىلىكتىڭ 12 اپتاسىنا دەيىن ەسەپكە الىنادى، بۇل تاۋەكەلدەردى ۋاقتىلى انىقتاۋعا جانە قاجەتتى مەديتسينالىق كومەك كورسەتۋگە مۇمكىندىك بەرەدى.

2025 جىلعى تامىزدان باستاپ «انالار ساۋلىعى» باعدارلاماسى جۇزەگە اسىرىلۋدا. ول العاشقى مەديتسينالىق-سانيتاريالىق كومەك دەڭگەيىندە ايەلدەر ءۇشىن 15 تەگىن تەكسەرۋدەن ءوتۋدى قاراستىرادى. سونىمەن قاتار «ءبىر كۇندىك كلينيكا» جوباسى دامىتىلۋدا، ول جۇكتى ايەلدەرگە بارلىق قاجەتتى زەرتتەۋلەر مەن ماماندار كونسۋلتاتسيالارىنان ءبىر كۇن ىشىندە وتۋگە مۇمكىندىك بەرەدى. 2024 جىلدان باستاپ قازاقستاندا فەتالدى مەديتسينا – ۇرىقتاعى پاتولوگيالاردى جاتىرىشىلىك ەمدەۋدىڭ زاماناۋي باعىتى ەنگىزىلدى.

بوساندىرۋعا كومەكتەسۋ ينفراقۇرىلىمىن دامىتۋ جالعاسۋدا. ەلىمىزدە 273 قالالىق جانە 152 اۋىلدىق ايەلدەر كونسۋلتاتسياسى، سونداي-اق وبلىستىق پەريناتالدىق ورتالىقتار جانىنداعى 24 كونسۋلتاتسيا جۇمىس ىستەيدى. بۇدان بولەك، بولاشاق انالارعا مەديتسينالىق كومەكتىڭ قولجەتىمدىلىگىن ارتتىرۋ ءۇشىن جاڭا نىساندار اشىلۋدا.

بالالار دەنساۋلىعىنا قامقورلىق

سونىمەن قاتار بالالاردىڭ دەنساۋلىعىن قورعاۋ جۇيەسى كەزەڭ-كەزەڭىمەن كۇشەيتىلىپ كەلەدى. سوڭعى جىلدارى بالالارعا مەديتسينالىق كومەك كورسەتۋگە بولىنەتىن قارجى كولەمى ەكى ەسەدەن استام ءوسىپ، 264 ملرد تەڭگەدەن 585 ملرد تەڭگەگە دەيىن جەتتى. بۇگىندە دەنساۋلىق ساقتاۋ جۇيەسى شىعىندارىنىڭ شامامەن تورتتەن ءبىرى بالالار دەنساۋلىعىن ساقتاۋعا باعىتتالادى.

تاۋەلسىزدىك جىلدارى ىشىندە نارەستە ءولىمى 7,5 ەسەگە تومەندەدى. ەلىمىزدە بالالارعا مەديتسينالىق كومەك كورسەتۋدىڭ كوپدەڭگەيلى جۇيەسى قالىپتاسقان. ول ەمحانالاردى، كوپبەيىندى بالالار اۋرۋحانالارىن، پەريناتالدىق ورتالىقتاردى جانە مامانداندىرىلعان مەديتسينالىق ۇيىمداردى قامتيدى. جىل سايىن تۋا بىتكەن دامۋ كەمىستىگى بار 1,5 مىڭعا جۋىق جاڭا تۋعان نارەستە جەدەل ەم الادى، ال 2 مىڭعا جۋىق بالاعا اشىق جۇرەككە وتا جاسايدى.

مەديتسينالىق وڭالتۋدى دامىتۋعا ەرەكشە كوڭىل بولىنۋدە. بۇگىندە قازاقستاندا بالالارعا ارنالعان 81 مەديتسينالىق وڭالتۋ ورتالىعى جۇمىس ىستەيدى، وندا جۇزدەگەن مىڭ كىشكەنتاي پاتسيەنت ءتۇرلى كومەك تۇرلەرىن الادى. جاڭا وڭالتۋ ورتالىقتارىن اشۋ جانە دامۋىنداعى اۋىتقۋلاردى ەرتە انىقتاپ، قاجەتتى كومەكتى دەر كەزىندە كورسەتۋگە مۇمكىندىك بەرەتىن ەرتە ارالاسۋ قىزمەتتەرىن دامىتۋ جۇمىستارى جالعاسۋدا.

بالالى وتباسىلاردى مەملەكەتتىك قولداۋ

سونداي-اق ەلىمىزدە بالانىڭ دۇنيەگە كەلگەن ساتىنەن باستاپ ونى تاربيەلەۋدىڭ بارلىق كەزەڭىندە وتباسىن سۇيەمەلدەيتىن كەشەندى قولداۋ جۇيەسى قالىپتاستىرىلعان. بۇگىندە بالالارى بار وتباسىلارعا ارنالعان بەس نەگىزگى جاردەماقى ءتۇرى قاراستىرىلعان.

