27 ماۋسىم كۇنى الماتى وبلىسىندا ات سپورتىنىڭ وليمپيادالىق ءتۇرى – كونكۋردان چەمپيونات وتەدى.

تالعار اۋدانىنداعى Almaty Horse & Polo Club ات سپورتى كەشەنىندە ۇيىمداستىرىلاتىن جارىسقا ەلىمىزدىڭ ءار وڭىرىنەن 50-دەن استام سپورتشى قاتىسادى. شاباندوزدار ءتۇرلى دەڭگەيدەگى كەدەرگىلەردەن ءوتىپ، وزدەرىنىڭ شەبەرلىگى مەن ەپتىلىگىن سىنايدى.

چەمپيونات باعدارلاماسىندا بالالار، جاسوسپىرىمدەر، اۋەسقوي جانە تاجىريبەلى سپورتشىلار باق سىنايدى. قاتىسۋشىلار جىلدامدىق پەن كاسىبي دايىندىقتى عانا ەمەس، ات پەن شاباندوز اراسىنداعى ۇيلەسىمدىلىكتى دە كورسەتەدى.

كونكۋر – وليمپيادا ويىندارىنىڭ باعدارلاماسىنا ەنگەن ات سپورتىنىڭ بەدەلدى ءتۇرى. بۇل سايىستا جەڭىسكە جەتۋ ءۇشىن شاباندوز بەن تۇلپاردىڭ ءوزارا سەنىمى مەن تۇسىنىستىگى ەرەكشە ماڭىزعا يە.

جارىستىڭ باستالۋى – ساعات 10:00-دە. ۇيىمداستىرۋشىلار تۇرعىندار مەن ءوڭىر قوناقتارىن جارىسقا كەلىپ، سپورتشىلارعا قولداۋ كورسەتۋگە شاقىرادى.

وتەتىن ورنى: Almaty Horse & Polo Club ات سپورتى كەشەنى، الماتى وبلىسى تالعار اۋدانى رىسقۇلوۆ اۋىلى.

Abai.kz