قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ NVIDIA ۆيتسە-پرەزيدەنتى رەۆ لەبارەديانمەن جانە Firebird نەگىزىن قالاۋشىلار: باس ديرەكتورى رازميك وۆاكيميانمەن جانە الەكساندر ەسايانمەن كەزدەسۋ وتكىزدى. كەزدەسۋگە پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ، «قازاقتەلەكوم» اق باسقارما توراعاسى باعدات مۋسين، اقش-تىڭ قازاقستانداعى ەلشىسى دجۋلي ستاففت قاتىستى.

امەريكالىق Firebird كومپانياسى جاساندى ينتەللەكت ينفراقۇرىلىمىن قۇرۋعا، دەرەكتەر ورتالىقتارىن دامىتۋعا جانە جوعارى ءونىمدى ەسەپتەۋ جۇيەلەرىن ازىرلەۋگە ماماندانعان. كومپانيا الەمنىڭ ءتۇرلى وڭىرلەرىندە جوبالاردى جۇزەگە اسىرىپ، جاساندى ينتەللەكت، جوعارى ءونىمدى ەسەپتەۋلەر جانە تسيفرلىق ينفراقۇرىلىم سالاسىنداعى الەمدىك كوشباسشى NVIDIA سياقتى جەتەكشى تەحنولوگيالىق سەرىكتەستەرمەن ىنتىماقتاستىق ورناتقان. كومپانيانىڭ شەشىمدەرى الەمدەگى جەتەكشى سۋپەركومپيۋتەرلەر مەن دەرەكتەردى وڭدەۋ ورتالىقتارىنىڭ باسىم بولىگىندە قولدانىلادى، سونداي-اق قازىرگى زامانعى گەنەراتيۆتى جاساندى ينتەللەكت مودەلدەرىنىڭ ەلەۋلى بولىگىنىڭ نەگىزىن قۇرايدى.

كەزدەسۋ بارىسىندا ۇلتتىق جاساندى ينتەللەكت ينفراقۇرىلىمىن دامىتۋ ماسەلەلەرى تالقىلاندى. ولاردىڭ قاتارىندا جوعارى ءونىمدى ەسەپتەۋ قۋاتتارىن قۇرۋ، زاماناۋي دەرەكتەردى وڭدەۋ ورتالىقتارىن ورنالاستىرۋ جانە حالىقارالىق تەحنولوگيالىق سەرىكتەستەردى تارتۋ ماسەلەلەرى تالقىلاندى.

سۋرەت: primeminister.kz سايتىنان الىندى.

پرەمەر-مينيستر جاساندى ينتەللەكت پەن تسيفرلىق ينفراقۇرىلىمدى دامىتۋ قازاقستاننىڭ نەگىزگى باسىمدىقتارىنىڭ ءبىرى ەكەنىن اتاپ ءوتتى.

«مەملەكەت باسشىسى 2026-شى جىلدى تسيفرلاندىرۋ جانە جاساندى ينتەللەكت جىلى دەپ جاريالادى. وسى اپتادا «Digital Qazaqstan» تسيفرلىق ترانسفورماتسيا جانە جاساندى ينتەللەكتىنى دامىتۋ جونىندەگى جالپىۇلتتىق ستراتەگياسى قابىلداندى. قازىرگى تاڭدا نەگىزگى تسيفرلىق جوبالاردىڭ ءبىرى –  ەكىباستۇز قالاسىندا «دەرەكتەردى وڭدەۋ ورتالىقتارىنىڭ القابى» جوباسى جۇزەگە اسىرىلىپ جاتىر. ءبىزدىڭ ماقساتىمىز – جاھاندىق تسيفرلىق ينفراقۇرىلىمدى ورنالاستىرۋعا ارنالعان الاڭ قالىپتاستىرۋ. ءبىز Firebird جانە NVIDIA سەرىكتەستەرىمەن جاسالعان كەلىسىمدەردى جوعارى باعالايمىز»، — دەپ اتاپ ءوتتى ولجاس بەكتەنوۆ.