بالا دۇنيەگە كەلگەن كەزدە بىرجولعى جاردەماقى تولەنەدى:
• ءبىرىنشى، ەكىنشى جانە ءۇشىنشى بالاعا – 164 350 تەڭگە;
• ءتورتىنشى جانە ودان كەيىنگى بالالارعا – 272 475 تەڭگە.

جۇمىس ىستەيتىن ايەلدەرگە جۇكتىلىك پەن بوسانۋعا، سونداي-اق جاڭا تۋعان بالانى اسىراپ الۋعا بايلانىستى تابىسىنان ايىرىلعان جاعدايدا الەۋمەتتىك تولەم قاراستىرىلعان. ونىڭ مولشەرى ايەلدىڭ سوڭعى 12 ايداعى ورتاشا ايلىق تابىسىنا قاراي ەسەپتەلەدى. 2026 جىلعى 1 مامىرداعى جاعداي بويىنشا بۇل تولەمنىڭ ورتاشا كولەمى 1,2 ميلليون تەڭگەنى قۇرادى.

سونداي-اق بالا 1,5 جاسقا تولعانعا دەيىن ونىڭ كۇتىمىنە بايلانىستى تابىسىنان ايىرىلعان جۇمىس ىستەيتىن ايەلدەرگە الەۋمەتتىك تولەم تولەنەدى. ونىڭ مولشەرى سوڭعى ەكى جىلداعى ورتاشا ايلىق تابىستىڭ 40% كولەمىندە بەلگىلەنەدى. مامىر ايىنىڭ باسىنداعى دەرەك بويىنشا بۇل تولەمنىڭ ورتاشا مولشەرى 86 062 تەڭگەگە جەتتى.

مۇگەدەكتىگى بار بالا تاربيەلەپ وتىرعان وتباسىلارعا دا قولداۋ كورسەتىلەدى. ولار اي سايىن 81 871 تەڭگە كولەمىندە جاردەماقى الادى.

كوپبالالى وتباسىلارعا ەرەكشە كوڭىل بولىنەدى. كىرىس دەڭگەيىنە قاراماستان، ولارعا اي سايىنعى جاردەماقى تولەنەدى:
• ءتورت بالاسى بار وتباسىلارعا – 69 330 تەڭگە;
• بەس بالاسى بار وتباسىلارعا – 86 673 تەڭگە;
• التى بالاسى بار وتباسىلارعا – 104 017 تەڭگە;
• جەتى جانە ودان دا كوپ بالاسى بار وتباسىلارعا – 121 360 تەڭگە.

سونىمەن قاتار «التىن القا» جانە «كۇمىس القا» القالارىمەن ماراپاتتالعان انالارعا قوسىمشا مەملەكەتتىك قولداۋ كورسەتىلەدى.

مۇگەدەكتىگى بار بالالاردى تاربيەلەپ وتىرعان وتباسىلارعا جەكە قولداۋ كورسەتىلەدى:
• جاردەماقى مولشەرى اي سايىن 81 871 تەڭگەنى قۇرايدى.

بۇگىندە تەك كوپبالالى وتباسىلارعا ارنالعان جاردەماقىمەن ەل بويىنشا 630 مىڭنان استام وتباسى قامتىلعان، بۇل اتالعان شارانى حالىقتى الەۋمەتتىك قولداۋدىڭ ەڭ اۋقىمدى باعدارلامالارىنىڭ بىرىنە اينالدىرادى.

مۇگەدەكتىگى بار ادامداردى قولداۋ

مۇگەدەكتىگى بار ادامداردى قولداۋ جۇيەسىن جەتىلدىرۋ جالعاسۋدا. سوڭعى جىلدارى مەملەكەتتىك قىزمەتتەردى الۋ راسىمدەرى ايتارلىقتاي جەڭىلدەتىلدى. 2022 جىلدان بەرى مەديتسينالىق-الەۋمەتتىك ساراپتاما بولىمشەلەرىنە بارماي-اق قاجەتتى راسىمدەردەن وتۋگە مۇمكىندىك بەرەتىن مۇگەدەكتىكتى تاعايىنداۋدىڭ سىرتتاي پرواكتيۆتى فورماتى ەنگىزىلدى. بۇگىنگى تاڭدا كۋالاندىرۋدىڭ 45%-دان استامى ونلاين-فورماتتا جۇرگىزىلەدى.

2026 جىلدان باستاپ مۇگەدەكتىگى بويىنشا بەرىلەتىن مەملەكەتتىك جاردەماقىلاردىڭ مولشەرى 10%-عا ارتتى. تولەم مولشەرى:

• I توپتاعى مۇگەدەكتىگى بار ادامدار ءۇشىن – 200 مىڭ تەڭگەگە دەيىن;
• II توپتاعى مۇگەدەكتىگى بار ادامدار ءۇشىن – 154 مىڭ تەڭگەگە دەيىن;
• III توپتاعى مۇگەدەكتىگى بار ادامدار ءۇشىن – 117 مىڭ تەڭگەگە دەيىن.

