رۋمىن اقىنى ۇلىقبەك ەسداۋلەت پوەزياسىنا جوعارى باعا بەردى

قازاق پوەزياسىنىڭ كورنەكتى وكىلى، مەملەكەتتىك سىيلىقتىڭ يەگەرى، ۇلت اقىنى ۇلىقبەك ەسداۋلەتتىڭ شىعارماشىلىعى شەتەلدىك ادەبي ورتادا دا جوعارى باعالانىپ كەلەدى. سونىڭ ءبىر دالەلى – رۋمىن اقىنى، ادەبيەتتانۋشى ءارى مادەنيەت قايراتكەرى، حالىقارالىق ەمينەسكۋ اكادەمياسىنىڭ پرەزيدەنتى، اكادەميك، شارتاراپقا اتى كەڭىنەن تانىمال اقىن، دوكتور يون دەاكونەسكۋدىڭ (Ion Deaconescu) قازاق اقىنىنىڭ جىر الەمىنە بەرگەن جۇرەكجاردى پىكىرىن ۇسىنامىز.

اقىن ۇلىقبەك ەسداۋلەتتىڭ كىتابىن اۋدارعان جانە العىسوزىن جازعان يون دەاكونەسكۋ.

***

كوپتەگەن وقىرماندار ءۇشىن قازاقستان «دۇنيەنىڭ شەتىندە»، كوز بەن وي جەتپەيتىن كوكجيەكتىڭ ار جاعىنداعى ەل بولىپ كورىنەدى. قازاق اقىنى ۇلىقبەك ەسداۋلەت بۇكىل ادامزاتقا ورتاق ۇلى پوەزيامەن ۇندەسەتىن، تاڭعالارلىق زاماناۋي جىرلار جازادى. ول سيقىرلى قۇستىڭ قاۋىرسىنىمەن جىر جازاتىنداي; ونىڭ قاناتتى سوزدەرى بولمىستىڭ تىلسىم سىرى تۋرالى تەرەڭ سەزىمدى، ماحاببات، تاريح پەن ءداستۇر توعىسقان ويلى تولعانىستى بىزگە جەتكىزەدى. بۇل سارىندار ونىڭ ەستە قالارلىق ولەڭدەرىنىڭ ءون بويىندا اساۋ اعىس سەكىلدى ءورىلىپ جاتادى.

ۇلىقبەك ەسداۋلەت – قازاقتىڭ كلاسسيكالىق پوەزياسىنان ءنار العان، تەرەڭ مۇڭعا تولى جىرلاردىڭ اۆتورى. ونىڭ پوەزياسى – وتكەن مەن بۇگىندى قاستەرلەيتىن، ادام جانىن اسقاقتاتۋعا ۇمتىلاتىن ويلاردىڭ، سەزىمدەردىڭ جانە ەستەلىكتەردىڭ باعا جەتپەس قازىناسى.

اقىننىڭ شىعارماشىلىعى ارقىلى ءبىر ەلدى، ونىڭ كۇردەلى تاريحىن، قايسار ءارى باق قونعان حالقىنىڭ تاعدىرىن، سونداي-اق وتكەننىڭ كوزدى اشىپ-جۇمعانشا وتە شىعاتىن ساتتەرىن تانۋعا بولادى. ويتكەنى اقىن – كورەگەن تۇلعا; ونىڭ جىرلارىندا جادى ۋاقىت پەن قاشىقتىقتى ەڭسەرىپ، وزىندىك ءارى باتىل ءسوز ورنەگى ارقىلى كورىنىس تابادى.

ۇلىقبەك ەسداۋلەت – الەمدى ءسوز ارقىلى كورىپ، ءسوز ارقىلى ءومىر سۇرەتىن اقىن. ول وقىرماندارىن بۇلتتار مەن وزەندەردى، بالالىق شاقتى، كوك جايلاۋلاردى، اتا-بابالاردى جانە تۋعان ەلدى سۇيۋگە ۇندەيدى.

ول ءۇشىن پوەزيا – ءومىردىڭ ءوزى، ءسوز – التىن، ال وي – جارقىراعان گاۋھار.

سول ءۇشىن ول عالامدىق دەڭگەيدەگى اقىن.

يون دەاكونەسكۋ،

ەمينەسكۋ اكادەمياسىنىڭ پرەزيدەنتى، اقىن

Abai.kz