پرەمەر-مينيستر «ءدوو القابى» جوباسىنىڭ نەگىزگى ارتىقشىلىقتارىنا نازار اۋداردى. ولاردىڭ قاتارىندا اۋقىمدى جەر رەزەرۆى، جەڭىلدىكتەر جانە ەلەكتر ەنەرگياسىنىڭ باسەكەگە قابىلەتتى باعاسى بار. جوبانى كەڭ اۋقىمدا تاراتۋ مۇمكىندىگى ينۆەستورلار ءۇشىن ماڭىزدى فاكتور بولىپ تابىلادى، ياعني قازىرگى تاڭدا 300 مۆت قۋات قولجەتىمدى بولسا، الداعى ۋاقىتتا ونى كەزەڭ-كەزەڭىمەن 1 گۆت-قا دەيىن ارتتىرۋ جوسپارلانىپ وتىر.

Firebird كومپانياسىنىڭ نەگىزىن قالاۋشى ءارى باس ديرەكتورى رازميك وۆاكيميان قازاقستاننىڭ تسيفرلىق ينفراقۇرىلىمدى دامىتۋداعى جوعارى الەۋەتىن اتاپ ءوتتى.

«پرەزيدەنتتىڭ 2026 جىلدى  «جاساندى ينتەللەكت جىلى» دەپ جاريالاۋ جونىندەگى كورەگەن شەشىمىن ەرەكشە اتاپ وتكىم كەلەدى. قازاقستانعا العاش كەلگەن كەزدە-اق ەلدىڭ بيىك ماقساتتارى، تەحنولوگيالىق تاجىريبەسى مەن ادامي كاپيتالى الەمدىك دەڭگەيدە ەكەنى بىردەن بايقالدى. بۇگىندە جاساندى ينتەللەكتىنىڭ وزىق ەسەپتەۋ قۋاتتارىنا، تالانتتاردى دامىتۋعا جانە يننوۆاتسيالىق ەكوجۇيەلەرگە ينۆەستيتسيا سالىپ جاتقان ەلدەر ەرتەڭگى ەكونوميكالىق مۇمكىندىكتەردى قالىپتاستىراتىن بولادى. Firebird اقش-تىڭ وزىق تەحنولوگيالارىن ەنگىزۋ تاجىريبەسىن، جاھاندىق جاساندى ينتەللەكت ەكوجۇيەسىندەگى تىعىز سەرىكتەستىك بايلانىستارىن جانە ءىرى اۋقىمدى ينفراقۇرىلىمدىق جوبالاردى قاۋىپسىز ءارى ەرەكشە جىلدامدىقپەن جۇزەگە اسىرۋ قابىلەتىن بىرىكتىرەدى. 2027 جىلى جوبانى ىسكە قوسۋ قازاقستاندى الەمدەگى جەتەكشى ون ەلدىڭ قاتارىنا قوسادى. ءبىزدىڭ كوماندامىز مىقتى، مۇمكىندىكتەرىمىز زور جانە ءبىز قازاقستان ۇكىمەتىمەن، NVIDIA كومپانياسىمەن جانە اقش-تاعى سەرىكتەستەرىمىزبەن ىنتىماقتاسا وتىرىپ، قازاقستاننىڭ ماقسات-مۇراتىن شىنايى جۇزەگە اسىرۋعا ءوز ۇلەسىمىزدى قوساتىنىمىزعا قۋانىشتىمىز»، — دەدى رازميك وۆاكيميان.

NVIDIA كومپانياسىنىڭ ۆيتسە-پرەزيدەنتى رەۆ لەبارەديان «ءدوو القابى» جوباسىن جۇزەگە اسىرۋعا ارنالعان نەگىزگى تەحنولوگيالىق قۇرالدار مەن تاسىلدەردى جانە قازاقستاننىڭ جاھاندىق جاساندى ينتەللەكت ەكوجۇيەسىنە ينتەگراتسيالانۋ پەرسپەكتيۆالارىن تانىستىردى.