از قامتىلعان ازاماتتاردى قولداۋ

قازاقستاندا ازاماتتاردى الەۋمەتتىك قولداۋدىڭ كوپدەڭگەيلى جۇيەسى جۇمىس ىستەيدى. ول وتباسىلاردىڭ ءومىر ءسۇرۋ ساپاسىن ارتتىرۋعا جانە الەۋمەتتىك تۇراقتىلىقتى قامتاماسىز ەتۋگە باعىتتالعان. ونىڭ نەگىزگى قۇرالدارىنىڭ ءبىرى – اتاۋلى الەۋمەتتىك كومەك. بۇل كومەك وتباسىنىڭ تابىس دەڭگەيى مەن قۇرامىن ەسكەرە وتىرىپ تاعايىندالادى جانە قولداۋعا مۇقتاج ازاماتتارعا ناقتى كومەك كورسەتۋگە مۇمكىندىك بەرەدى.

ەڭبەككە قابىلەتتى ازاماتتار ءۇشىن قولداۋ شارالارى جۇمىسپەن قامتۋعا جاردەمدەسۋ، كاسىپتىك وقىتۋ جانە جۇمىسقا ورنالاستىرۋ باعدارلامالارىنا قاتىسۋمەن ۇشتاسادى. ەگەر وتباسىندا ەڭبەككە قابىلەتتى مۇشەلەر بولماسا نەمەسە ولار وبەكتيۆتى سەبەپتەرگە بايلانىستى جۇمىس ىستەي الماسا، قولداۋ ەشقانداي قوسىمشا شارتتارسىز كورسەتىلەدى.

2026 جىلعى 1 مامىرداعى جاعداي بويىنشا اتاۋلى الەۋمەتتىك كومەك:

• 34,5 مىڭ وتباسىعا;

• 186 مىڭ ازاماتقا;

• جالپى سوماسى 10,6 ملرد تەڭگەگە تاعايىندالدى.

سونىمەن قاتار جۇمىسپەن قامتۋعا جاردەمدەسۋ، كاسىپتىك وقىتۋ، كاسىپكەرلىك باستامالاردى قولداۋ جانە ەڭبەك رەسۋرستارىنىڭ ۇتقىرلىعىن ارتتىرۋ شارالارى جۇزەگە اسىرىلۋدا. مۇنداي ءتاسىل تەك قارجىلاي كومەك كورسەتىپ قانا قويماي، سونىمەن بىرگە وتباسىلاردىڭ تابىسىن ارتتىرۋعا جانە ازاماتتاردىڭ ءومىر ءسۇرۋ ساپاسىن جاقسارتۋعا جاعداي جاسايدى.

ومىرلىك قيىن جاعدايعا تاپ بولعان ازاماتتارعا ارنالعان ارنايى الەۋمەتتىك قىزمەتتەر

اقشالاي تولەمدەرمەن قاتار ەرەكشە قولداۋدى قاجەت ەتەتىن ازاماتتارعا ارنالعان ارنايى الەۋمەتتىك قىزمەتتەر جۇيەسى دامىپ كەلەدى. كومەك مۇگەدەكتىگى بار بالالارعا، 18 جاستان اسقان مۇگەدەكتىگى بار ادامدارعا، وزىنە-ءوزى قىزمەت كورسەتە المايتىن قارت ازاماتتارعا، تۇراقتى تۇرعىلىقتى جەرى جوق ادامدارعا، تۇرمىستىق زورلىق-زومبىلىق پەن ادام ساۋداسىنىڭ قۇرباندارىنا، سونداي-اق پروباتسيالىق باقىلاۋداعى ازاماتتارعا كورسەتىلەدى.

كەپىلدەندىرىلگەن كولەمدەگى ارنايى الەۋمەتتىك قىزمەتتەر اياسىندا مىناداي كەشەندى قولداۋ كورسەتىلەدى:

• الەۋمەتتىك-تۇرمىستىق قىزمەتتەر;

• الەۋمەتتىك-مەديتسينالىق قىزمەتتەر;

• الەۋمەتتىك-پسيحولوگيالىق قىزمەتتەر;

• الەۋمەتتىك-پەداگوگيكالىق قىزمەتتەر;

• الەۋمەتتىك-ەڭبەك قىزمەتتەرى;

• الەۋمەتتىك-مادەني قىزمەتتەر;

• الەۋمەتتىك-ەكونوميكالىق قىزمەتتەر;

• الەۋمەتتىك-قۇقىقتىق قىزمەتتەر.

