زەينەتاقى اقشاسى ەرتەڭگى جايلى قارتتىقتىڭ كەپىلى. وسىنى ۇمىتپايىق

بۇگىننەن باستاپ زەينەتاقى بويىنشا جەتكىلىكتىك شەگى ايتارلىقتاي كوتەرىلدى. وسى ارقىلى، مەملەكەت پاندەميا كەزىندە ادامدار قىسىلماس ءۇشىن اشىپ بەرگەن ۋاقىتشا شاراسىن توقتاتتى دەۋگە بولادى. ءتىپتى دەر كەزىندە دەي المايمىن. مۇنى 2 جىل ەرتەرەك ىستەۋ كەرەك ەدى.

زەينەتاقى جيناعى بۇل قازىرگى كەرەك-جاراققا تولەيتىن بانكتەگى شوتىمىز ەمەس. بىراق ءبىز 5 جىلدا جامان ۇيرەنىپ الدىق تا، بولاشاق قارتتىعىمىزعا جيناعانىمىزدى بۇگىن قۇرتا باستادىق. سول كەزدە ەرتەڭ زەينەت جاسىندا جەتكىلىكتى تابىسسىز قالۋى قاۋپى بىردەن پايدا بولدى. ولاي ءبارىن جاراتىپ تاستاساق، جالپى بۇل رەفورمانىڭ نە قاجەتى بار ەدى دەگەن سۇراق تۋادى.

سوندىقتان جەتكىلىكتىلىك شەگى ادامنىڭ اقشاسىنا قويىلعان بوگەت ەمەس. بۇل بولاشاقتاعى زەينەتاقىسىنىڭ تىم تومەندەپ كەتپەۋى ءۇشىن جاسالعان قورعانىس مەحانيزمى. ياعني مەملەكەت «بۇل اقشانى بەرمەيمىن» دەپ وتىرعان جوق. مەملەكەت «بۇل اقشا سەنىڭ وزىڭە كەرەك بولادى، ونى تولىق جۇمساپ قويما» دەپ وتىر.

جاڭا ادىستەمەنىڭ ءمانى دە وسىندا. ول زەينەتاقى جيناعىنىڭ جەتكىلىكتىلىگىن بۇرىنعىدان ناقتىراق ەسەپتەۋگە باعىتتالعان. مۇندا ادامنىڭ بولاشاقتاعى ءومىر ءسۇرۋ ۇزاقتىعى، زەينەتاقى اكتيۆتەرىنىڭ ىقتيمال تابىستىلىعى، ەڭبەك ءوتىلى، جارنالاردىڭ تۇراقتىلىعى جانە زەينەت جاسىنداعى قاجەتتى تابىس دەڭگەيى ەسكەرىلەدى.

اسىرەسە بۇل جاس قازاقستاندىقتار ءۇشىن ماڭىزدى. سەبەبى بولاشاقتا ولاردىڭ زەينەتاقىسىنىڭ نەگىزگى بولىگى وزدەرىنىڭ جيناقتارىنا كوبىرەك تاۋەلدى بولادى. قازىرگى بۋىن ءالى ەڭبەك جولىندا. الداعى 20-30 جىلدا ولاردىڭ تابىسى دا، جۇمىس ورنى دا، ەڭبەك جاعدايى دا وزگەرۋى مۇمكىن. بىرەۋ ۇزدىكسىز جۇمىس ىستەيدى، بىرەۋ ۋاقىتشا ءۇزىلىس جاسايدى، بىرەۋ جەكە كاسىپكە كەتەدى، بىرەۋ تابىسى تومەن كەزەڭدەردى باستان كەشىرەدى. مۇنداي ومىرلىك ستسەناريلەردىڭ ءبارى زەينەتاقى جيناعىنا اسەر ەتەدى.

زەينەتاقى جيناعى مەملەكەتتىڭ اقشاسى ەمەس. ول ازاماتتىڭ ءوزىنىڭ جەكە جيناعى. مەملەكەت ونى ءوز بيۋدجەتىنە المايدى، باسقا ماقساتقا جۇمسامايدى. جەتكىلىكتىلىك شەگىنەن تومەن جاتقان قاراجات تا ادامنىڭ ءوز شوتىندا قالا بەرەدى. ول ءارى قاراي ينۆەستيتسيالىق تابىس اكەلەدى، كوبەيەدى، ساقتالادى جانە زەينەت جاسىنا جەتكەندە سول ادامنىڭ وزىنە تولەنەدى.

دەمەك پوروگتىڭ كوتەرىلۋى «اقشانى تارتىپ الۋ» دەگەندى بىلدىرمەيدى. بۇل اقشانى ادامنىڭ ءوز بولاشاعىنا قالدىرۋ. بۇگىنگى شەشىم ەرتەڭگى قارتتىقتىڭ ساپاسىنا تىكەلەي اسەر ەتەدى. ەگەر بۇگىن ءبارىن جۇمساپ قويساق، ەرتەڭ مەملەكەتتەن نەمەسە بالالاردان كوبىرەك تاۋەلدى بولۋ قاۋپى ارتادى. ال جەتكىلىكتى جيناق ساقتالسا، ادام زەينەت جاسىندا دا قارجىلىق تاۋەلسىزدىگىن جوعالتپايدى.

ايبار ولجاەۆ

Abai.kz