 «جاساندى ينتەللەكتتى دامىتۋ ءۇشىن “بەس قاباتتى تورت” دەپ اتايتىن قۇرىلىم قاجەت. بۇل دەڭگەيدە ءبىز تومەنگى قاباتتارداعى بارلىق تەحنولوگيالاردى الىپ، ولاردى ءتۇرلى سالالار مەن باعىتتارعا ارنالعان قوسىمشالارعا اينالدىرامىز، وسىلايشا ولار ناقتى پايدا مەن قۇندىلىق اكەلەدى. بىراق ءبارى ەنەرگيادان باستالادى. ەگەر ەنەرگيا بولماسا، قالعانىن دامىتۋ مۇمكىن ەمەس. بۇل – ىرگەتاس. قازاقستاندا ەنەرگيا رەسۋرستارى بار. ونىڭ قورى مول ءارى ونى ودان ءارى ءوندىرۋ مۇمكىندىگى بولعاندىقتان، قازاقستان بۇل باعىتتى باستاۋ ءۇشىن وتە قولايلى ورىن بولىپ سانالادى. شىن مانىندە قازاقستان وسى بەس قاباتتى تورتتىڭ ءاربىر دەڭگەيىنە قاتىسا الادى. مەن كورگەنىم، وقىعانىم جانە قازىر وسىندا بولىپ بايقاعانىم بويىنشا، قازاقستاننىڭ رۋحى مەن جىگەرى العا قاراي ۇمتىلۋعا جانە ەلدىڭ بار يگىلىگىن — تابيعي رەسۋرستارىن دا، ادامي كاپيتالىن دا — جاساندى ينتەللەكتتىڭ جاڭا داۋىرىنە قادام باسۋ ءۇشىن پايدالانۋعا باعىتتالعان»، — دەدى رەۆ لەبارەديان.

كەزدەسۋگە قاتىسۋشىلار مۇنداي جوبالارعا الەم بويىنشا قىزىعۋشىلىقتىڭ قارقىندى ءوسىپ كەلە جاتقانىن اتاپ ءوتتى. حالىقارالىق ساراپشىلاردىڭ باعالاۋىنشا، الداعى جىلدارى جاساندى ينتەللەكتىنىڭ جاھاندىق نارىعىنىڭ كولەمى جۇزدەگەن ملرد دوللاردان اسادى، ال AI-مودەلدەردى وقىتۋ جانە پايدالانۋ ءۇشىن قاجەتتى ەسەپتەۋ قۋاتتارىنا سۇرانىس جىل سايىن ەكى ەسە قارقىنمەن ءوسىپ كەلەدى. وسىعان بايلانىستى مەملەكەتتەر تەك ازىرلەۋشىلەر مەن تەحنولوگيالار ءۇشىن عانا ەمەس، سونىمەن قاتار جاڭا بۋىننىڭ تسيفرلىق ەكونوميكاسىنىڭ نەگىزىنە اينالاتىن ينفراقۇرىلىم ءۇشىن دە بەلسەندى باسەكەگە تۇسۋدە.

«مەملەكەت باسشىسىنىڭ تاپسىرماسىنا سايكەس قازاقستان جاساندى ينتەللەكتتى دامىتۋعا ارنالعان ۇلتتىق ينفراقۇرىلىمدى جۇيەلى تۇردە قالىپتاستىرۋدا. «ءدوو القابى» جوباسى جاساندى ينتەللەكتى ەكونوميكاسىنىڭ جاڭا بۋىنى – جي-توكەندەر ەكونوميكاسىنىڭ نەگىزگى پلاتفورمالارىنىڭ بىرىنە اينالادى.  $10 ملرد كولەمىندەگى ينۆەستيتسيالار ەلىمىزدە NVIDIA GB300 جانە Vera Rubin چيپتەرىن قوسا العاندا، سوڭعى بۋىنداعى 100 مىڭ GPU-چيپتەرى نەگىزىندە اۋقىمدى ەسەپتەۋ كلاستەرىن قۇرۋعا مۇمكىندىك بەرەدى. ءبىزدىڭ باعالاۋىمىز بويىنشا، جوبانى جۇزەگە اسىرۋ جىل سايىن كەمىندە $3 ملرد كولەمىندە ەكسپورتتىق كىرىس اكەلەدى، جاڭا جۇمىس ورىندارىن اشادى، جاھاندىق تەحنولوگيالىق كومپانيالاردى تارتادى جانە قازاقستاننىڭ ەۋرازياداعى نەگىزگى تسيفرلىق حابتاردىڭ ءبىرى رەتىندەگى پوزيتسياسىن نىعايتادى»، — دەدى پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.