2026 جىلعى 1 ماۋسىمداعى جاعداي بويىنشا ارنايى الەۋمەتتىك قىزمەتتەردى 649 ليتسەنزيالانعان ۇيىم كورسەتۋدە. قولداۋمەن 103 973 ادام قامتىلعان، ونىڭ ىشىندە:

• 60 055 ادام ءۇي جاعدايىندا قىزمەت الادى;

• 18 751 ادام – ستاتسيونارلىق جاعدايدا;

• 11 786 ادام – جارتىلاي ستاتسيونارلىق جاعدايدا;

• 4 125 ادام – ۋاقىتشا بولۋ ۇيىمدارىندا.

كورسەتىلەتىن كومەكتىڭ ساپاسىن ارتتىرۋ ماقساتىندا 2025 جىلدان باستاپ ارنايى الەۋمەتتىك قىزمەتتەر كورسەتەتىن ۇيىمداردى ليتسەنزيالاۋ ەنگىزىلدى. جاڭا تالاپتار بىلىكتى كادرلاردىڭ بولۋىن، قاجەتتى ماتەريالدىق-تەحنيكالىق بازانى، سانيتارلىق نورمالاردى ساقتاۋ، ءورت قاۋىپسىزدىگى تالاپتارىن ورىنداۋ جانە قوزعالىسى شەكتەۋلى ازاماتتار ءۇشىن قولجەتىمدى جاعدايلار جاساۋدى كوزدەيدى.

قابىلدانىپ جاتقان كەشەندى شارالار ومىرلىك قيىن جاعدايعا تاپ بولعان ازاماتتاردىڭ ءومىر ءسۇرۋ ساپاسىن ارتتىرۋعا، ولاردى الەۋمەتتىك بەيىمدەۋگە جانە قوعاممەن ەتەنە ارالاسۋىنا جاعداي جاساۋعا باعىتتالعان.

ءۇش اۋىسىمدى مەكتەپتەردى جويۋدان باستاپ جەكە ۆاۋچەرلەرگە دەيىن

ءبىلىم بەرۋ سالاسىندا جۇرگىزىلىپ جاتقان جۇمىستاردىڭ باستى ماقساتى – قالا مەن اۋىل مەكتەپتەرى اراسىنداعى الشاقتىقتى ازايتۋ. مەملەكەت باسشىسىنىڭ تاپسىرماسى اياسىندا 2020 جىلدان بەرى ەلىمىزدە 1,2 مىڭنان استام مەكتەپ سالىندى. ناتيجەسىندە 1 ملن-نان استام جاڭا وقۋشى ورنى اشىلدى، بۇل ءۇش اۋىسىمدى مەكتەپتەر سانىن ءتورت ەسەگە قىسقارتۋعا مۇمكىندىك بەردى. بيىل تاعى 53 مىڭ ورىنعا ارنالعان 96 مەكتەپتى پايدالانۋعا بەرۋ جوسپارلانىپ وتىر.

سونىمەن قاتار قولدانىستاعى مەكتەپ ينفراقۇرىلىمىن جاڭعىرتۋ جۇمىستارى ءجۇرىپ جاتىر: الداعى ءۇش جىل ىشىندە 1,3 مىڭ مەكتەپتى جاڭارتۋ كوزدەلگەن، ونىڭ 820-سى اۋىلدىق ەلدى مەكەندەردە ورنالاسقان. 2025 جىلدان بەرى 215 مەكتەپ جاڭارتىلدى. جۇرگىزىلىپ جاتقان جۇمىستار اياسىندا پاندىك كابينەتتەر، اسحانالار، سپورت زالدارى جانە قاۋىپسىزدىك جۇيەلەرى تولىق اۋىستىرىلۋدا.

ءبىلىم بەرۋ مازمۇنى دا زامان تالابىنا ساي جەتىلدىرىلۋدە. وقۋ ۇدەرىسىنە تسيفرلىق تەحنولوگيالار كەڭىنەن ەنگىزىلىپ، پاندىك دايىندىق كۇشەيتىلۋدە، سونداي-اق ەرەكشە ءبىلىم بەرۋدى قاجەت ەتەتىن بالالارعا ارنالعان بەيىمدەلگەن باعدارلامالار دامىتىلۋدا. پەداگوگتەردىڭ كاسىبي بىلىكتىلىگىن ارتتىرۋعا ەرەكشە كوڭىل ءبولىنىپ كەلەدى. بۇل وقۋ ورىندارىندا ءاربىر وقۋشىنىڭ قابىلەتىن اشۋعا مۇمكىندىك بەرەتىن قولايلى ءارى قولداۋشى ورتا قالىپتاستىرۋعا جول اشادى.

مەكتەپكە دەيىنگى تاربيە مەن وقىتۋ ءبىلىم بەرۋ جۇيەسىندەگى ماڭىزدى كەزەڭ بولىپ قالا بەرەدى. ءدال وسى كەزەڭدە بالانىڭ تۇلعالىق دامۋىنىڭ نەگىزى قالانىپ، قارىم-قاتىناس داعىدىلارى قالىپتاسادى جانە مەكتەپكە دايىندىق جۇرگىزىلەدى. وسىعان بايلانىستى مەملەكەت بالاباقشالار مەن مەكتەپالدى دايارلىققا قولجەتىمدىلىكتى دايەكتى تۇردە كەڭەيتىپ كەلەدى. بۇگىنگى تاڭدا رەسپۋبليكا بويىنشا 12 مىڭنان استام مەكتەپكە دەيىنگى ۇيىم جۇمىس ىستەيدى. ونىڭ 5,3 مىڭى – مەملەكەتتىك، ال 6,6 مىڭى –  جەكەمەنشىك ۇيىمدار. مۇندا 1 ملن-نان استام بالا تاربيەلەنۋدە، 2-6 جاس ارالىعىنداعى بالالاردى مەكتەپكە دەيىنگى بىلىممەن قامتۋ دەڭگەيى 70,9%-عا جەتسە، كەزەكتە تۇرعان بالالار اراسىندا بۇل كورسەتكىش 96%-دى قۇرايدى.

مەكتەپكە دەيىنگى ءبىلىم بەرۋدىڭ قولجەتىمدىلىگىن ارتتىرۋ ءۇشىن قارجىلاندىرۋدىڭ جاڭا تاسىلدەرى ەنگىزىلۋدە. اتاپ ايتقاندا، ەلىمىزدىڭ 20 قالاسى مەن 23 اۋدانىندا ۆاۋچەرلىك قارجىلاندىرۋدىڭ پيلوتتىق جوباسى ىسكە قوسىلدى. جوباعا 6 مىڭعا جۋىق ۇيىم قاتىسىپ، 936 مىڭنان استام ۆاۋچەر بەرىلدى. بۇل قادام بيۋدجەت شىعىستارىنىڭ اشىقتىعى مەن تيىمدىلىگىن ارتتىرىپ قانا قويماي، بالاباقشالارداعى رەسپۋبليكالىق كەزەكتى 2025 جىلدان بەرى 9 ەسەگە دەرلىك قىسقارتتى. ناتيجەسىندە كەزەكتە تۇرعان بالالار سانى 160 مىڭنان 18 مىڭعا دەيىن ازايدى.

سوڭعى ءۇش جىلدا ەلىمىزدە مەكتەپكە دەيىنگى ۇيىمداردا 223 مىڭ جاڭا ورىن اشىلدى، ال 2027 جىلدىڭ سوڭىنا دەيىن تاعى 76,5 مىڭ ورىن اشۋ جوسپارلانۋدا. مەكتەپكە دەيىنگى ءبىلىم بەرۋ ۇدەرىسىنىڭ ساپاسىن قامتاماسىز ەتۋ ىسىنە 104 مىڭنان استام مامان تارتىلعان. ولار ءۇشىن ەرتە جاستاعى بالالاردى دامىتۋ سالاسىنداعى قاماناۋي ستاندارتتارعا سايكەس تۇراقتى تۇردە بىلىكتىلىكتى ارتتىرۋ جۇيەسى قالىپتاستىرىلعان.

بالاباقشالار جەلىسىن كەڭەيتۋ، قارجىلاندىرۋدىڭ جاڭا تاسىلدەرىن ەنگىزۋ جانە مۇعالىمدەرگە قولداۋ كورسەتۋ مەكتەپكە دەيىنگى ءبىلىم بەرۋدى قولجەتىمدى ءارى ساپالى ەتۋگە سەپتىگىن تيگىزۋدە. بۇل ءوز كەزەگىندە بالالاردى مەكتەپكە دايىنداۋمەن قاتار ولاردىڭ ەرتە جاستان قاۋىپسىز، جان-جاقتى دامىتۋشى جانە قامقور ورتادا تاربيەلەنۋىنە مۇمكىندىك بەرەدى.

جەكەمەنشىك مەكتەپتەردى مەملەكەتتىك قولداۋ

مەملەكەتتىك مەكتەپتەر جەلىسىن دامىتۋىمەن قاتار، قازاقستاندا ءبىلىم بەرۋدىڭ قولجەتىمدىلىگىن قامتاماسىز ەتۋگە جەكە سەكتوردىڭ قاتىسۋىنا جاعداي جاسالۋدا. نەگىزگى قۇرالداردىڭ ءبىرى – مەملەكەتتىك ءبىلىم بەرۋ تاپسىرىسى. ونىڭ ارقاسىندا قارجىلاندىرۋ ءبىلىم بەرۋ ۇيىمىنىڭ مەنشىك نىسانىنا قاراماستان بالالاردى وقىتۋعا باعىتتالادى. بۇل ساپالى بىلىمگە قولجەتىمدىلىكتى كەڭەيتۋگە، قوسىمشا وقۋشى ورىندارىن قۇرۋعا جانە ءبىلىم بەرۋ ينفراقۇرىلىمىن دامىتۋعا جەكە ينۆەستيتسيالاردى تارتۋعا مۇمكىندىك بەرەدى.