«ءبىز ونداعان جىلدارعا ەسەپتەلگەن ينفراقۇرىلىمدى قالىپتاستىرىپ جاتىرمىز. جوبانى جۇزەگە اسىرۋ زاماناۋي ەسەپتەۋ رەسۋرستارىنا قولجەتىمدىلىكتى قامتاماسىز ەتۋگە، جاساندى ينتەللەكت تەحنولوگيالارىن ەنگىزۋدى جەدەلدەتۋگە جانە جاھاندىق تەحنولوگيالىق كومپانيالاردى تارتۋعا قولايلى جاعداي جاساۋعا مۇمكىندىك بەرەدى. ءبىزدىڭ ماقساتىمىز — قازاقستاندا ەۋرازياداعى ەڭ ءىرى تسيفرلىق كلاستەرلەردىڭ ءبىرىن قالىپتاستىرۋ», — دەدى «قازاقتەلەكوم» اق باسقارما توراعاسى باعدات مۋسين.

قازاقستان ءۇشىن زاماناۋي دەرەكتەر ورتالىقتارى مەن ەسەپتەۋ پلاتفورمالارىن دامىتۋ ينۆەستيتسيا تارتۋعا، تسيفرلىق سەرۆيستەردى لوكاليزاتسيالاۋعا، ينجەنەرلىك كادرلاردى دايارلاۋعا جانە تەحنولوگيالار سالاسىندا جاڭا ەكسپورتقا نەگىزدەلگەن باعىتتاردى قالىپتاستىرۋعا مۇمكىندىك اشادى. ءوزىنىڭ جوعارى ءونىمدى ينفراقۇرىلىمىنىڭ بولۋى سونداي-اق عىلىمي زەرتتەۋلەر جۇرگىزۋگە، ستارتاپتاردى قولداۋعا، بۇلتتى سەرۆيستەردى كەڭەيتۋگە جانە ەل ىشىندە جاساندى ينتەللەكت شەشىمدەرىن كەڭەيتۋگە جاعداي جاسايدى.

سۋرەت: primeminister.kz سايتىنان الىندى.

كەزدەسۋ قورىتىندىسى بويىنشا جاساندى ينتەللەكت جانە تسيفرلىق ينفراقۇرىلىم سالاسىنداعى ىنتىماقتاستىق تۋرالى جالپى كولەمى $ 10 ملرد-تى قۇرايتىن كەلىسىمدەرگە قول قويىلدى:

– قازاقستان رەسپۋبليكاسىنىڭ جاساندى ينتەللەكت جانە تسيفرلىق دامۋ مينيسترلىگى مەن Firebird كومپانياسى اراسىنداعى ستراتەگيالىق ىنتىماقتاستىق تۋرالى كەلىسىم. بۇل قۇجات جاساندى ينتەللەكت ەكوجۇيەسىن دامىتۋ، سونداي-اق Alem.ai بازاسىندا Firebird Labs Kazakhstan ورتالىعىن قۇرۋ جونىندەگى نەگىزدەمەلىك كەلىسىمدەردى بەكىتەدى;

– «كت-تەلەكوم» جشس مەن Firebird Binding Term Sheet اراسىنداعى ىنتىماقتاستىقتىڭ نەگىزگى شارتتارى تۋرالى كەلىسىم، «ءدوو القابى» جوباسى اياسىندا بىرلەسكەن جۇمىستىڭ تەحنيكالىق جانە ۇيىمداستىرۋشىلىق پارامەترلەرىن ايقىندايدى.

قول جەتكىزىلگەن كەلىسىمدەر «دەرەكتەردى وڭدەۋ ورتالىقتارى القابى» جوباسىن ودان ءارى جۇزەگە اسىرۋعا نەگىز قالايدى. جوبا جاساندى ينتەللەكتىنى ەنگىزۋگە، بۇلتتى تەحنولوگيالارعا جانە جاڭا بۋىن تسيفرلىق سەرۆيستەرىنە ارنالعان زاماناۋي تەحنولوگيالىق بازانى قۇرۋدى كوزدەيدى. قول قويىلعان كەلىسىمدەر جاھاندىق تەحنولوگيالىق كومپانيالاردىڭ قازاقستانعا جاساندى ينتەللەكت ينفراقۇرىلىمىن دامىتۋ ءۇشىن بولاشاعى زور الاڭ رەتىندە قىزىعۋشىلىعىنىڭ ارتىپ وتىرعانىن كورسەتەدى جانە ەلدىڭ ورتالىق ەۋرازياداعى قالىپتاسىپ كەلە جاتقان تسيفرلىق حاب رەتىندەگى پوزيتسياسىن نىعايتادى.

Abai.kz