ماڭىزدى كەزەڭدەردىڭ ءبىرى – مەملەكەتتىك ءبىلىم بەرۋ تاپسىرىسىن قارجىلاندىرۋ جۇيەسىن تسيفرلاندىرۋ بولدى. 2025 جىلدان باستاپ قارجىلاندىرۋ ۇدەرىستەرىن تسيفرلىق فورماتقا كوشىرۋ بويىنشا پيلوتتىق جوبا جۇزەگە اسىرىلۋدا. ونىڭ ماقساتى – بيۋدجەت قاراجاتىن ءبولۋدىڭ اشىقتىعىن قامتاماسىز ەتۋ، ءبىلىم الۋشىلاردى ەسەپكە الۋدىڭ دالدىگىن ارتتىرۋ جانە مەملەكەتتىك قارجىلاندىرۋدىڭ پايدالانىلۋىنا باقىلاۋدى كۇشەيتۋ.

بۇگىنگى كۇنى جوبا اياسىندا e-Qazyna پلاتفورماسىندا 6 325 مەكتەپ تسيفرلاندىرىلدى، ونىڭ ىشىندە 5 443-ءى مەملەكەتتىك مەكتەپتەر. وسىلايشا، تسيفرلىق جۇيە تەك مەملەكەتتىك ەمەس، سونىمەن قاتار مەملەكەتتىك ءبىلىم بەرۋ تاپسىرىسىن جۇزەگە اسىرۋعا قاتىساتىن جەكەمەنشىك ءبىلىم بەرۋ ۇيىمدارىن دا قامتيدى. جاڭا تەتىكتەردى ەنگىزۋ ءبىلىم الۋشىلار كونتينگەنتىن ەسەپكە الۋدى اۆتوماتتاندىرۋعا، دەرەكتەردى قالىپتاستىرۋ كەزىندە ادامي فاكتوردىڭ اسەرىن ازايتۋعا جانە ءبىلىم بەرۋ ۇيىمدارى اراسىندا بيۋدجەت قاراجاتىن وبەكتيۆتى ءبولۋدى قامتاماسىز ەتۋگە مۇمكىندىك بەرەدى. ناتيجەسىندە مەملەكەتتىك رەسۋرستاردى پايدالانۋ تيىمدىلىگى ارتىپ، ەلدەگى مەملەكەتتىك تە، جەكەمەنشىك تە ءبىلىم بەرۋ ينفراقۇرىلىمىن ودان ءارى دامىتۋ ءۇشىن قوسىمشا جاعدايلار جاسالادى.

جاستار ءۇشىن قولجەتىمدى ءبىلىم بەرۋ

مەملەكەت باسشىسىنىڭ تاپسىرمالارى شەڭبەرىندە ۇكىمەت جاستاردىڭ ساپالى ءبىلىم الۋعا قولجەتىمدىلىگىن كەڭەيتۋ بويىنشا اۋقىمدى شارالار كەشەنىن جۇزەگە اسىرۋدا. سوڭعى بەس جىلدا ءبىلىم بەرۋ گرانتتارىنىڭ سانى 65,1 مىڭنان 93,2 مىڭعا دەيىن ۇلعايدى. وسىلايشا، مىڭداعان جاستار جوعارى وقۋ ورىندارىندا تەگىن وقۋعا مۇمكىندىك الدى.

قوسىمشا ارنايى قولداۋ باعدارلامالارى جۇزەگە اسىرىلۋدا. جەكەلەگەن وڭىرلەردىڭ جاستارى ءۇشىن قوسىمشا گرانتتار بولىنەدى، جەرگىلىكتى اتقارۋشى ورگاندار، «قازاقستان حالقىنا» قورى، بيزنەس-قوعامداستىق جانە جوعارى وقۋ ورىندارىنىڭ وزدەرى ارقىلى ءبىلىم الۋ مۇمكىندىكتەرى ۇسىنىلادى.

سونىمەن قاتار ستۋدەنتتەرگە الەۋمەتتىك قولداۋدى ارتتىرۋ بويىنشا جۇمىستار جۇرگىزىلۋدە. سوڭعى جىلدارى مەملەكەتتىك شاكىرتاقىلاردىڭ مولشەرى ايتارلىقتاي ۇلعايتىلدى. 2020 جىلمەن سالىستىرعاندا باكالاۆريات ستۋدەنتتەرىنىڭ شاكىرتاقىسى ەكى ەسەگە ءوسىپ، 26,2 مىڭ تەڭگەدەن 52,4 مىڭ تەڭگەگە جەتتى. ال پەداگوگيكالىق ماماندىقتاردا ءبىلىم الىپ جۇرگەن ستۋدەنتتەردىڭ شاكىرتاقىسى 42 مىڭ تەڭگەدەن 84 مىڭ تەڭگەگە دەيىن كوبەيدى. وسى كەزەڭدە ماگيسترانتتار مەن دوكتورانتتاردىڭ شاكىرتاقىسى 1,75 ەسەگە ارتتى.

ستۋدەنتتەردىڭ وقۋىنا قولايلى جاعداي جاساۋ ماڭىزدى باعىتتاردىڭ ءبىرى بولىپ قالا بەرەدى. تەك 2025 جىلى 10 مىڭنان استام ورىنعا ارنالعان 30 جاڭا جاتاقحانا پايدالانۋعا بەرىلدى. سونىمەن قاتار مەملەكەت اتا-انا قامقورلىعىنسىز قالعان ستۋدەنتتەر مەن I جانە II توپتاعى مۇگەدەكتىگى بار ستۋدەنتتەردىڭ جاتاقحانادا تۇرۋ شىعىندارىن وتەيدى.

«بولاشاق» جانە دارىندى جاستارعا ارنالعان جاڭا مۇمكىندىكتەر

جاستاردى قولداۋ جۇيەسىندە حالىقارالىق «بولاشاق» باعدارلاماسىنىڭ ورنى ەرەكشە. سوڭعى ءۇش جىلدا الەمنىڭ جەتەكشى ۋنيۆەرسيتەتتەرىندە 994 ستيپەنديات ءبىلىم الدى. ەكونوميكا ءۇشىن سۇرانىسقا يە باعىتتار، ونىڭ ىشىندە اقپاراتتىق تەحنولوگيالار، ينجەنەرلىك ماماندىقتار، ماشينا جاساۋ، مەديتسينا، قارجى جانە قۇقىق سالالارى بويىنشا ماماندار دايارلالانۋدا.

قوسىمشا 342 مامان شەتەلدىك جەتەكشى ۇيىمداردا كاسىبي تاعىلىمدامادان ءوتتى. باعدارلامانى دامىتۋدىڭ جاڭا كەزەڭى 2026 جىلى حالىقارالىق وليمپيادالاردىڭ، عىلىمي كونكۋرستاردىڭ جانە شىعارماشىلىق جارىستاردىڭ جەڭىمپازدارى ءۇشىن باكالاۆريات باعىتى العاش رەت اشىلعان كەزدە باستالدى.

عىلىم مەن جاس عالىمداردى قولداۋ

سوڭعى جىلدارى قازاقستاندا عىلىمي كادرلاردى دايارلاۋدى، زەرتتەۋلەردى قارجىلاندىرۋدى، حالىقارالىق تاعىلىمدامالاردى جانە الەۋمەتتىك ماسەلەلەردى شەشۋدى قامتيتىن جاس عالىمداردى قولداۋدىڭ كەشەندى جۇيەسى قالىپتاستى. قابىلدانىپ جاتقان شارالار جاستاردى عىلىمعا تارتۋعا، زەرتتەۋلەر جۇرگىزۋ ءۇشىن جاعداي جاساۋعا جانە جوعارى بىلىكتى مامانداردىڭ جاڭا بۋىنىن قالىپتاستىرۋعا باعىتتالعان.

عىلىمي كادرلاردى دايارلاۋ ءۇشىن جىل سايىن جوعارى وقۋ ورنىنان كەيىنگى ءبىلىم الۋ مۇمكىندىكتەرى كەڭەيتىلۋدە. 2025-2026 وقۋ جىلىنا دوكتورانتتاردى دايارلاۋعا 2919 ءبىلىم بەرۋ گرانتى ءبولىندى. يندۋستريالىق PhD تەتىگى بويىنشا ەكونوميكانىڭ باسىم باعىتتارى بويىنشا ماماندار دايارلاۋ ءۇشىن قوسىمشا 110 گرانت كوزدەلگەن.

«جاس عالىم» گرانتتىق قارجىلاندىرۋ باعدارلاماسى جالعاسۋدا، ونىڭ شەڭبەرىندە جىل سايىن جاس زەرتتەۋشىلەردىڭ عىلىمي جوبالارىن جۇزەگە اسىرۋعا مىڭ گرانت بولىنەدى. زاڭنامالىق دەڭگەيدە پەرسپەكتيۆالى زەرتتەۋشىلەردى قولداۋعا جانە عىلىمدى جاستار اراسىندا ناسيحاتتاۋعا باعىتتالعان جىل سايىنعى «ۇزدىك جاس عالىم» سىيلىعى بەكىتىلدى.

حالىقارالىق ىنتىماقتاستىق پەن عالىمداردىڭ بىلىكتىلىگىن ارتتىرۋعا ەرەكشە كوڭىل بولىنۋدە. 2021 جىلدان بەرى الەمنىڭ جەتەكشى ۋنيۆەرسيتەتتەرى مەن عىلىمي ورتالىقتارىندا وقۋ مەن تاعىلىمدامادان وتۋگە مۇمكىندىك بەرەتىن «250 عىلىمي تاعىلىمداما» باعدارلاماسى جۇزەگە اسىرىلۋدا. 2021-2025 جىلدار ارالىعىندا شەتەلدىك عىلىمي تاعىلىمدامالارعا 1543 قازاقستاندىق عالىم جىبەرىلدى. باعدارلاماعا قاتىسۋشىلاردىڭ 62%-دان استامىن جاس زەرتتەۋشىلەر قۇرايدى.

سونىمەن قاتار عىلىمي قوعامداستىقتى الەۋمەتتىك قولداۋ شارالارى دا كۇشەيتىلۋدە. 2023 جىلعى 1 قىركۇيەكتەن بەرى ءبىر دوكتورانتتى دايارلاۋدى قارجىلاندىرۋ كولەمى ورتا ەسەپپەن 17%-عا ۇلعايدى، بۇل زەرتتەۋلەر جۇرگىزۋ جانە عىلىمي كادرلار دايارلاۋ ءۇشىن مۇمكىندىكتەردى كەڭەيتۋگە جول اشادى.

تۇرعىن ءۇي ماسەلەسىنە ەرەكشە كوڭىل بولىنۋدە. بۇگىنگى تاڭدا 722 جاس عالىم باسپانامەن قامتاماسىز ەتىلدى. ونىڭ ىشىندە 584 ادام عىلىم جانە جوعارى ءبىلىم مينيسترلىگى مەن «وتباسى بانك» اق-نىڭ بىرلەسكەن باعدارلاماسىنىڭ ارقاسىندا باسپانا ساتىپ الۋعا مۇمكىندىك الدى، تاعى 138 جاس عالىم وتەۋسىز نەگىزدە پاتەر الدى.

جۇزەگە اسىرىلىپ جاتقان شارالار كەشەنى زاماناۋي عىلىمي ورتانى قالىپتاستىرۋعا، جاستاردىڭ زەرتتەۋ الەۋەتىن دامىتۋعا، عىلىمنىڭ كادرلىق الەۋەتىن نىعايتۋعا جانە قازاقستاننىڭ جاھاندىق عىلىمي-تەحنولوگيالىق كەڭىستىكتەگى باسەكەگە قابىلەتتىلىگىن ارتتىرۋعا باعىتتالعان.

زەينەتاقىمەن قامتۋ جانە اعا بۋىنعا قولداۋ كورسەتۋ

الەۋمەتتىك ساياساتتىڭ ماڭىزدى باعىتتارىنىڭ ءبىرى اعا بۋىندى قولداۋ بولىپ قالا بەرەدى. مەملەكەت باسشىسىنىڭ تاپسىرماسى بويىنشا ۇكىمەت ىنتىماقتى، بازالىق جانە جيناقتاۋشى زەينەتاقىلاردان تۇراتىن زەينەتاقى جۇيەسىنىڭ تۇراقتى جۇمىس ىستەۋىن قامتاماسىز ەتەدى.

بۇگىنگى تاڭدا 2,5 ملن-نان استام قازاقستاندىق زەينەتاقى تولەمدەرىن الادى. جىل سايىن زەينەتاقى مولشەرى يندەكستەلىپ وتىرادى جانە الەۋمەتتىك كورسەتكىشتەر مەن ينفلياتسيانى ەسكەرە وتىرىپ جوعارىلاتىلادى. ارداگەرلەردى، تىل ەڭبەككەرلەرىن، ساياسي قۋعىن-سۇرگىننەن زارداپ شەككەن ادامداردى جانە حالىقتىڭ باسقا دا الەۋمەتتىك وسال توپتارىن قوسا العاندا، ازاماتتاردىڭ 18 ساناتى ارناۋلى مەملەكەتتىك جاردەماقى الادى.

وسىلايشا، قازاقستاننىڭ الەۋمەتتىك ساياساتى بۇگىندە ادام ءومىرىنىڭ بارلىق كەزەڭىن قامتيتىن قولداۋ جۇيەسى رەتىندە قالىپتاسىپ كەلەدى. وعان مەديتسينالىق كومەك كورسەتۋ، انا مەن بالانى قورعاۋ، وتباسىلارعا قولداۋ، مۇقتاج ازاماتتارعا اتاۋلى الەۋمەتتىك كومەك بەرۋ، ءبىلىم الۋ مۇمكىندىكتەرىن كەڭەيتۋ، عىلىمدى دامىتۋ جانە تۇراقتى زەينەتاقى جۇيەسىن قامتاماسىز ەتۋ كىرەدى. بۇل الەۋمەتتىك مەملەكەت قاعيداتتارىنىڭ جانە پرەزيدەنت قاسىم-جومارت توقاەۆتىڭ ادىلەتتى قازاقستان قۇرۋ جونىندەگى باعىتىنىڭ ناقتى كورىنىسى. مۇنداعى باستى قۇندىلىق – ادام، ونىڭ ءال-اۋقاتى مەن ءومىر ساپاسى.

Abai.kz